Itultuloyyo nga Ikawes “ti Baro a Personalidad” Uray Bautisadokayon

1. Ania ti kangrunaan a mangim-impluensia iti personalidadtayo?

SUMAGMAMANO man nga aldaw wenno adun a tawen a bautisadotayo, kayattayo ti maaddaan iti klase ti personalidad a pagay-ayat ni Jehova. Tapno agbalintayo a kasta, masapul a kontrolentayo ti panagpampanunottayo. Apay? Ngamin, ti panunottayo ti kangrunaan a mangim-impluensia iti personalidadtayo. No kanayon a panunotentayo no kasanotayo a mapagustuan ti bagitayo, makaibaga ken makaaramidtayo kadagiti dakes a banag. (Efe. 4:17-19) Ngem no punnuentayo ti isiptayo iti nasayaat a bambanag, posible nga ad-adda nga agsao ken agtignaytayo iti pamay-an a mangparagsak iti Amatayo, ni Jehova.​—Gal. 5:16.

2. Ania dagiti saludsod nga usigentayo iti daytoy nga artikulo?

² Kas nadakamat iti napalabas nga artikulo, ditay malapdan a sumrek iti isiptayo ti amin a dakes a kapanunotan. Ngem mabalintayo a pilien a saan nga aramiden dagita. Sakbay nga agpabautisartayo, masapul nga insardengtayon ti panagsasao ken ar-aramid a kagura ni Jehova. Dayta ti kaunaan ken kapatgan nga aramidentayo tapno mauksobtayo ti daan a personalidad. Ngem tapno naan-anay a maparagsaktayo ni Jehova, masapul met a surotentayo daytoy a bilin: “Ikawesyo ti baro a personalidad.” (Col. 3:10) Iti daytoy nga artikulo, sungbatantayo dagitoy a saludsod: Ania “ti baro a personalidad”? Kasanotayo a maisuot ti baro a personalidad ken pagtalinaeden dayta?

ANIA “TI BARO A PERSONALIDAD”?

3. Maitunos iti Galacia 5:22, 23, ania “ti baro a personalidad,” ken kasano a maisuot dayta ti maysa a tao iti bagina?

³ “Ti baro a personalidad” ket ti panagpampanunot ken panagtigtignay a mangtulad iti personalidad ni Jehova. Pampaneknekan ti maysa a tao a nakasuot kenkuana ti baro a personalidad no ipakpakitana ti bunga ti espiritu ti Dios, ken ipalpalubosna nga impluensiaan ti nasantuan nga espiritu ti panagpampanunot, rikrikna, ken ar-aramidna. (Basaen ti Galacia 5:22, 23.) Kas pagarigan, ay-ayatenna ni Jehova ken ti ilina. (Mat. 22:36-39) Naragsak latta uray maipasango kadagiti pakasuotan. (Sant. 1:2-4) Isu ket mannakikappia. (Mat. 5:9) Naanus ken naimbag iti padana a tao. (Col. 3:13) Agar-aramid iti nasayaat ta kaay-ayona dayta. (Luc. 6:35) Pampaneknekanna kadagiti aramidna a nabileg ti pammatina iti nailangitan nga Amana. (Sant. 2:18) Uray no adda mangkarit, naalumamay latta ken agteppel no masulisog.​—1 Cor. 9:25, 27; Tito 3:2.

4. Tapno maisuottayo ti baro a personalidad, apay a masapul nga ipakitatayo ti amin a kualidad iti Galacia 5:22, 23 ken iti dadduma pay a teksto?

⁴ Tapno maisuottayo ti baro a personalidad, masapul nga ipakitatayo ti amin a kualidad a nadakamat iti Galacia 5:22, 23 ken iti dadduma pay a teksto.b Dagita a kualidad ket saan a kas iti agduduma a lupot, aruaten, wenno bado a saggaysa nga isuottayo. Kinapudnona, adu kadagita a kualidad ket kapada ti dadduma a kualidad. Kas pagarigan, no talaga met laeng nga ay-ayatem ti padam a tao, naanus ken naimbagka kenkuana. Ken no agpayso a nasayaatka, naalumamay ken managteppelka la ketdi.

KASANOTAYO A MAISUOT TI BARO A PERSONALIDAD?

