“Diak Man Nadanonen!”

Naibagam met kadi daytan maipapan iti maysa a nangipakita iti interes? Uray no kanayon a mapanmo sarungkaran, saanmo a masibugan ti bin-i ti kinapudno nga immulam. (1 Cor. 3:6) No dadduma, dagiti aduan kapadasan nga agibumbunannag mangipatulodda iti surat wenno mangibatida iti ababa a mensahe iti ridaw no saanda manen a nadanon ti bumalay. Adda met dagiti agibumbunannag a mangala iti numero ti telepono ti bumalay no ammoda a narigat a madanon. Nalabit isaludsodda, “Adda selponmo?” Mabalin a maireport kas panagsarungkar no sarungkarantayo ti bumalay wenno kasabaantayo babaen ti surat, e-mail, teks, no mangibatitayo iti ababa a mensahe, wenno no tawagantayo. Uray no manmano a madanon ti bumalay, posible latta a maparayraytayo ti interesna.