1921 100 A Tawenen Ti Napalabas

“ANIA ngarud a trabaho ti segseggaantayo ita a tawen?” Dayta ti saludsod ti Enero 1, 1921 a Watch Tower kadagiti magagaran nga Estudiante ti Biblia. Kas sungbat, kinotarna ti Isaias 61:1, 2, a nangipalagip iti naibilin kadakuada a trabaho a panangasaba. “Dinutokannak ni Jehova a mangipakaammo iti naimbag a damag kadagiti naemma . . . , mangiwaragawag iti tawen ti kinaimbag ni Jehova ken iti aldaw a panagibales ti Diostayo.”

NATUTURED A MANANGASKASABA

Masapul a natured dagiti Estudiante ti Biblia tapno maitungpalda ti trabahoda. Saanda laeng ngamin nga ipakaammo kadagiti naemma ti “naimbag a damag” no di ket masapul nga ipakaammoda met kadagiti managdakdakes ti “aldaw a panagibales.”

Ni Brother J. H. Hoskin, a taga-Canada, ket situtured a nangasaba iti laksid ti ibubusor. Idi rugrugi ti 1921, adda naam-ammona a maysa a ministro dagiti Methodist. Rinugian ni Brother Hoskin ti makisarita babaen ti panangibagana: “Masapul koma a nasayaat ti tungtonganta maipapan iti Biblia, ken no adda man ti saanta a pagtunosan, saanta koma a pagdebatean dayta ken agpinnakadata kas aggayyem.” Ngem saan a kasta ti napasamak. Malagip ni Brother Hoskin: “Mano pay la a minuto nga agtungtungtongkami [iti ministro] idi bigla a dinanogna iti napigsa ti ridaw nga uray la impagarupko a mabuong ti dakkel a sarming ti ridaw.”

“Ti kasaritam ket dagidiay awan relihionna!” impukkaw ti ministro. Saan a nagun-uni ni Brother Hoskin, ngem bayat a pumampanaw, imbagana iti un-unegna, ‘Kasla isuna met ‘diay ibagbagana!’

Kabigatanna, idi nangmisa ti ministro, agkakadakes ti imbagana maipapan ken Brother Hoskin. “Pinadpadakesnak kadagiti miembroda. Imbagana a siak kano ti kauulbodan nga immay iti ilida, isu a masapul a paltogandak,” malagip ni Brother Hoskin. Ngem saan a pulos a nagsanud. Intultuloyna ti nangasaba ket adu ti naginteres. Imbagana: “Dayta pay laeng ti kararagsakan a panangasabak. Kinuna pay ketdi ti dadduma, ‘Ammok a maysaka nga adipen ti Dios!’ ken uray la imbagada a kayatda nga ited ti aniaman a kasapulak.”

PERSONAL KEN SANGAPAMILIAAN A PANAGADAL

Tapno matulongan dagiti interesado a rumang-ay, nangipablaak dagiti Estudiante ti Biblia kadagiti programa a panagadal iti Biblia iti The Golden Age.a Iti programa a Juvenile Bible Study, adda dagiti saludsod nga usaren dagiti nagannak a makisarita kadagiti annakda. “Usaren [dagiti nagannak] dagita a saludsod kadagiti annakda ken tulonganda ida a mangbirok kadagiti sungbat iti Biblia.” Ti dadduma a saludsod kas iti, “Mano ti libro ti Biblia?,” ti nangisuro kadagiti simple a kinapudno maipapan iti Biblia. Ti met dadduma kas iti, “Rumbeng kadi nga ekspektaren ti tunggal pudno a Kristiano ti pannakaidadanes?,” ti nangisagana kadagiti ubbing ken agtutubo nga agbalin a natutured a manangaskasaba.

