Dagiti Baro a Kanta iti Panagdaydayaw!
1 Iti nabiit pay a tinawen a miting ti Watch Tower Bible and Tract Society of Pennsylvania, a naangay idi Oktubre 4, 2014, naipakaammo dagiti plano iti pannakarebisar ti agdama a pagkantaantayo. Talaga a makapagagar dayta a damag! Naipalagip kadagiti amin a timmabuno ti kinapateg dagiti kanta ti Pagarian iti panagdaydayawtayo.—Sal. 96:2.
2 Mabalin a pampanunotenyo, ‘Apay a kasapulan a marebisar ti pagkantaan?’ Adda sumagmamano a rason. Umuna, agtultuloy a sumaysayaat ti pannakatarustayo iti Kasuratan, ket apektaranna dagiti liriko dagiti kantatayo. (Prov. 4:18) Ti sabali pay a rason ket: Adu kadagiti termino ken sasao a nausar iti pagkantaantayo ti naadaw iti dati nga Ingles nga edision ti Baro a Lubong a Patarus. Masapul a baliwanen dagidiay a liriko tapno maitunos kadagiti termino iti revised edition. Yantangay dakkel met laengen a trabaho ti panangbaliw kadagiti liriko, naikeddeng a manayonan iti sumagmamano a baro a kanta ti pagkantaantayo.
3 Masapul kadi nga urayentayo pay a mayimprenta ti baro a pagkantaan sakbay nga usarentayo dagiti baro a kanta? Saan. Maragsakankami a mangipakaammo a kadagiti sumaganad a bulbulan, maikabilto iti Web site a jw.org ti sumagmamano a baro a kanta. Apaman nga adda mairuar a baro a kanta, makanta dayta iti ngudo ti Gimong ti Serbisio nga addaan iti “baro a kanta.”
4 No Kasano a Sursuruen Dagiti Baro a Kanta: Mabalin a narigat ti agsursuro iti baro a kanta. Ngem kas iti salmista, kayattayo ti agkanta kadagiti gimong ti kongregasion, saan ket nga “agulimek” lattan. (Sal. 30:12) Tapno masursuroyo ti baro a kanta, surotenyo dagitoy a simple nga addang.
Ulit-ulitenyo a denggen ti nairekord a pannakatokar ti kanta, a maikabil iti Web site-tayo. No masansan a denggenyo ti ayugna, nalaklakayo a matandaanan dayta.
Adalenyo dagiti lirikona ken ikagumaanyo nga ikabesa.
Danggayanyo ti musika bayat a kantaenyo dagiti lirikona. Aramidenyo dayta agingga a makabesadoyo ti kanta.
Ensayuenyo dagiti baro a kanta iti sumagmamano a daras bayat ti panagdaydayaw ti pamiliayo agingga a makabesadoyo.
5 No baro a kanta ti nayeskediul a makanta iti ngudo ti Gimong ti Serbisio, denggen nga umuna ti kongregasion ti nairekord a pannakatokarna. Kalpasanna, danggayan ti tallaong ti musika, kas iti ar-aramidentayo kadagiti dadduma a kanta.
6 Panunotem laengen ti ragsaktayo bayat nga agkantatayo a sangsangkamaysa a mangidaydayaw ken ni Jehova kadagiti gimongtayo! Gapuna, iyugaliyo koma ti agtalinaed kadagiti pagtugawanyo no adda kanta a maipakaammo kadagiti Nakristianuan a gimongtayo.
7 Adda sabali pay a pamay-an a maipakitatayo ti apresasiontayo kadagiti sagrado a musikatayo. Kadagiti asamblea ken kombension, adda musika a maipatokar sakbay a mangrugi ti tunggal sesion. Mamindua iti makatawen nga adda dagiti managsakripisio a kakabsat manipud iti uppat a suli ti lubong a situtulok nga aggasto a bukbukodda a mapan iti Patterson, New York, tapno mangpataudda iti makaay-ayo a musika para iti panagdaydayawtayo. Gapuna, no ibaga ti tserman a mapantayon iti pagtugawantayo tapno denggentayo ti naisagana a musika, agtulnogtayo koma. Makatulong daytoy tapno maisagana ti pusotayo kadagiti maidatag nga impormasion.—Esd. 7:10.
8 Iti ngudo ti gimongtayo ita, kantaentayo ti maysa kadagiti baro a kanta a napauluan iti, “Naipasdeken ti Pagarian—Umay Koman!” Daytoy a kanta, a naipakaammo iti nabiit pay a tinawen a miting, ket naputar para iti maika-100 nga anibersario ti pannakaipasngay ti Pagarian.
9 Talaga a “naimbag a banag” manipud ken Jehova dagiti baro a kanta. (Mat. 12:35a) Ikagumaantayo koma a sursuruen dagitoy a baro a kanta ken naimpusuan a kantaentayo ta pakaidayawan ken pakaitan-okan dagita ti Diostayo!—Sal. 147:1.