Dimo Ibaga—“Okupadoak”

1. Apay nga agkedked ti dadduma a mangitukon iti panangyadal iti Biblia?

¹ Agkedked ti dadduma a mangitukon iti panangyadal iti Biblia gapu ta okupadoda. Adu ngamin a panawen ti mabusbos iti panangaywan iti estudiante. Kasapulan ti panawen iti panagsagana ken panangyadal, ken iti panangtulong iti estudiante a mangsango kadagiti parikutna. Kinuna ni apostol Pablo nga imburayna ti kararuana tapno matulonganna dagiti taga-Tesalonica a mangam-ammo ken ni Jehova. (1 Tes. 2:7, 8) Kasano a makaikonduktatayo iti panangyadal iti Biblia uray no okupadotayo?

2. No ay-ayatentayo ni Jehova, kasanotayo nga usaren ti panawentayo?

² Kasapulan ti Panawen iti Panagdaydayaw: Ti agpayso, agkasapulan iti panawen ti panagdaydayaw. Kas pagarigan, kanayon a mangilatlatangtayo iti panawen a makigimong, makiraman iti ministerio, agbasa iti Biblia, ken agkararag. Uray no okupado ti maysa a naasawaan, pagragsakanna nga iwayaan ti makikadua iti asawana. Anian a nangnangruna a pagragsakantayo a ‘gatangen’ ti tiempo nga agdaydayaw ken Jehova gapu ta ay-ayatentayo isuna. (Efe. 5:15-17; 1 Juan 5:3) Sigun ken Jesus, ti panangaramid iti adalan ket napateg a paset ti panagdaydayawtayo. (Mat. 28:19, 20) No sipapanunottayo iti dayta, saantayo nga agkedked a mangawat iti annongen a mangikondukta iti panangyadal iti Biblia.

3. Kasanotayo a maasikaso ti iyad-adalantayo uray no saan nga ipalubos ti kasasaadtayo ti mapan mangyadal?

³ Ngem kasano no adda trabaho, nakaro a sakit, wenno nateokratikuan nga annongentayo? Adda dagiti agibumbunannag a mangikonkondukta iti panangyadal babaen iti telepono wenno iti internet no saanda a makapan kadagiti iyad-adalanda. Dagiti met addaan iti nakaro a sakit, inyurnosda a dagiti iyad-adalanda ti mapan iti balayda. Adda met dagiti nakitulag kadagiti mapangnamnamaan a kakabsat nga isuda pay laeng ti mapan mangyadal iti panawen a kaawanda.

4. Ania dagiti bendision nga itden ti pannakiraman iti trabaho a panangyadal iti Biblia?

⁴ Dakkel a rag-o ti nasagrap ni Pablo iti panangusarna iti panawen ken pigsana a tumulong kadagiti sabsabali a mangammo iti kinapudno. (Ara. 20:35) Idi pinampanunotna dagiti amin a natulonganna idiay Tesalonica, natignay nga agyaman ken Jehova. (1 Tes. 1:2) Ad-adda a makariknatayo iti rag-o ken pannakapnek no makiramantayo iti trabaho a panangyadal iti Biblia uray no okupadotayo.