“Kabaelam ti Agpayunir!”

1. Ania ti karirikna ti maysa a kabsat maipapan iti panagserbina kas payunir?

¹ “Awanen ti sabali a trabaho a makaipaay kaniak iti kasta unay a pannakapnek wenno makagunggona unay iti naespirituan,” kinuna ni Kathe B. Palm. Isu ket pinullo a tawenen a payunir ken dakkel ti sakripisiona a mangaskasaba kadagiti nadumaduma a lugar iti Chile, South America. Nalabit adda maysa a tao nga ammona a makapnek ti biag dagidiay agserserbi iti amin a tiempo ket kinunana kenka: “Kabaelam ti agpayunir!”

2. Kasano a mangyeg iti pudpudno a pannakapnek ti pannakiraman kadagiti naespirituan nga aktibidad?

² Makapnek a Wagas ti Panagbiag: Ti modelotayo a ni Jesus ket nakarikna iti pudpudno a bang-ar iti panangaramidna iti pagayatan ni Amana. (Juan 4:34) Gapuna, sipapasnek nga insuro ni Jesus kadagiti pasurotna a mangyeg iti pudpudno a pannakapnek ti pannakiraman kadagiti aktibidad nga adda pakainaiganna iti panagdayaw ken Jehova. Kontentotayo no okupadotayo kadagiti trabaho a pakaay-ayuan ni Jehova. Malaksid iti dayta, rumayray ti ragsaktayo no ad-adu a tiempo, pigsa, ken sanikua ti usarentayo a tumulong kadagiti sabsabali.—Ara. 20:31, 35.

3. Ania a rag-o ti matagiragsaktayo no ad-adu a tiempo ti busbosentayo iti ministerio?

³ No ad-adu ti tiempo a busbosentayo iti ministerio, ad-adu met ti oportunidad a masagraptayo ti rag-o nga iyeg ti panangirugi ken panangikondukta kadagiti panangyadal iti Biblia. Bayat nga umad-adu ti kapadasantayo ken lumalaingtayo iti ministerio nalabit matakuatantayto a nabunga gayam uray dagiti teritoria a kasla mangyaleng-aleng ti adu kadagiti bumalay. Mabalin nga iyaplikar dagiti payunir ti amin a masursuroda iti Pioneer Service School, a mabalinda a tabunuan no makatawendan a payunir. (2 Tim. 2:15) Bayat nga itultuloytayo nga itungpal ti ministeriotayo, makaimulatayo kadagiti bin-i ti kinapudno a mangpataudto kadagiti bunga.—Ecl. 11:6.

4. Ania ti masapul nga utoben dagiti agtutubo a dandanin agturpos?

⁴ Agtutubo: Bayat nga ages-eskuelakayo pay laeng, pinampanunotyo kadin a naimbag no ania ti aramidenyo iti masanguanan? Ti eskediulyo ket kaaduanna nga agpampannuray pay laeng kadagiti aktibidadyo iti eskuelaan. Ngem inton makaturposkayo, anianto ti pangusaranyo iti tiempoyo? Imbes nga ipangpangrunayo ti mangragpat iti sekular a karera, apay a diyo utoben ken ikararag ti kalat a panag-regular pioneer? Dagiti paglaingan a masursuroyo—kas iti panangasaba kadagiti tattao a nagduduma ti nalikudanna, panangdaer kadagiti lapped, panangdisiplina iti bagi, ken panangparang-ay iti abilidad a mangisuro—ket makatulong kadakayo iti intero a panagbiagyo.

5. Kasano a maiparegta dagiti nagannak ken ti kongregasion ti panagpayunir?

⁵ Nagannak, iparparegtayo met la kadi kadagiti annakyo ti panagserbi iti amin a tiempo? Dakkel ti maaramidan ti nasayaat a sasao ken ulidanyo tapno maipangpangrunada dagiti interes ti Pagarian. (Mat. 6:33) Ni Ray, a nangrugi a nagpayunir apaman a nagturpos iti haiskul, kinunana: “Kanayon nga ibagbaga ni nanangko a makapnek unay ti panagpayunir.” Amin a kameng ti kongregasion maiparegtada ti panagpayunir babaen ti sasao ken suportada. Kinuna ni Jose a taga-Espania: “Ibilang dagiti kakongregasionko a ti panagpayunir ti kasayaatan a karera para kadagiti agtutubo. Dagiti komento ken ti panangapresiarda iti panagserbi iti amin a tiempo agraman ti praktikal a suportada ti nakatulong kaniak nga agpayunir.”

