Panangparang-ay iti Abilidadtayo iti Ministerio—Panangipakita iti Personal nga Interes

No Apay a Napateg: Maseknan ni Jesus kadagiti tattao kas indibidual, ken nangipakita iti naayat a personal nga interes kadakuada. Kas pagarigan, naminsan, nadlaw ni Jesus a mababain ti maysa a tuleng a lalaki, isu nga idi inagasanna, inyadayona kadagiti tattao. (Mar. 7:31-35) Nangipakita iti konsiderasion kadagiti adalanna babaen ti panangikabilanganna kadagiti limitasionda ken saanna a ginabsuonan ida iti adu unay nga impormasion. (Juan 16:12) Uray no addan idiay langit, mangipakpakita latta ni Jesus iti personal nga interes. (2 Tim. 4:17) Kas pasurotna, kayattayo a tuladen ni Kristo. (1 Ped. 2:21; 1 Juan 3:16, 18) Maysa pay, mas epektibotayo iti ministerio no nakonsiderasiontayo iti bumalay ken ikabilangantayo ti kasasaad, paginteresan, ken pakaseknanna. Mabalin a dumngeg ti bumalay no mariknana a saantayo laeng a mangidandanon iti mensahe wenno mangmangted iti literatura, no di ket maseknantayo pay kenkuana.