Tuladenyo Dagiti Propeta—Amos
1. Apay a makapabileg kadatayo ti ulidan ni Amos?
1 Nariknam kadin a saanka a kualipikado a mangasaba gapu ta nababa ti adalmo ken napanglaw ti pamiliam? No wen, mapabilegka iti ulidan ni Amos. Isu ket agtartaraken iti karnero ken trabahador no panagtutudok kadagiti bunga ti higos. Ngem pinabileg ni Jehova a mangiwaragawag iti napateg a mensahe. (Amos 1:1; 7:14, 15) Us-usaren met ita ni Jehova dagidiay nanumo ken ordinario. (1 Cor. 1:27-29) Ania ti dadduma pay a maadaltayo ken propeta Amos a makatulong iti ministeriotayo?
2. Apay a makapagtalinaedtayo a natibker iti laksid ti ibubusor iti ministeriotayo?
2 Agtalinaed a Natibker iti Laksid ti Ibubusor: Ni Amazias ket maysa a padi nga agdaydayaw iti urbon a baka iti makin-amianan a sangapulo-tribu a pagarian ti Israel. Idi nangngegna ti padto ni Amos, nakapungtot ken no ar-arigen kastoy ti kinunana: ‘Agawidkan! Dinakami bibiangan! Adda relihionmin!’ (Amos 7:12, 13) Binaliktad ni Amazias ti sasao ni Amos idi impaiparitna ken Ari Jeroboam ti trabaho ti propeta. (Amos 7:7-11) Ngem saan a napabutngan ni Amos. Adda met ita dagiti klero nga agpatpatulong kadagiti politiko tapno maidadanesda ti ili ni Jehova. Nupay kasta, ipasigurado kadatayo ni Jehova nga awan ti agballigi nga aniaman nga igam a mabukel maibusor kadatayo.—Isa. 54:17.
3. Ania ti dua ti aspetona a mensahe ti ipakpakaammotayo ita?
3 Ipakaammo ti Panangukom ti Dios ken Dagiti Bendision nga Ipaaynanto: Impadto ni Amos ti pannakaukom ti sangapulo-tribu a pagarian ti Israel. Ngem inngudona ti libro ti Biblia a naipanagan kenkuana babaen ti kari ni Jehova a pannakaisubli dagiti kautibo ken dagiti naruay a bendision. (Amos 9:13-15) Ipakpakaammotay met ti umad-adanin nga “aldaw ti panangukom” ti Dios. Ngem paset laeng dayta ti “naimbag a damag ti pagarian” a masapul nga ikasabatayo. (2 Ped. 3:7; Mat. 24:14) Ti panangdadael ni Jehova kadagiti nadangkes inton Armagedon ti mangisagana iti pannakaipasdek ti paraiso a daga.—Sal. 37:34.
4. Apay a masiguradotayo a maitungpaltayo ti pagayatan ni Jehova?
4 Ti panangikasaba iti mensahe ti Pagarian iti lubong nga aduan iti bumusbusor ti talaga a mangsubok iti determinasiontayo nga agbiag maitunos iti dedikasiontayo ken mangaramid iti pagayatan ni Jehova. (Juan 15:19) Nupay kasta, masiguradotayo nga itultuloy ni Jehova nga ipaay dagiti kasapulantayo tapno maitungpaltayo ti pagayatanna kas iti inaramidna ken Amos.—2 Cor. 3:5.