Agbalinkayo a “Nadungngo a Mannakipagrikna”
1. Ania ti kasapulan unay ita dagiti tattao?
1 Ad-adda nga agkasapulan unay iti naasi a tulong ti nakaad-adu a tattao ita. Gapu ta dumakdakes ti kasasaad iti lubong, adu ti saan a naragsak, agsagsagaba iti depresion, ken kinaawan namnama. Minilion a tattao ti agkasapulan iti tulong, ket datayo a Kristiano kabaelantayo nga ipakita ti napaypayso a pannakaseknan kadagiti kaarrubatayo. (Mat. 22:39; Gal. 6:10) Kasanotayo a maipakita ti kasta a pannakaseknan?
2. Kasano ti kasayaatan a panangipakitatayo iti kinamanangngaasi?
2 Trabaho nga Ebkas ti Kinamanangngaasi: Ti Dios laeng ti gubuayan ti napaypayso ken manayon a liwliwa. (2 Cor. 1:3, 4) Indagadag ni Jehova nga isu ket tuladentayo babaen ti panagbalintayo a “nadungngo a mannakipagrikna,” wenno naasi, ken inikkannatayo iti annongen nga idanontayo kadagiti tattao ti naimbag a damag maipapan iti Pagarian. (1 Ped. 3:8) Ti aktibo a pannakiraman iti daytoy a trabaho ti kasayaatan a pamay-an tapno maliwliwatayo dagiti “nasnaayan ti pusona,” gapu ta ti Pagarian ti Dios ti kakaisuna a napaypayso a namnama dagiti agsagsagaba. (Isa. 61:1) Iti din agbayag, pagpatinggaenen ni Jehova ti kinadangkes ken ipasdeknan ti nalinteg a baro a lubong gapu iti asina kadagiti tattao.—2 Ped. 3:13.
3. Kasanotayo a matulad ti panangmatmat ni Jesus kadagiti tattao?
3 Tuladenyo ti Panangmatmat ni Jesus Kadagiti Tattao: Uray idi nangasaba iti dakkel a bunggoy, sipapanunot ni Jesus iti naespirituan a kasapulan dagiti tattao, saan laeng a kas maysa a grupo, no di ket kas indibidual. Mayarigda iti karnero nga awanan iti pastor a mangidalan kadakuada. Natukay ti puso ni Jesus idi nakitana ida isu a natignay a mangisuro a siaanus kadakuada. (Mar. 6:34) No tuladentayo ti panangmatmat ni Jesus kadagiti tattao, matignaytayo a mangipakita iti napaypayso nga asi kadakuada kas indibidual. Agminar daytoy iti wagas a pannakisaritatayo ken iti ekspresion ti rupatayo. Ipangpangrunatayo ti mangasaba, ken ibagaytayo dagiti sasaotayo iti pakaseknan ti tunggal indibidual.—1 Cor. 9:19-23.
4. Apay nga ipakitatayo ti kinamanangngaasi?
4 Ti dakkel a bunggoy dagiti tattao manipud iti amin a nasion ket sidadaan nga umawat iti mensahe maipapan iti Pagarian ken maragragsakanda iti napaypayso a pannakaseknan a maipakpakita kadakuada. No itultuloytayo nga ipakita ti kinamanangngaasi, maidaydayaw ken maay-ayotayo ti naasi a Diostayo a ni Jehova.—Col. 3:12.