Simple Kadi ti Matayo?
1. Ania ti kayat a sawen ti ‘simple a mata’?
1 Ti nakaipamaysaan ti matatayo impluensiaanna dagiti tignaytayo. Anian a maitutop dagitoy a sasao ni Jesus: “No, ngarud, simple ti matam, ti intero a bagim naraniagto”! (Mat. 6:22) No “simple” ti matatayo iti naespirituan nga anag, naipamaysa daytoy iti maymaysa a panggep—ti panangaramid iti pagayatan ti Dios. Ipangpangrunatayo ti Pagarian ken saantayo a pasinga kadagiti saan a napateg a material a banag wenno kadagiti aktibidad a mangagaw iti panawentayo iti ministerio.
2. Ania ti mabalin a mangbalbaliw iti panangmatmattayo, ngem ania ti makatulong kadatayo?
2 Kasapulan ti Panangsukimat iti Bagi: Mabalin nga agbaliw ti panangmatmattayo iti no ania a talaga ti kasapulantayo babaen kadagiti anunsio iti media wenno kadagiti ik-ikutan dagiti sabsabali. Sakbay nga ikagumaantayo nga aramiden wenno gatangen ti maysa a banag nga agkalikagum iti adu a panawen, kuarta, wenno pigsa, nasayaat no ‘pattapattaentayo ti magastos’ babaen ti panangisaludsodtayo iti bagbagitayo, ‘No aramidek daytoy, sumayaat ngata ti panagserbik ken Jehova wenno lapdannak laeng?’ (Luc. 14:28; Fil. 1:9-11) Nasayaat met no sagpaminsan nga usigentayo no kasanotayo pay a mapasimple ti biagtayo tapno ad-adu ti maaramidantayo iti ministerio.—2 Cor. 13:5; Efe. 5:10.
3. Ania ti masursurotayo iti maysa a kabsat a nangaramid kadagiti panagbalbaliw tapno mapasimplena ti biagna?
3 Idi nag-regular pioneer ti maysa a kabsat a babai, intultuloyna ti full-time job-na nupay umdas koman a pagbiagna ti masapulanna no agtrabaho iti part-time. Kinunana idi agangay: “Awan ti makapagserbi iti dua nga appo. Nasken a dagiti laeng kasapulak ti gatangek saan a dagiti kayatko. Naamirisko a dumaan ken maumaakto met laeng dagitoy, ken makabannog no ikarigatak a gun-oden ti aniaman a banag a kayatko.” Ipalubos ti kasasaadna a mangaramid kadagiti panagbalbaliw a mangpasimple iti biagna, ken mangbirok iti sabali a trabaho tapno maitultuloyna ti agpayunir.
4. Apay a napateg a taginayonentayo ita ti simple a mata?
4 Ad-adda a napateg ita a taginayonentayo ti simple a mata gapu ta agbibiagtayon iti naganat a tiempo. Tunggal aglabas ti aldaw, umas-asidegtayo iti panungpalan ti sistema ti bambanag ken iti panangrugi ti baro a lubong ti Dios. (1 Cor. 7:29, 31) No ipamaysatayo ti trabaho a panangasaba, maispaltayo ti bagitayo ken dagidiay dumngeg kadatayo.—1 Tim. 4:16.