‘Masantipikar Koma ti Nagan ti Dios’
1. Ania ti tema ti programa ti asamblea sirkito iti 2012, ken ania ti nakaibatayanna?
1 Anian a pribilehiotayo ti mangawit iti nagan ni Jehova a Soberano iti Uniberso! Ti Dios a mismo ti nangigalad iti naisangsangayan a naganna kadatayo, nangruna idi 1931, ta nangrugi idin a maawagantayo iti Saksi ni Jehova. (Isa. 43:10) Ni Jesus, a bugbugtong nga Anak ti Dios, impategna iti kasta unay ti nagan ti Dios, nga impangpangrunana dayta iti modelo a kararagna. (Mat. 6:9) Ti sasao ni Jesus ti nakaibatayan ti tema ti programa ti asamblea sirkitotayo iti 2012—‘Masantipikar Koma ti Nagan ti Dios.’
2. Ania dagiti impormasion a segseggaantayo a mangngegan?
2 No Ania ti Mangngegantayo: Iti Sabado, ti palawag nga “Ipakaammoyo ti Nagan ti Dios Babaen ti Panagserbi iti Amin a Tiempo” ilawlawagna no apay a makagunggona a wagas ti panagbiag ti panagserbi iti amin a tiempo. Mangngegantayto met ti simposium nga “Agannadkayo iti Aniaman a Pakaumsian ti Nagan ni Jehova,” a tumulong kadatayo a saan a matnag iti uppat a posible a silo. Dagiti saludsod nga, Ania ti tumulong kadatayo a mangasaba a sireregta uray no kasla saan nga interesado dagiti tattao? ken, Ania ti tumulong kadatayo nga agbalin a nabunga ken epektibo iti ministerio? ket masungbatan iti palawag a “No Apay a Masapul a Masantipikar ti Nagan ti Dios.” Iti Domingo, tagiragsakentayto ti uppat ti pasetna a simposium no kasanotayo a masantipikar ti nagan ti Dios babaen iti panagpampanunot, panagsasao, panagdesdesision, ken konduktatayo. Nangnangruna a magustuanto dagiti kabbaro ti palawag publiko a napauluan, “Santipikaren ni Jehova ti Naindaklan a Naganna Inton Armagedon.”
3. Ania ti pribilehiotayo, ken kasano a makatulong kadatayo ti programa?
3 Iti din agbayag, agtignayen ni Jehova a mangsantipikar iti naganna. (Ezeq. 36:23) Kabayatanna, addaantayo iti naisangsangayan a pribilehio a mangitandudo iti amin nga irepresentar ti nasantuan a nagan ni Jehova. Agtalekkami a ti programa ti asamblea sirkito tulonganna ti tunggal maysa kadatayo a mangitungpal iti nadagsen a responsabilidadtayo kas mangaw-awit iti nagan ti Dios.