Tuladenyo Dagiti Propeta—Sofonias
1. Ania ti kasasaad idi nagbalin ni Sofonias a propeta? Apay a nasayaat nga ulidan ni Sofonias kadatayo?
1 Iti katengngaan ti maikapito a siglo B.C.E., agdadata ti panagdayaw ken Baal iti Juda. Nabiit pay a napapatay ti dakes nga Ari a ni Amon ket agturturayen ti ubing nga Ari a ni Josias. (2 Cron. 33:21–34:1) Iti dayta a tiempo nga imbaon ni Jehova ni Sofonias a mangipakaammo iti mensahe maipapan iti panangukomna. Nupay ni Sofonias ket kameng iti naarian a sangakabbalayan ti Juda, saanna a pinalag-an ti mensahe ni Jehova a pangtubngar kadagiti panguluen ti Juda. (Sof. 1:1; 3:1-4) Kas ken Sofonias, ipakitatayo ti kinatured ken saantayo koma nga ipalubos a maapektaran ti panagdaydayawtayo ken Jehova gapu kadagiti kakabagiantayo. (Mat. 10:34-37) Ania a mensahe ti impakaammo ni Sofonias, ken ania ti resultana?
2. Ania ti masapul nga aramidentayo tapno maisalakantayo iti aldaw ti unget ni Jehova?
2 Sapulenyo ni Jehova: Ni Jehova laeng ti makaisalakan kadagiti tattao iti aldaw ti ungetna. Dayta ti gapuna nga imparegta ni Sofonias kadagiti taga-Juda a sapulenda ni Jehova, sapulenda ti kinalinteg, ken sapulenda ti kinaemma bayat nga adda pay panawen. (Sof. 2:2, 3) Kas ken Sofonias, iparparegtatayo met ita kadagiti sabsabali a sapulenda ni Jehova, ken masapul met a determinadotayo a saan nga “agsansanud iti isusurot ken Jehova.” (Sof. 1:6) Sapulentayo ngarud ni Jehova babaen ti naanep a panangadal iti Saona ken babaen ti panangikararag iti panangiwanwanna. Sapsapulentayo ti kinalinteg no nadalustayo iti moral. Sapsapulentayo ti kinaemma no ikagkagumaantayo ti agbalin a managpasakup ken sidadaan nga agtulnog kadagiti instruksion iti organisasion ni Jehova.
3. Apay a masapul a taginayonentayo ti positibo a panangmatmat iti ministerio?
3 Nasayaat a Resulta: Dagiti dadduma a taga-Juda, nangruna ti ubing a ni Josias a nangsapul ken Jehova uray no ubing pay laeng, ket natignay iti pangukom a mensahe ni Sofonias. Idi agangay, pinagpatingga ni Josias ti idolatria iti Juda. (2 Cron. 34:2-5) Ita, numan pay ti dadduma a bukel ti Pagarian ket naimula iti igid ti dalan, iti kabatuan, wenno iti nagbabaetan dagiti sisiitan, adda met dagiti naimula iti nasayaat a daga ket nangpataudda iti bunga. (Mat. 13:18-23) Masiguradotayo nga agtultuloy a bendisionan ni Jehova ti panagreggettayo nga agimula iti bin-i ti Pagarian.—Sal. 126:6.
4. Apay nga ‘agtultuloytayo a manginanama ken Jehova’?
4 Saan a patien ti dadduma a taga-Juda nga agtignay ni Jehova. Ngem impasigurado ni Jehova nga asidegen ti naindaklan nga aldawna. (Sof. 1:12, 14) Dagiti laeng agkamang kenkuana ti maisalakan. (Sof. 3:12, 17) Bayat nga ‘agtultuloytayo a manginanama ken Jehova,’ sapay koma ta pagragsakantayo ti agserbi a kadua dagiti padatayo nga agdaydayaw iti naindaklan a Diostayo!—Sof. 3:8, 9.