5. Ania ti kayatna a sawen no “adda kadatayo ti panunot ni Kristo,” ken apay a masapul nga adalentayo ti biag ni Jesus? (1 Corinto 2:16)

⁵ Basaen ti 1 Corinto 2:16. Tapno maisuottayo ti baro a personalidad, masapul nga “adda kadatayo ti panunot ni Kristo.” Kayatna a sawen, masapul a sursuruentayo no kasano ti panagpampanunot ni Jesus sa tuladentayo isuna. Perpekto nga ipakpakita ni Jesus ti bunga ti espiritu ti Dios. Kas iti awan depektona a sarming, siento porsiento nga iyan-anninawna dagiti kualidad ni Jehova. (Heb. 1:3) No ad-adda nga agpanunottayo a kas ken Jesus, ad-adda nga agtignaytayo a kas kenkuana. Ken lallalo met a matuladtayo ti personalidadna.​—Fil. 2:5.

6. Ania dagiti laglagipentayo no isuottayo ti baro a personalidad?

⁶ Talaga kadi a posible a matuladtayo ni Jesus? Baka mapanunottayo: ‘Perpekto ni Jesus. Pulos a diak matulad isuna!’ No kasta ti marikriknam, laglagipem dagitoy. Umuna, naparsuaka a mangtulad kada Jehova ken Jesus. Isu a mabalinmo a pilien a tuladen ida, ken kayam nga aramiden dayta uray kaskasano. (Gen. 1:26) Maikadua, ti nasantuan nga espiritu ti Dios ti kabilgan a puersa iti uniberso. Iti tulong dayta, maaramidam dagiti banag a dimo pulos maaramid a bukbukodmo. Maikatlo, saan nga ekspektaren ni Jehova a perpekto a maipakitam ita ti bunga ti espiritu. Kinapudnona, mangipaay ti naayat nga Amatayo iti 1,000 a tawen kadagidiay addaan iti namnama nga agbiag nga agnanayon ditoy daga tapno agbalinda a perpekto. (Apoc. 20:1-3) Ti kidkiddawen ni Jehova kadatayo ita ket aramidentayo ti kasayaatantayo ken agpatulongtayo kenkuana.

7. Ania itan ti usigentayo?

⁷ Ania dagiti espesipiko a pamay-an a matuladtayo ni Jesus? Usigentayo apagbiit ti uppat nga aspeto ti bunga ti espiritu ti Dios. Iti tunggal aspeto, ammuentayo dagiti masursurotayo iti panangipakita ni Jesus kadagita. Kitaentayo met ti dadduma a saludsod a makatulong tapno mapasayaattayo ti baro a personalidadtayo.

8. Kasano nga impakita ni Jesus ti ayat?

⁸ Ay-ayaten unay ni Jesus ni Jehova isu a nagsakripisio para ken Amana ken para kadatayo. (Juan 14:31; 15:13) Impakita ni Jesus nga ay-ayatenna unay dagiti tattao iti pamay-an ti panagbiagna idi ditoy daga. Iti kada aldaw, naayat ken mannakipagrikna isuna, uray no adda dagiti bimmusor kenkuana. Ti maysa a napateg a pamay-an nga impakitana nga ay-ayatenna dagiti tattao ket idi insurona ida maipapan iti Pagarian ti Dios. (Luc. 4:43, 44) Impakita met ni Jesus ti managsakripisio nga ayatna para iti Dios ken kadagiti tattao idi intulokna a sagabaenna ti naut-ot nga ipapatay iti ima dagiti managbasol. Gapu iti dayta, pinagbalinna a posible para kadatayo amin ti maaddaan iti biag nga agnanayon.

9. Kasanotayo a matulad ti ayat nga impakita ni Jesus?

⁹ Indedikartayo ti bagitayo ken Jehova ken nagpabautisartayo gapu ta ay-ayatentayo ti nailangitan nga Amatayo. Isu a kas ken Jesus, maipakitatayo nga ay-ayatentayo ni Jehova iti pamay-an ti panangtratotayo kadagiti tattao. Insurat ni apostol Juan: “Ti saan nga agayat iti kabsatna a nakitana, saanna a mabalin nga ayaten ti Dios a saanna a nakita.” (1 Juan 4:20) Isaludsodtayo iti bagitayo: ‘Immuneg kadin ti ayatko kadagiti tattao? Mannakipagriknaak kadi uray no awan respetoda kaniak? Gapu iti ayat, us-usarek kadi ti tiempok ken sanikuak a tumulong iti dadduma a mangam-ammo ken Jehova? Aramidek kadi latta dayta uray no saan nga ap-apresiaren ti kaaduan dagiti panagreggetko wenno uray busorendak? Mangpampanunotak kadi kadagiti oportunidad tapno ad-adu ti tiempok iti trabaho a panagaramid iti adalan?’​—Efe. 5:15, 16.

