Ti Video a “Have Love for the Whole Association of Brothers”
Ti naipaltiing a sasao iti daytoy a paulo ket naisurat agarup dua ribu a tawenen ti napalabas. (1 Ped. 2:17) Ngem ad-adda ita a masapul nga iyaplikartayo dayta! Kasanotayo a maayat dagiti kakabsattayo iti intero a lubong? Ken iti daytoy awanan ayat a lubong, kasanotayo a masigurado a pulos a saan nga agkupas ti ayattayo? (Mat. 24:12) Kitaenyo no masungbatanyo dagiti sumaganad a saludsod bayat ti panangbuyayo iti video nga Our Whole Association of Brothers.
(1) Kaano a nagbalintayo a paset ti Nakristianuan a panagkakabsat? (2) Ania dagiti tallo nga aktibidad nga ar-aramidentayo ken ar-aramiden met dagiti kakabsattayo iti intero a lubong? (3) Kasano nga ipakpakita dagiti kakabsattayo ti determinasionda a mangasaba kadagiti (a) nasulinek a lugar ti Alaska, (b) dadakkel a sangladan iti Europa, ken (c) napupuskol a kabakiran iti Peru? (4) Apay a saantayo a tagtagibassiten ti trabaho a panangasaba? (5) Mangtedkayo kadagiti pagarigan no kasano a liniwliwa ken tinulongan dagiti Saksi ni Jehova ti maysa ken maysa idi adda napasamak a (a) ginggined, (b) bagyo, ken (c) gerra sibil? (6) Kadagiti ania a praktikal a pamay-an a maipakitatayo amin ti nagpateg a pakabigbigan ti Nakristianuan a panagkakabsattayo? (Juan 13:35) (7) Ania dagiti pagsayaatan ti panagtitinnulongtayo nga agibangon kadagiti bukodtayo a Kingdom Hall? (8) Kasano a nataginayon dagiti kakabsat iti Makindaya a Europa ken Russia ti espiritualidadda idi naiparit ti trabahotayo sadiay? (9) Kasano nga inkagumaan ti adu a Saksi ti tumabuno kadagiti kombension, ken apay? (10) Kasano a napabileg daytoy a video ti determinasionmo a (a) mangidaydayaw ken Jehova kadagiti Nakristianuan a gimong a kadua dagiti kakabsat, (b) tumulong kadagiti dadduma kadagiti panawen nga agkasapulanda, ken (c) mangasaba a simamatalek iti amin a gundaway? (11) Kasano ken kaanotayo nga usaren daytoy a video iti ministeriotayo?
Ti kangrunaan a rason a nagbalintayo a paset ti Nakristianuan a panagkakabsat ket ti ayattayo ken Jehova. Gapuna, kaay-ayotayo ti agsursuro maipapan kenkuana ken mangisuro kadagiti tattao iti maipapan kenkuana. Ken ay-ayatentayo dagiti tattao nga ay-ayaten ni Jehova. No tulongantayo ida iti panawen ti panagkasapulan, saantayo nga ekspektaren nga agyaman kadatayo ti Dios. Imbes ketdi, agyamantayo iti Dios gapu ta ibilangtayo ti Nakristianuan a panagkakabsattayo kas napateg a sagut a naggapu kenkuana. Bayat nga umad-adanin ti pannakadadael daytoy awanan ayat a lubong, sapay koma ta itultuloytayo nga ayaten dagiti kakabsattayo iti intero a lubong!