Ti Video a The Wonders of Creation Reveal God’s Glory
Maay-ayatan ti adu a mangpalpaliiw iti sangaparsuaan. Ngem manmano ti makabigbig a ti sangaparsuaan ipalgakna ti kapanunotan ken rikna ti Naindaklan a Namarsua kadatayo. (Roma 1:20) Adu idi ti nasursuro ni David maipapan ken Jehova babaen ti naipaltiing a Saona. Ngem simminged met iti Dios babaen ti panangpaliiwna iti sangaparsuaan. (Sal. 8:3, 4) Ti video a napauluan iti The Wonders of Creation Reveal God’s Glory ket makatulong kadatayo, kadagiti annaktayo, ken kadagiti iyad-adalantayo a mangpaliiw a naimbag iti sumagmamano kadagiti pinarsua ni Jehova, ken mangkita kadagiti kualidad ken personalidad ti Naindaklan a Namarsua, iti kasta, sumingedtayo kenkuana. Sungbatanyo dagiti sumaganad a saludsod kalpasan ti panangbuyayo iti daytoy a video.
(1) Kasano a ti kadakkel ken kinaurnos ti pisikal nga uniberso paunegenna ti panangapresiartayo ken Jehova? (Isa. 40:26) (2) No paliiwentayo a naimbag ti danum, ania ti masursurotayo iti Nangparsua iti daytoy? (Apoc. 14:7) (3) Kasano a ti kadakkel ti daga ken ti distansiana manipud iti init ipakitana ti kinasirib ni Jehova? (4) Ania ti usar ti bulan? (Sal. 89:37) (5) Kasano ti panangdisenio ni Jehova kadagiti tattao tapno matagiragsakda ti biag? (6) Ania ti DNA? (Sal. 139:16) (7) Kadagiti amin a parsua ni Jehova ditoy daga, kasano a naiduma ti tao? (Gen. 1:26) (8) Ania ti segseggaanyo iti baro a lubong?
Kanayonan a Bennegna: (9) Nagtaudan dagiti kolor? (10) Kasano a ti danum kabaelanna a subaen ti grabidad tapno makadanon iti tuktok dagiti kayo? (11) Ania ti usar ti danum iti bagitayo? (12) Mangtedkayo iti pagarigan nga agtitinnulong dagiti sibibiag a banag. (13) Kasano a nasursuro dagiti parsua ti agtitinnulong? (14) Ania ti “golden angle,” ken kasano a naiparangarang dayta kadagiti parsua?
“Paliiwenyo a Sipapasnek” Dagiti Aramid ni Jehova: Imparegta ni Jesus a ‘paliiwentayo a sipapasnek dagiti tumatayab iti langit’ ken ‘agsursurotayo kadagiti lirio iti talon.’ (Mat. 6:26, 28) No aramidentayo daytoy, tumibker ti pammatitayo ken ti panagtalektayo iti Namarsua, ken rumayray ti panangapresiartayo iti sirib, ayat, ken iti abilidad ni Jehova a mangisalakan. Imbes a masingatayo kadagiti aramid daytoy a lubong, iwayaan ken ikagumaantayo a paliiwen dagiti nakaskasdaaw a parsua ni Jehova, ken utobentayo no ania ti ipalgak dagita maipapan iti Diostayo.—Sal. 19:1.