Sangagasut a Tawen a Panangiwaragawag iti Pagarian!
1. Ania ti naiparegta nga aramiden ti ili ni Jehova agarup 100 a tawenen ti napalabas?
1 “Adtoy, agturturayen ti Ari! Dakayo ti mangiwaragawag iti dayta. Ngarud iwaragawagyo, iwaragawagyo, iwaragawagyo, ti Ari ken ti pagarianna.” Babaen kadagita a makagutugot a sasao ni Brother Rutherford agarup 100 a tawenen ti napalabas, naparegta ti ili ni Jehova a mangiwaragawag iti mensahe maipapan iti Pagarian iti intero a daga. Ket kasta ti inaramidtayo! Kas kadagiti nagkauna a Kristiano, inkasabatayo ti naimbag a damag maipapan iti Pagarian “iti isuamin a parsua nga adda iti baba ti langit.” (Col. 1:23) No subliantayo ti napalabas a 100 a tawen, ania ti naaramidantayon a nangiwaragawag iti Pagarian ti Dios? Kasanotayo a maitultuloy nga iwaragawag dayta bayat nga umas-asideg ti maika-100 a tawen a pannakaipasngay ti Pagarian?
2. Kasano a maitantandudo ti Pagarian ti Dios kadagiti literaturatayo?
2 Ti Napalabas: Pinullon a tawen a maitantandudo ti Pagarian ti Dios kadagiti literaturatayo. Manipud idi 1939, ti kangrunaan a magasintayo ket napauluan: Ti Pagwanawanan Mangibumbunannag iti Pagarian ni Jehova. Masansan nga ilawlawag daytoy a magasin ti maipapan iti Pagarian ken no anianto ti ibanagna. Itampok met ti Agriingkayo! a ti Pagarian ti Dios ti kakaisuna a namnama ti sangatauan. Maitutop ngarud a daytoy a dua a magasin ti kaaduan ti pannakaipatarus ken pannakaiwarasna iti intero a lubong!—Apoc. 14:6.
3. Ania ti sumagmamano a pamay-antayo a nangiwaragawag iti Pagarian?
3 Nagduduma ti pamay-an ti ili ni Jehova a mangiwaragawag iti Pagarian. Idi, nausar dagiti sound car, radio, ken maitugottugot a ponograpo. Nakatulong dagitoy a pamay-an tapno maisaknap ti naimbag a damag iti adu a tattao idi manmano pay laeng ti manangiwaragawag ti Pagarian. (Sal. 19:4) Kadagiti kallabes a tawen, nangipablaaktayo kadagiti impormasion iti jw.org, isu a naiwaragawag ti Pagarian iti minilion a tattao, a pakairamanan dagiti agnanaed kadagiti lugar a maiparit ti trabahotayo.
4. Ania dagiti naisangsangayan a pamay-an ti panangasabatayo?
4 Nakiraman met ti ili ni Jehova kadagiti naisangsangayan a pamay-an ti panangisaknap iti mensahe maipapan iti Pagarian. Kas pagarigan, nangrugi idi katengngaan ti 1990’s, saan laengen nga iti binalaybalay ti pangaskasabaantayo no di ket kadagiti pay parke, paradaan, ken lugar ti negosio. Iti nabiit pay, nangorganisartayo iti espesial a panangasaba iti publiko kadagiti dadakkel a siudad iti intero a lubong. Kanayonanna, adu a kongregasion ti makiramraman iti panangasaba iti publiko iti teritoria ti kongregasionda babaen ti panangusarda kadagiti cart ken lamisaan a maiplastar kadagiti lugar nga adu ti matataona. Siempre, ti panagbalaybalay ti kangrunaan latta a pamay-an ti panangasabatayo.—Ara. 20:20.
5. Iti baro a tawen serbisio, ania dagiti oportunidad a silulukat iti adu kadatayo?
5 Ti Masanguanan: Iti panangrugi ti baro a tawen serbisio iti Septiembre, adunto ti agserbi kas regular pioneer. Maysakanto kadi kadakuada? No saan, makapag-auxiliary pioneer-ka kadi sagpaminsan? Makapagpayunirka man wenno saan, sigurado a bendisionan ni Jehova dagiti panagsakripisiom a makiraman a naan-anay iti panangiwaragawag iti Pagarian.—Mal. 3:10.
6. Apay a naisangsangayan a bulan ti Oktubre 2014?
6 Inton Oktubre 2014 ti maika-100 nga anibersario ti pannakaipasngay ti Pagarian. Maitutop ngarud a ti publiko nga edision Ti Pagwanawanan iti dayta a bulan ket naipamaysa iti Pagarian ti Dios. Apay a dimo ikagumaan nga ipaima dayta iti adu a tattao aginggat’ mabalin? Bayat a padpadaanantayo dagiti mapasamak iti masanguanan, sapay koma ta itultuloy ti tunggal maysa kadatayo nga ‘ideklara ti naimbag a damag ti pagarian ti Dios’ iti amin a dumngeg.—Ara. 8:12.