Usarenyo ti jw.org iti Ministerioyo—“Agbalinka a Gayyem ni Jehova”

Ti seksion a “Pannursuro ti Biblia” iti jw.org ket addaan iti feature a para kadagiti ubbing a maawagan iti “Agbalinka a Gayyem ni Jehova.” Addaan daytoy kadagiti kanta, video, ken aktibidad. (Kaaduan kadagitoy a video ket magun-odan iti Ingles) Inusarmo kadin daytoy iti ministerio? No mangyad-adalka iti Biblia iti maysa a nagannak nga addaan iti ubbing pay nga annak, apay a dimo ipakita daytoy kenkuana? Daytoy ti mabalin a mangtignay kenkuana a mangkita iti dadduma pay a linaon ti Web site-tayo.

Bayat nga agiwarwaras iti Kingdom News No. 38 ti maysa a kabsat a lalaki, adda nakasaritana a babai a dagus a nangbasa iti tract apaman a naawatna dayta. Adda ubbing pay nga annak ti babai nga interesado iti tract. Inlawlawag ti kabsat iti apagbiit dagiti linaon ti tract sa impakitana ti Web address-tayo iti likud ti tract. Gapu ta interesado ti babai, ginundawayan ti kabsat nga impabuya iti babai ken kadagiti annakna ti maysa kadagiti video ni Caleb babaen ti mobile device-na.

Imbaga met ti maysa a kabsat a babai iti katrabahuanna, nga addaan iti ubbing pay nga annak, ti maipapan iti Web site-tayo ken ti impormasion a linaonna maipapan iti pamilia. Kinita ti babai ken dagiti annakna ti jw.org. Di nagbayag, inestoria ti babai iti kabsat a sangkakanta dagiti annakna ti “Ikasabam ti Sao,” a maysa kadagiti kanta iti “Agbalinka a Gayyem ni Jehova.”

Kabesaduem daytoy a feature ti jw.org sa i-download-mo ti maysa kadagiti video, kanta, wenno aktibidad iti mobile device-mo. No aramidem dayta, ammomton nga usaren daytoy a seksion ti jw.org iti ministerio. Talaga a nagpateg daytoy nga alikamen a tumulong kadatayo nga agpaadipen iti Apo!—Ara. 20:19.