Kasabaanyo ti “Amin a Kita ti Tattao”
1. Apay a dagiti epektibo nga ebanghelisador ket mayarig iti nasigo a trabahador?
1 Ti nasigo a trabahador ket addaan iti adu nga alikamen, ken ammona no kaano ken no kasano nga usaren dagita. Umasping iti dayta, addaantayo iti nagduduma nga alikamen a makatulong kadatayo a mangitungpal iti trabahotayo kas ebanghelisador. Kas pagarigan, addaantayo kadagiti broshur a nadumaduma ti topikona a tumulong kadatayo a mangasaba iti “amin a kita ti tattao.” (1 Cor. 9:22) Nailanad iti suplemento ti sumagmamano kadagitoy a broshur, nailawlawag no siasino ti nakairantaanda, ken no kasanotayo nga itukon dagiti broshur.
2. Kaano a mabalin nga usarentayo dagiti broshur iti ministeriotayo?
2 No Kaano nga Usaren Dagiti Broshur: Ti trabahador usarenna ti alikamenna no kasapulanna dayta. Umasping iti dayta, mabalintayo nga itukon dagiti broshur no iti panagriknatayo ket dayta ti kasapulan ti bumalay, uray no saan a dagitoy ti nayurnos nga itukontayo. Kas pagarigan, no ti tukontayo ket ti libro nga Isursuro ti Biblia ngem saan a Kristiano dagiti tattao iti teritoriatayo ken saanda unay nga interesado iti Biblia, mabalin a nasaysayaat no mangitukontayo iti maitutop a broshur sa iruangantayo ti libro nga Isursuro ti Biblia kalpasan a maparayraytayo ti interes ti maysa a tao.
3. Apay a rumbeng nga agbalintayo a nasigo a mangusar kadagiti alikamentayo a mangasaba?
3 Iti Kasuratan, makomendaran dagiti nasigo iti trabahoda. (Prov. 22:29) Sigurado nga awan ti trabaho a napatpateg ita ngem “iti nasantuan a trabaho iti naimbag a damag.” (Roma 15:16) Tapno agbalintayo a “maysa a mangmangged nga awan ti aniaman nga ibainna,” ikagumaantayo ti agbalin a nasigo a mangusar kadagiti alikamentayo.—2 Tim. 2:15.