Usarenyo ti jw.org iti Ministerioyo

Ti Web site-tayo ket napateg nga alikamen a makatulong kadatayo a mangisaknap iti naimbag a damag “agingga iti kaadaywan a paset ti daga.” (Ara. 1:8) Kaaduan a bumalay ti saan a makaammo iti jw.org. Maammuanda laeng dayta no ibaga ti maysa nga agibumbunannag.

Adda maysa nga agdaldaliasat a manangaywan a nangi-download iti video nga Apay nga Adalem ti Biblia? iti selponna sa ipabuyana dayta no adda gundaway. Kas pagarigan, no mapan agbalaybalay, ibagana: “Sumarsarungkarak iti apagbiit ta kayatko a tulongan dagiti tattao a mangammo iti sungbat ti tallo a napapateg a saludsod: Apay a nagadu ti parikut iti lubong? Kasano a solbaren ti Dios dagita? Ken ania ti mabalintayo nga aramiden ita? Sungbatan daytoy nga ababa a video dagita a saludsod.” I-play-na a dagus ti video sa paliiwenna ti reaksion ti bumalay. Makaawis ti video nga uray la adu ti saan a mangisardeng a mangbuya iti dayta agingga a malpas. Kalpasanna, ibaga ti agdaldaliasat a manangaywan: “Kas iti nangngegyo, mabalinyo ti agkiddaw babaen ti internet iti panagadal iti Biblia. Yantangay addaak ditoyen, mabalinko nga ipakita iti apagbiit no kasano.” No umanamong ti bumalay, ipakitana no kasano ti agadal babaen ti broshur a Naimbag a Damag. No awan ti panawen ti bumalay, makitulag nga idemostrana dayta inton sumarungkar. No mapan iti coffee shop tapno aginana, kasta met laeng ti ibagana iti adda iti asidegna kalpasan ti nainggayyeman a pannakisaritana. Us-usarenyo kadi ti jw.org iti ministerioyo?