6. Ania ti mabalintayo nga aramiden no awan pay ti tarigagaytayo nga agpayunir?

⁶ Panangparmek Kadagiti Lapped: No iti panagriknam iti damo ket awan ti tarigagaymo nga agpayunir, ikararagmo dayta ken Jehova. Mabalinmo nga ibaga, ‘Diak ammo no makapagpayunirak ngem kayatko nga aramiden ti pagayatam.’ (Sal. 62:8; Prov. 23:26) Kalpasanna, agpaiwanwanka iti Sao ken iti organisasionna. Ti adu a regular pioneer ket pinadasda nga umuna ti nag-auxilliary pioneer. Ti nariknada a rag-o ti nangtignay kadakuada nga agtultuloy nga agserbi iti amin a tiempo.—Sal. 34:8.

7. No iti panagriknatayo ket ditay maabut ti 70 nga oras a makalikaguman iti binulan, ania ti aramidentayo?

⁷ Kasano no kasla saanmo a kabaelan nga abuten ti 70 nga oras a makalikaguman iti binulan? Nasayaat no makisaritaka kadagiti payunir a kapadam iti kasasaad. (Prov. 15:22) Kalpasanna, mangaramidka kadagiti eskediul a mabalinmo a suroten. Mabalin a makitamto a nalaklaka ngem iti impagarupmo ti panangyun-una iti ministerio ngem kadagiti saan unay a napateg nga aktibidad.—Efe. 5:15, 16.

8. Apay a nasken a tingitingentayo sagpaminsan ti kasasaadtayo?

⁸ Tingitingem Manen ti Kasasaadmo: Masansan nga agbaliwbaliw ti kasasaad ti tunggal maysa. Nasayaat ngarud no sagpaminsan a tingitingenyo ti kasasaadyo. Kas pagarigan, dandanikayo kadin agretiro iti trabahoyo? Ni Randy a nasapa a nagretiro, kinunana: “Gapu iti daytoy a desisionko, nakapag-regular pioneer-kami ken baketko, ken naaddaankami iti gundaway nga umakar ken agserbi iti lugar nga addaan dakdakkel a panagkasapulan. Nakaad-adu a bendision ti nasagrapko, ngem ti kasayaatan iti amin ket ti nadalus a konsiensiak.”

9. Ania ti masapul a tingitingen dagiti agassawa?

⁹ Kalpasan a natingitingda a naimbag ti kasasaadda, nakita ti sumagmamano a pagassawaan a saan a kasapulan a duada nga agtrabaho iti adu nga oras. Pudno a mabalin nga agkalikagum daytoy iti panangpasimple iti wagas ti panangbiag ti pamilia, ngem makapnek ti kasta a panagsakripisio. Ni John, a ti baketna ket nabiit pay a nagikkat iti amin tiempo a trabahona tapno mapalawana ti ministeriona, kinunana: “Naragragsakak ita gapu ta ammok nga okupado ni baketko kadagiti naespirituan nga aktibidad.”

10. Ania ti mangtignay kadagiti Kristiano a mangikabilangan iti panagpayunir?

¹⁰ Panangipakita iti Ayat ken Pammati: Ti panangasaba ti kapatgan a trabaho nga inted ni Jehova iti tunggal maysa kadatayo. Asidegen a madadael daytoy daan a sistema, ket dagiti laeng umaw-awag iti nagan ni Jehova ti maisalakan. (Roma 10:13) Ti puso a napnuan iti panagayat Kenkuana ken iti panagyaman iti amin nga inaramidna agpaay kadatayo tignayennatayo a mangitungpal iti annongen nga inted ti Anakna—ti panangasaba a sireregta. (Mat. 28:19, 20; 1 Juan 5:3) Ti panamati a talaga nga agbibiagtayon iti maudi nga al-aldaw tignayennatayo met a mangaramid iti amin a kabaelantayo iti ministerio bayat nga adda pay ti tiempo imbes nga usarentayo a naan-anay ti lubong.—1 Cor. 7:29-31.

11. Ania ti rumbeng a panangmatmattayo no adda mangibaga a kabaelantayo ti agpayunir?

¹¹ Ti panag-regular pioneer ket saan laeng a basta panangbusbos iti ad-adu nga oras iti ministerio; ebkas dayta ti debosiontayo iti Dios. Gapuna, agyamanka no adda mangibaga kenka a kabaelam ti agpayunir. Panunotem ngarud a naimbag ken ikararagmo ti tarigagaymo a makipaset iti daytoy a makapnek a panagserbi iti Dios.

[Blurb iti panid 4]

Nagannak, iparparegtayo met la kadi kadagiti annakyo ti panagserbi iti amin a tiempo?

[Blurb iti panid 5]

Ti panangasaba ti kapatgan a trabaho nga inted ni Jehova iti tunggal maysa kadatayo.