Tulonganyo Dagiti Bulsek a Mangam-ammo ken Jehova
1. Kasano nga impakita ni Jesus ti kinaasi kadagiti bulsek?
1 Dandani idin mapapatay ni Jesus. Bayat a pumampanaw iti siudad ti Jerico, impukkaw ti dua a bulsek nga agpalpalama: “Apo, maasianka kadakami!” Nupay mariribukan iti dandanin narigat a pakasuotanna, nagsardeng ni Jesus, inayabanna dagitoy sa pinaimbagna ida. (Mat. 20:29-34) Kasanotay a matulad ti kinaasi ni Jesus kadagiti bulsek?
2. Kasanotay a makasabaan ti maysa a bulsek a makitatayo iti publiko?
2 Sisasagana a Tumulong: No adda makitam a bulsek, nalabit iti publiko, iyam-ammom ti bagim ken ibagam a kayatmo a tulongan. Gapu ta masansan a malukluko dagiti bulsek, mabalin a pagsuspetsaannaka iti damo. Ngem mabalin a tumalged ti riknana no nainggayyemanka ken naimpusuan ti interesmo kenkuana. Laglagipem met nga agduduma ti kinakaro ti kinabulsek ket mabalin a dayta ti pangibatayam iti ipaaymo a tulong. Kalpasan a natulongam, mabalinmo nga ibaga a makiramramanka iti trabaho a panangisuro iti Biblia. Ibagam kenkuana a kayatmo nga ibasa ti maysa a teksto, kas iti Salmo 146:8 wenno Isaias 35:5, 6. No makabasa iti Braille, damagem no kayatna ti maaddaan iti Braille a publikasion a makatulong kenkuana a mangammo iti ad-adu pay maipapan iti Biblia. Mabalinmo met a tulongan a maaddaan kadagiti audio file manipud iti jw.org. No ti kompiuterna ket addaan iti screen reader program a mangbasa iti napigsa kadagiti sasao iti screen, maapresiarna la ketdi dagiti mabalin a mayimprenta nga artikulo iti jw.org agraman dagiti publikasion a mai-download iti RTF (Rich Text Format).—Kitaenyo ti kahon a “No Tulongam ti Bulsek . . .”
3. Kasanotayo a mabirokan dagiti bulsek iti teritoriatayo?
3 Biroken Dagiti Bulsek: Manmano nga adda makasaritatayo a bulsek no mangasabatayo iti binalaybalay gapu ta adu kadakuada ti mabain a makisarita kadagiti bumisita a dida am-ammo. Gapuna, masapul ti panangikagumaan tapno ‘mabirokan’ ken makasabaan ida. (Mat. 10:11) Adda kadi katrabahuam wenno kaeskuelaam a bulsek? Ikagumaam a kasarita. No adda eskuelaan iti teritoriayo para kadagiti bulsek, mangitukon kadagiti Braille a publikasion para iti librariada. Adda kadi am-ammom nga addaan iti bulsek a kapamilia? Adda kadi dagiti organisasion iti teritoriayo a tumultulong kadagiti bulsek wenno dagiti pasilidad nga addaan kadagiti agnanaed a bulsek? Ilawlawagmo iti kapamilia ti bulsek, iti receptionist, wenno iti direktor a dagiti Saksi ni Jehova ket talaga nga interesado a tumulong kadagiti bulsek, ken mangmangted kadagiti Braille a pagbasaan wenno audio recording. Ipakitam kenkuana ti kari ti Biblia a dandanin pukawen ti Dios ti kinabulsek. Mabalinmo met nga ipabuya ti video iti jw.org a napauluan iti “Without It, I Would Feel Lost,” maipapan iti bulsek a lalaki a nagunggonaan ta naaddaan iti Biblia a Braille. No ilawlawagmo ti panggep ti ibibisitam, posible a makasaritamto dagiti bulsek.
4. Ania ti masursurotayo iti kapadasan ni Janet?
4 Maysa a bulsek a kabsat nga agnagan iti Janet ti bimmisita iti pasilidad nga addaan kadagiti residente a bulsek. Nakasaritana ti maysa nga agtutubo a babai a bulsek. Kinuna ni Janet kenkuana: “Pinaimbag ni Jesus dagiti bulsek tapno ipakitana no anianto ti aramidenna iti masanguanan iti amin a bulsek.” Nagsaritaanda ti Apocalipsis 21:3, 4 ken inlawlawag ni Janet no kasano a tungpalento ti Pagarian ti Dios dayta a kari. Napaulimek ti babai sa kinunana: “Ita pay laeng a nakangngegak iti kasta iti maysa a bulsek. Patien ti kaaduan a makakita a tattao a nabulsek ti maysa gapu iti inaramidna wenno dagiti kapuonanna.” Impatulod ni Janet iti e-mail ti babai ti link ti libro nga Isursuro ti Biblia. Ita, agad-adaldan iti Biblia iti mamindua iti kada lawas.
5. Ania dagiti iyegna a bendision ti panangipakitatayo iti interes kadagiti bulsek uray no ditay mapaimbag ida a kas iti inaramid ni Jesus?
5 Siempre, saantayo a kabaelan a paimbagen dagiti bulsek a kas iti inaramid idi ni Jesus. Ngem kabaelantayo a tulongan dagidiay binulsek ni Satanas ti pampanunotda, a pakairamanan dagiti literal a bulsek, tapno maawatanda ti kinapudno iti Sao ti Dios. (2 Cor. 4:4) Pinaimbag ni Jesus ti dua a bulsek iti asideg ti Jerico gapu ta ‘naasian’ kadakuada. (Mat. 20:34) No kasta met ti ipakitatayo nga interes kadagiti bulsek, maaddaantayo iti pribilehio a mangtulong iti sumagmamano a mangam-ammo ken Jehova, daydiay mangpukawto iti agnanayon iti kinabulsek.