Naan-anay nga Ikasabam ti Pagarian ti Dios
1. Mangrugi iti lawas ti Marso 14, anianto ti adalentayo iti Panagadal ti Kongregasion iti Biblia?
1 Kabayatan ti lawas ti Marso 14, 2011, dagiti Cebuano, Hiligaynon, Iloko, ken Tagalog a kongregasion adalendanto ti Naan-anay nga Ikasabam ti Pagarian ti Dios iti Panagadal ti Kongregasion iti Biblia. (Pakaammo: dagiti Bicol, Pangasinan, ken Waray-Waray a kongregasion adalenda ti libro nga Umadanika ken Jehova kas naipakaammo iti Nobiembre a Ti Ministeriotayo iti Pagarian.) Daytoy a publikasion saklawenna ti libro nga Aramid iti wagas a tumulong iti agbasbasa a mangipapuso kadagiti dramatiko a pasamak. Saan daytoy a bersikulo por bersikulo a panangilawlawag no di ket ipakitana dagiti leksion a masursurotayo kadagiti salaysay iti Aramid ken tulongannatayo a mangyaplikar kadagita.—Roma 15:4.
2. Ilawlawagyo ti sumagmamano a paset ti libro a Naan-anay nga Ikasabam ti Pagarian ti Dios.
2 Dagiti Paset ti Libro: Ti introduksion iti panid 2 ket surat ti Bagi a Manarawidwid a sibabara a mangyeb-ebkas a kayatda la unay a magunggonaantayo iti daytoy a publikasion. Mangrugi iti kapitulo 2, nailanad no ania ti mailawlawag iti tunggal kapitulo, ken adda teksto a mangipakita no ania a benneg ti Aramid ti maisalaysay. Adu kadagiti kapitulo ti addaan kadagiti kahon a naglaon kadagiti makaisuro nga impormasion maipapan kadagiti tattao, lugar, wenno pasamak. Nalawa ti pingirna a mabalintayo a suratan. Ti intero a libro ket naglaon kadagiti detalyado nga ilustrasion maipapan kadagiti eksena iti Biblia tapno mailadawantayo iti isiptayo dagiti napapateg a pasamak. Ti maudi a panid ket addaan iti makatulong nga indise dagiti ladawan a mangilawlawag no ania ti makita iti nagduduma a ladawan. Ti bangir a panid ti makinsango ken makinlikud nga akkub ket naglaon iti mapa a tumulong kadatayo a mangammo no sadino ti nakadandanonan dagiti Kristiano idi umuna a siglo a nangiwarwaragawag iti naimbag a damag “agingga iti kaadaywan a paset ti daga.”—Ara. 1:8.
3. Ania dagiti napapateg a saludsod a masungbatan iti panangadaltayo iti libro nga Aramid?
3 Sungbat Kadagiti Napapateg a Saludsod: Ti panangusig iti libro nga Aramid tulongannatayo a mangammo a silalawag kadagiti sungbat dagiti napapateg a saludsod maipapan iti Nakristianuan a ministerio. Kas pagarigan, ania a trabaho ken mensahe ti mangipabigbig kadagiti pudno a pasurot ni Jesu-Kristo? Siasino ti mangiturturong iti daytoy a sangalubongan a trabaho a panangasaba, ken kasano? Ania dagiti oportunidad a patauden ti pannakaidadanes ken ibubusor agpaay kadagiti ministro? Ania ti akem ti nasantuan nga espiritu iti ministeriotayo?
4. Kasanotayo a magunggonaan a naan-anay iti panangadaltayo iti daytoy a publikasion?
4 Tapno naan-anay a magunggonaankayo, adalenyo a nasaksakbay ti material, ken agsaganakayo a makiraman iti panagkomento. Tabunuanyo ti tunggal gimong, ken utobenyo no kasanoyo a mayaplikar iti ministerioyo dagiti leksion a nasursuroyo. Sapay koma ta ti panangadaltayo iti daytoy a nagsayaat a publikasion gutugotennatayo a naan-anay a mangikasaba iti Pagarian ti Dios!—Ara. 28:23.