10. Kasano a mannakikappia ni Jesus?

¹⁰ Mannakikappia ni Jesus. Dina sinubadan iti dakes dagiti nagaramid kenkuana iti dakes. Ngem saan la a dayta ti inaramidna. Isu ti nangaramid iti umuna nga addang tapno agkalma dagiti nabara a situasion ken pinaregtana ti dadduma a solbarenda dagiti pagsusupiatanda. Kas pagarigan, insurona kadakuada a masapul a makikappiada iti kabsatda no kayatda nga awaten ni Jehova ti panagdaydayawda. (Mat. 5:9, 23, 24) Maulit-ulit met a tinulonganna dagiti apostolna nga isardengda a pagsusupiatan no asino kadakuada ti katan-okan.​—Luc. 9:46-48; 22:24-27.

11. Kasanotayo nga agbalin a mannakikappia?

¹¹ Tapno agbalintayo a mannakikappia, saantay la a liklikan nga irugi ti aniaman a riri. Datayo koma ti umuna a makikappia ken paregtaentayo dagiti kakabsat a solbarenda dagiti dida pagkikinnaawatan. (Fil. 4:2, 3; Sant. 3:17, 18) Isaludsodtayo dagitoy: ‘Tapno makikappiaak, ania ti sisasagana nga isakripisiok? No napasaktannak ti maysa a kabsat, agipempenak kadi iti sakit ti nakem? Ur-urayek kadi nga isu ti umuna a makikappia, wenno siak ti umuna nga agtignay, uray no kasla isuna ti nangirugi iti problema? No maitutop, iparparegtak kadi kadagiti agririri nga agkakappiada?’

12. Kasano nga impakita ni Jesus ti kinaimbag?

¹² Ni Jesus ket naimbag. (Mat. 11:28-30) Impakitana ti kinaimbag ta naalumamay latta ken nagpabus-oy, uray kadagiti makapaliday a situasion. Kas pagarigan, impakpakaasi idi ti maysa a babai a taga-Fenicia a paimbagen ni Jesus ti anakna. Dina pinatgan ti kiddawna idi damo. Ngem idi impakita ti babai ti dakkel a pammati, pinaimbagna ti anakna. (Mat. 15:22-28) Uray no naimbag ni Jesus, nangted latta iti pammagbaga. No dadduma, impakitana ti kinaimbagna babaen ti panagbalinna a prangka kadagidiay ay-ayatenna. Kas pagarigan, pinadas ni Pedro a lapdan ni Jesus a mangaramid iti pagayatan ni Jehova. Ngem tinubngar ni Jesus iti sango ti dadduma nga adalan. (Mar. 8:32, 33) Inaramidna dayta, saan a tapno mapabainan ni Pedro, no di ket tapno sanayenna. Kayatna met a pakdaaran ti dadduma pay nga adalan, a kas paspasurotna, masapul a dida lapdan a mangaramid iti pagayatan ti Dios, no di ket suportaranda isuna. Sigurado a medio napabainan ni Pedro, ngem nagsayaatanna dayta a disiplina.

13. Kasanotayo nga agbalin a pudpudno a naimbag?

¹³ Tapno agbalinka a pudpudno a naimbag kadagiti ay-ayatem, no dadduma, baka masapul a prangka ti pannakisaritam kadakuada. Tuladem ni Jesus no aramidem dayta ken ibataymo ti balakadmo kadagiti prinsipio ti Sao ti Dios. Agbalinka a naalumamay. Agtalekka a kayatda nga aramiden ti umiso ken patiem a dagiti mangay-ayat kenka ken nangnangruna ken Jehova ipangagdanto ti nadungngo a balakadmo. Isaludsodmo iti bagim: ‘Naturedak kadi a makisarita iti ipatpategko no makitak nga adda dakes nga ar-aramidenna? No masapul a balakadak, naimbag kadi wenno nasakit ti panangibagak? Ania ti motibok a mangbalakad? Balakadak kadi gapu ta masuronak, wenno kayatko laeng a tulongan?’

