Nainkararagan a Panagmennamenna—Napateg Kadagiti Naregta a Ministro
1. Ania ti nakatulong ken Jesus tapno saan a masinga iti kangrunaan a trabahona?
1 Binusbos ni Jesus ti rabii a nangagas kadagiti masakit ken nangparuar kadagiti sairo. Idi nasarakan dagiti adalanna iti sumaruno nga aldaw, kinunada: “Isuamin sapsapulendaka,” nga idagdagadagda nga itultuloyna dagiti milagro nga inaramidna. Ngem saan a kayat ni Jesus a masinga ti kangrunaan a trabahona, ti panangikasaba iti naimbag a damag. Kinunana: “Mapantayo iti sabali pay a lugar, kadagiti pimmurok nga ili iti kabangibang, tapno mangasabaak met sadiay, ta gapu itoy a panggep a rimmuarak.” Ania ti nakatulong ken Jesus a mangipamaysa iti ministeriona? Nasapa a bimmangon tapno agkararag ken agmennamenna. (Mar. 1:32-39) Kasano a ti panagkararag ken panagmennamenna tulongannatayo nga agbalin a naregta a manangaskasaba?
2. Ania ti mabalintayo a mennamennaen tapno agtalinaedtayo a naregta iti ministerio?
2 Ania ti Mennamennaentayo? Napaliiw ni Jesus a dagiti tattao ket “nalalatan ken naiwarawarada a kasla karkarnero nga awanan pastor.” (Mat. 9:36) Umasping iti dayta, panunotentayo a kasapulan unay dagiti tattao ti naimbag a damag. Mabalintayo nga utoben ti kinaganat ti tiempo. (1 Cor. 7:29) Mabalintayo a mennamennaen dagiti aramid ken galad ni Jehova, ti pribilehiotayo nga agbalin a Saksi ni Jehova, ken ti napateg a naespirituan a gameng a nasursurotayo iti Sao ti Dios a saan pay laeng nga ammo dagiti tattao iti teritoriatayo.—Sal. 77:11-13; Isa. 43:10-12; Mat. 13:52.
3. Ania dagiti nasayaat a panawen a mabalintayo ti agmennamenna?
3 Kaano nga Agmennamennatayo? Kas iti inaramid ni Jesus, adda dagidiay nasapa a bumangon bayat a naulimek pay ti aglawlaw. Para kadagiti dadduma, ti kasayaatan a panawenda nga agmennamenna ket iti rabii sakbay a maturogda. (Gen. 24:63) Uray no okupadotayo, maiwayaantayo latta ti agmennamenna. Adda dagidiay mangar-aramid iti dayta bayat nga agbibiaheda. Adda met dagidiay agmennamenna bayat nga agin-inanada iti aldaw. Natakuatan ti adu a ti panagmennamenna sakbay a makiramanda iti ministerio, uray sumagmamano a minuto laeng, ket nakatulong kadakuada a mangasaba a sireregta ken situtured.
4. Apay nga agmennamennatayo?
4 Ti panagkararag ken panagmennamenna parayrayenna ti tarigagaytayo nga agserbi ken Jehova, tulongannatayo a mangipamaysa kadagiti naespirituan a banag, ken patibkerenna ti determinasiontayo nga agtultuloy a mangasaba. Ni Jesus, a Kangrunaan a Ministro ti Dios, ket nagunggonaan iti panagmennamenna. Sigurado a magunggonaantayo met.