Dikay Agladladaw

1. Ania nga ulidan ti impakita ni Jehova maipapan iti di panagladladaw?

¹ Pulos a saan a maladaw ni Jehova. Kas pagarigan, ipapaayanna dagiti adipenna iti “tulong iti umiso a tiempo.” (Heb. 4:16) Ipapaayna met ti naespirituan a ‘taraon iti umiso a tiempo.’ (Mat. 24:45) Manamnamatayo ngarud a ti um-umay nga aldaw ti pungtotna ket “saanto a maladaw.” (Hab. 2:3) Talaga a mabenepisiarantayo iti panagtignay ni Jehova iti umiso a tiempo! (Sal. 70:5) Nupay kasta, gapu ta okupado ken imperpektotayo, saantay a maliklikan ti maladaw no dadduma. Apay nga ikagumaantayo ti di agladladaw?

2. Apay a pakaidayawan ni Jehova no saantayo a managladladaw?

² Iti daytoy maudi nga al-aldaw, adu ti managladladaw gapu ta dagiti tattao ket managayat iti bagbagida ken awanan iti panagteppel. (2 Tim. 3:1-3) Gapuna, no saan a managladladaw dagiti Kristiano iti trabaho, appointment, ken kadagiti miting, mapaliiw dayta dagiti dadduma ket pakaidayawan dayta ni Jehova. (1 Ped. 2:12) Kadawyanna kadi a saantay a maladaw a sumrek iti panggedantayo ngem masansan a maladawtayo kadagiti nateokratikuan nga aktibidadtayo? No saantayo a maladaw kadagiti Nakristianuan a gimong, a pakairamanan ti panglukat a kanta ken kararag, ipakpakitatayo a kayattayo a tuladen ti organisado a nailangitan nga Amatayo.—1 Cor. 14:33, 40.

3. Apay a panangipakita iti konsiderasion kadagiti dadduma ti di panagladladaw?

³ Maipakitatayo met ti konsiderasion kadagiti dadduma no saantayo a managladladaw. (Fil. 2:3, 4) Kas pagarigan, no nasapatayo a sumangpet kadagiti Nakristianuan a gimong, a pakairamanan dagiti taripnong sakbay ti panangasaba, saan a maisturbo dagiti padatayo nga agdaydayaw. Iti sabali a bangir, no nakairuamantayo ti maladaw, mabalin a panunoten dagiti dadduma a napatpateg ti tiempotayo ngem iti tiempoda. Ti di panagladladaw ipakitana a mapagtalkan, nagaget, ken mapagpiarantayo—dagiti kualidad nga ap-apresiaren dagiti tattao.

4. No masansan a maladawtayo, kasanotayo a makapagbalbaliw?

⁴ No masansan a maladawka, panunotem dagiti rason no apay. Urnosem ti eskediulmo tapno malpasmo dagiti trabahom iti umiso a tiempo. (Ecl. 3:1; Fil. 1:10) Dumawatka iti tulong ni Jehova. (1 Juan 5:14) Ti di panagladladaw ket maysa a pamay-an a maipakitatayo ti apresasiontayo iti dua a katan-okan a bilin iti Linteg—ti panagayat iti Dios ken kadagiti padatayo a tao.—Mat. 22:37-39.