14. Kasano nga ipakpakita ni Jesus ti kinasayaat?

¹⁴ Saan laeng nga ammo ni Jesus no ania ti nasayaat. Ar-aramidenna pay dayta. Ay-ayaten ni Jesus ni Amana, isu a kanayon nga ar-aramidenna ti umiso ken nasayaat ti motibona. Ti nasayaat a tao kanayon nga agbirbirok kadagiti pamay-an tapno matulonganna ti dadduma ken nasayaat ti ar-aramidenna para kadakuada. Saan nga umdas nga ammotayo no ania ti umiso nga aramidentayo; masapul nga aramidentayo ti umiso ken nasayaat ti motibotayo. Mabalin a maisaludsodtayo, ‘Posible kadi nga aramidem ti umiso ngem dakes ti motibom?’ Wen. Kas pagarigan, dinakamat ni Jesus dagidiay mangmangted iti limos kadagiti napanglaw ngem sigsiguraduenda a maammuan dayta ti dadduma tapno mapadayawanda. Saan a maragsakan ni Jehova kadagita a kasla nasayaat nga aramid.​—Mat. 6:1-4.

15. Kasanotayo nga agbalin a pudpudno a nasayaat?

¹⁵ Satay la agbalin a pudpudno a nasayaat no aramidentayo ti umiso, saan a para iti bukodtayo a pagimbagan. Mabalinmo nga isaludsod iti bagim: ‘Ammok kadi no ania ti umiso ken ar-aramidek dayta? Ania ti motibok nga agaramid iti nasayaat?’

KASANOTAYO A MAPROTEKTARAN TI BARO A PERSONALIDADTAYO?

16. Ania ti masapul nga inaldaw nga aramidentayo, ken apay?

¹⁶ Ditay koma panunoten a no nabautisarantayon, naisuottayon ti baro a personalidad. Masapul a kanayon a protektarantayo ti baro a personalidadtayo a kas iti napintas a “baro a bado.” Ti maysa a pamay-an ket inaldaw a panunotentayo no kasanotayo a maipakita ti bunga ti espiritu ti Dios. Apay? Gapu ta ni Jehova ket aktibo a Dios, ken ti espirituna ket aktibo a puersa. (Gen. 1:2) Isu a tunggal aspeto ti bunga ti espiritu mabalin ken masapul a tignayennatayo nga agbalin nga aktibo. Kas pagarigan, insurat ni adalan a Santiago: “Natay . . . ti pammati nga awanan aramid.” (Sant. 2:26) Kasta met laeng no maipapan iti amin a dadduma pay nga aspeto ti bunga ti espiritu ti Dios. Kada ipakitatayo dagita, pampaneknekantayo nga aktibo kadatayo ti espiritu ti Dios.

17. Ania koma ti reaksiontayo no saantayo a maipakita ti bunga ti espiritu?

¹⁷ Uray dagiti Kristiano a bautisadon iti adu a tawen, saanda a maipakita no dadduma ti bunga ti espiritu. Ngem ti napateg ket saantayo a sumuksuko. Usigentayo daytoy nga ilustrasion. No napigismo ti paboritom a bado, ibellengmo kadi a dagus? Saan. Posible unay a tarimaanem ti nadadael a pasetna no mabalin pay. Ken naan-annadkanton kalpasanna. Kasta met, no adda tiempo a saanmo a naipakita ti kinaimbag, kinaanus, wenno ayat iti maysa a tao, dika maupay. Dumawatka iti naimpusuan a pammakawan tapno matarimaan ti nadadael ket maisubli ti nasayaat a relasionmo kenkuana. Determinadoka koma a mangaramid iti nasaysayaat iti masanguanan.

18. Ania ti masiguradotayo?

¹⁸ Imbag laengen ta adda ni Jesus nga ulidantayo! No ad-adda a tuladentayo ti panagpampanunot ken kababalinna, nalaklakatayo a matulad ti panagtigtignayna. No ad-adda a tuladentayo ni Jesus, nalaklakatayo nga isuot ti baro a personalidad. Inusigtayo iti daytoy nga artikulo ti uppat laeng kadagiti aspeto ti bunga ti espiritu ti Dios. Nasayaat no mangyeskediulka iti tiempo a mangadal iti dadduma nga aspeto ti bunga ti espiritu. Panunotem met no kanayon a maipakpakitam dagita. Makitam ti listaan dagiti artikulo iti dayta a topiko iti Giya iti Panagsukimat Para Kadagiti Saksi ni Jehova iti suheto a “Nakristianuan a Panagbiag” sa iti “Bunga ti Espiritu.” Masiguradom a no ikagumaam nga isuot ti baro a personalidad ken pagtalinaedem dayta, tulongannaka ni Jehova.