Iti programa nga Advanced Studies in the Divine Plan of the Ages, adda dagiti mamagpanunot a saludsod para kadagiti Estudiante ti Biblia a nataenganen iti naespirituan. Makita dagiti sungbat iti umuna a tomo ti Studies in the Scriptures. Dakkel ti naitulong dagita a programa iti rinibu nga agbasbasa, ngem impakaammo ti Disiembre 21, 1921 a The Golden Age a maisardengen dagita a programa. Apay?

ADDA BARO A LIBRO!

Ti libro a *The Harp of God*

Bookmark a nakaisuratan ti basaen ti mayad-adalan

Dagiti kard a naglaon iti salsaludsod

Nabigbig dagiti mangidadaulo a dagiti kangrunaan a kinapudno ket masapul a maammuan dagiti kabbaro a mayad-adalan iti Biblia iti sistematiko a pamay-an. Dayta ti rason a nairuar ti libro a The Harp of God idi Nobiembre 1921. Dagiti interesado nga immawat iti libro ket nayenrol met iti The Harp Bible Study Course. Nakatulong dayta tapno maammuan dagiti tattao ti “panggep ti Dios nga ipaayanna dagiti tattao iti biag nga agnanayon.” Kasano?

No adda immawat iti kopia ti libro, makaawat met iti bassit a kard a mangibaga no ania a panid ti basaenna iti libro. Iti sumaruno a lawas, makaawat iti sabali pay a kard nga addaan iti salsaludsod maipapan iti nabasana. Makita met iti dayta a kard dagiti basaenna iti sumaruno a lawas.

Kada lawas iti 12 a lawas, makaawat ti mayad-adalan iti baro a kard nga ikoreo ti klase wenno kongregasion nga asideg iti lugarna. Kaaduanna a ti mangipatulod kadagita a kard ket dagiti nataengan iti kongregasion wenno dagidiay saandan a kabaelan ti agbalaybalay. Kas pagarigan, malagip ni Anna K. Gardner, a taga-Millvale, Pennsylvania, U.S.A.: “Idi nairuar ti The Harp of God, immadu ti mabalin nga aramiden ni manangko a Thayle, nga adda depekto ti pannagnana. Linawas nga ipatpatulodna dagiti kard nga addaan iti salsaludsod.” No nakompleton ti 12 a lawas, adda mangsarungkar iti mayad-adalan tapno tulonganna a mangammo iti ad-adu pay maipapan iti Biblia.

AD-ADU PAY A TRABAHO

Iti ngudo ti tawen, sinuratan ni Brother J. F. Rutherford ti amin a klase wenno kongregasion. Imbagana a “ti pannakaikasaba ti Pagarian ita a tawen ket nasaksaknap ken mas epektibo ngem iti aniaman a napalabas a tawen ti panagani.” Sa innayonna: “Nagadu pay ti masapul nga aramidentayo. Paregtaenyo ti dadduma a makiraman iti daytoy naisangsangayan a serbisio.” Nalawag nga impangag dagiti Estudiante ti Biblia dayta nga imbagana. Idi 1922, situtured nga inwaragawagda ti Pagarian iti ekstraordinario a pamay-an.

Natured a Gagayyem

Impakita dagiti Estudiante ti Biblia ti nainkabsatan nga ayat babaen ti panagtitinnulongda. Naturedda a gagayyem a “mapangnamnamaan no adda rigat,” kas ipakita ti sumaganad a salaysay.—Prov. 17:17.

Idi Martes, Mayo 31, 1921, naibalud ti maysa a nangisit a lalaki iti siudad ti Tulsa, Oklahoma, U.S.A., gapu ta naakusaran a sinaktanna ti maysa a puraw a babai. Kalpasan dayta, naglalaban ti nasurok a 1,000 a puraw a lallaki ken basbassit a grupo dagiti nangisit a lallaki. Simmaknap a dagus dayta iti Greenwood a nangisit ti kaaduan nga umili. Nasurok a 1,400 a balbalay ken negosio ti natakawan ken napuoran. Sigun iti opisial a bilang, 36 ti natay, ngem mabalin a ginasut ti aktual a bilang. Dayta a riot ket naawagan iti Tulsa Race Massacre.

