Saludsod
◼ Rumbeng kadi nga iwaras dagiti Saksi ni Jehova dagiti nairekord a palawag wenno dagiti kopia dagita?
Mapabpabileg ken maparparegtatayo kadagiti palawag a naibatay iti Biblia. (Ara. 15:32) Isu a gagangay laeng a kayattayo nga iranud dagiti kasta a makaparegta nga impormasion kadagiti saan a nakatabuno. Yantangay adu itan dagiti nagduduma nga alikamen a pagirekord, nalaka laengen nga irekord ken iwaras dagiti palawag kadagiti dadduma. Nakaurnong dagiti dadduma kadagiti nairekord a palawag, agraman dagiti nabayagen a palawag, ket nasayaat ti panggepda a nangipabulod ken nangaramid kadagiti kopia dagita para kadagiti gagayyemda. Dadduma ti nangaramid kadagiti Web site a nangikabilanda kadagita a palawag tapno mai-download dayta ti siasinoman.
Nalawag a saan met ketdi a dakes no irekordtayo dagiti palawag para kadatayo a mismo wenno kadagiti kapamiliatayo. Maysa pay, mabalin nga iyurnos dagiti panglakayen nga irekord dagiti palawag para kadagiti miembro ti kongregasion a saanen a makabael a tumabuno kadagiti gimong. Nupay kasta, adda dagiti nasayaat a rason a ditay iwaras dagiti nairekord a palawag wenno dagiti naisurat a kopia dagita.
Gapu ta masansan a maipaay dagiti palawag depende kadagiti kasapulan ti kongregasion, mabalin a saan a maitutop ti aplikasion dagiti punto manipud kadagiti nairekord a palawag gapu ta saantay nga ammo no ania ti kasasaad idi naipalawag dagita. Maysa pay, saan a nalaka nga ammuen no siasino ti nangipalawag ken no kaano a naipalawag dagita tapno masiguradotayo nga umiso ti impormasion ken maitunos dayta iti kabaruan a lawag. (Luc. 1:1-4) Kanayonanna, ti panangiwaras kadagiti nairekord a palawag wenno dagiti naisurat a kopia dagita mabalin a sulisogenna ti maysa a mangipaay wenno umawat iti di maiparbeng nga atension wenno dayaw.—1 Cor. 3:5-7.
Ti matalek ken masirib nga adipen ikagkagumaanna nga ipaay ti naespirituan a taraon iti maitutop a ‘bingay’ ken iti “umiso a tiempo.” (Luc. 12:42) Ramanen daytoy ti urnos para kadagiti palawag nga agpaay kadagiti lokal a kongregasion dagiti Saksi ni Jehova ken dagiti audio recording a mai-download manipud iti opisial a Web site a jw.org. Makapagtalektayo a ti matalek ken masirib nga adipen ken ti Bagi a Manarawidwidna ipaayna dagiti kasapulantayo tapno mapatibker ti pammatitayo.—Ara. 16:4, 5.