Inyestoria ni Brother Richard J. Hill, a maysa a nangisit nga Estudiante ti Biblia ken residente iti Greenwood: “Idi rabii ti panaglalaban, madama ti panaggigimongmi kas iti gagangay nga ar-aramidenmi. Kalpasan ti gimong, nangngegmi ti panagpipinnaltog iti sentro ti Tulsa. Nagpatpatnag dayta.” Iti agsapa ti Mierkoles, Hunio 1, kimmaro ti situasion. “Immay ti dadduma a kalugaranmi ket imbagada a no kayatmi ti maprotektaran, nasaysayaat no mapankamin a dagus iti Convention Hall.” Isu a ni Brother Hill agraman ni baketna ken ti lima nga annakda ket nagkamang iti Convention Hall ti Tulsa. Agarup 3,000 a nangisit a lallaki ken babbai ti adda sadiay a protprotektaran ti National Guard, a naibaon a mangpasardeng iti panaglalaban.

Iti dayta met la a tiempo, ni Brother Arthur Claus, a maysa a puraw a kabsat ket nangaramid iti desision a mangipakita iti kinaturedna. “Idi nadamagko nga addan idiay Greenwood dagiti aglalaban ken taktakawan ken pupuorandan dagiti balbalay, nagdesisionak a mapanko kitaen ti situasion ti patpatgek a gayyem a ni Brother Hill.”

Ni Arthur Claus a nangusar iti The Harp of God iti panangisurona iti 14 nga ubbing

Apagsangpetna iti balay ni Brother Hill, nakitana ti maysa a puraw a kaarruba a nakaiggem iti rifle. Gayyem met isuna ni Brother Hill, ket impagarupna no maysa ni Arthur kadagiti agra-riot. “Apay nga addaka ditoy?” impukkawna.

“No dina nagustuan ti insungbatko, baka pinaltogannak,” malagip ni Arthur. “Imbagak a gayyemko ni Brother Hill ken namin-adun a nakaumayak iti balayna.” Prinotektaran ni Arthur ken dayta a kaarruba ti balay ni Brother Hill isu a saan a natakawan.

Di nagbayag, naammuan ni Arthur a ni Brother Hill ken ti pamiliana ket adda idiay Convention Hall. Naibaga ken Arthur nga awan ti nangisit a mabalin a pumanaw sadiay agingga nga awan ti bilin a pirmado ti komander a ni General Barrett. Inyestoria ni Arthur: “Saan a kaskarina a makasarita ti General. Idi imbagak dagiti planok, insaludsodna: ‘Protektaramto kadi daytoy a pamilia ken itedmo dagiti kasapulanda?’ Siempre, nagwenak.”

Idi iggemen ni Arthur ti pirmado a bilin, nagdardaras a napan idiay Convention Hall. Impakitana dayta iti maysa nga opisial nga uray la nakigtot a nangibaga: “Ania? Pinirmaan daytoy ni General! Ammom kadi a sika pay laeng ti kaunaan a makairuar iti tao ditoy?” Idi kuan, nabirokanda ni Brother Hill ken ti pamiliana. Naglilinnetletda amin iti lugan ni Arthur ket intulodna ida idiay balayda.

Sinigurado ni Brother Claus a natalged ni Brother Hill ken ti pamiliana. Nagsayaat ti epektona iti sabsabali ti tured ken ayatna kadagiti kapammatianna. Inyestoria ni Arthur: “Ti kaarruba a timmulong a nangprotektar iti balay ni Brother Hill ket naun-unegen ti panagraemna kadagiti agserserbi ken Jehova. Adu pay ti naginteres iti Pagarian gapu ta nakitada nga uray agduduma ti kolor ti kudiltayo, patas ti tratotayo iti maysa ken maysa kas dedikado nga ili ti Dios.”

a Ti The Golden Age ket napanaganan iti Consolation idi 1937 ken Agriingkayo! idi 1946.