Itultuloyyo ti “Agpipinnabileg”

1. Sigun iti 1 Tesalonica 5:11, ania a trabaho ti pakiramramanantayo amin?

NAPADASAN kadin ti kongregasionyo ti nagibangon wenno nag-renovate iti Kingdom Hall? No wen, sigurado a malagipyo ti damo a panaggigimongyo sadiay. Permi ti yamanyo ken Jehova. Baka nakaluakayo ken medio narigatankayo pay ketdi a nakidanggay iti panglukat a kanta gapu iti kasta la unay a ragsakyo. Pakaidayawan ni Jehova dagiti nagpipintas a Kingdom Hall-tayo. Ngem ad-adda a maidaydayawtayo isuna no makipasettayo iti sabali pay a kita ti panagibangon. Napatpateg dayta ngem iti panagibangon kadagiti literal a pasdek. Ngamin, karaman iti dayta ti panangpabileg kadagiti makigimong kadagita a lugar a pagdaydayawan. Ni apostol Pablo ti nangisurat iti pannakatema a tekstotayo iti 1 Tesalonica 5:11. (Basaen.) Ninamnamana a makipaset dagiti Kristiano iti kasta a “proyekto a panagibangon” ta mabalin met nga “agibangon” ti kaipapanan ti Griego a sao a naipatarus kas “agpipinnabileg.”

2. Ania ti pagsasaritaantayo iti daytoy nga artikulo?

² Nagsayaat nga ulidan ni apostol Pablo iti panangpabileg kadagiti kakabsat. Adda empatiana kadakuada. Iti daytoy nga artikulo, usigentayo no kasano a tinulonganna dagiti kakabsat a (1) mangibtur kadagiti suot, (2) pagtalinaeden ti talna, ken (3) mangpabileg iti pammatida ken Jehova. Kitaentayo no kasanotayo a matulad ni Pablo tapno mapabilegtayo met ita dagiti kakabsat.​—1 Cor. 11:1.

TINULONGAN NI PABLO DAGITI KAPAMMATIANNA A MANGIBTUR KADAGITI SUOT

3. Ania ti balanse a panangmatmat ni Pablo?

³ Ay-ayaten unay ni Pablo dagiti kakabsat. Napadasanna dagiti narigat a situasion. Isu nga ammona no kasano nga ipakita ti pannakipagrikna ken empatia kadagiti kapammatianna a maipaspasango kadagiti suot. Adda idi tiempo a naibusan ni Pablo iti kuarta, isu a masapul nga agbirok iti trabaho tapno adda pangsuportana iti bagina ken kadagiti kakaduana. (Ara. 20:34) Panagaramid iti tolda ti nagbalin a pagsapulanna. Idi simmangpet idiay Corinto, nakikadua kada Aquila ken Priscila nga agaramid iti tolda. Ngem “tunggal sabbath,” kasabaanna dagiti Judio ken Griego. Idi addan da Silas ken Timoteo, “impamaysa ni Pablo nga ikasaba ti sao ti Dios.” (Ara. 18:2-5) Kanayon a nakasentro ti panunot ni Pablo iti kapatgan iti biagna​—ti panagserbina ken Jehova. Nakagaggaget ni Pablo isu nga epektibo ti panangparegtana kadagiti kakabsat. Impalagipna a dida ipalubos a dagiti pakarigatan iti biag ken ti responsabilidadda a mangsustento iti pamiliada ti rason a mabaybay-andan “ti napatpateg a bambanag”​—ti amin nga aspeto iti panagdaydayaw ken Jehova.​—Fil. 1:10.

4. Kasano a tinulongan da Pablo ken Timoteo dagiti kapammatianda a mangsango iti pannakaidadanes?

⁴ Di nagbayag kalpasan a nabuangay ti kongregasion idiay Tesalonica, naipasango dagiti kabbaro a Kristiano iti nakaro nga ibubusor. Idi a ti maysa a grupo dagiti manangriribuk ken bumusbusor saanda a mabirokan da Pablo ken Silas, ginuyodda “ti dadduma a kakabsat ket impanda kadagiti agtuturay ti siudad,” nga ipukpukkawda: “Suksukiren amin dagitoy a tattao dagiti bilin ni Cesar.” (Ara. 17:6, 7) Maimadyinyo kadi ti buteng dagiti kabbaro a Kristiano idi naammuanda nga isuda metten ti puntiria dagiti tattao iti siudad? Posible a bumaaw ti regtada nga agserbi ken Jehova. Ngem saan a kayat ni Pablo a mapasamak dayta. Uray no masapul a pumanaw da Pablo ken Silas, siniguradoda a maaywanan a naimbag ti kabubuangay a kongregasion. Impalagip ni Pablo kadagiti taga-Tesalonica: “Imbaonmi ni Timoteo a kabsattayo . . . , tapno patibkeren ken liwliwaennakayo ket bumileg ti pammatiyo. Iti kasta, awan koma kadakayo ti kumapuy gapu kadagitoy a rigat.” (1 Tes. 3:2, 3) Posible unay a napadasan ni Timoteo ti maidadanes iti ilina a Listra. Nakitana no kasano a pinaregta ni Pablo dagiti kakabsat sadiay. Gapu ta nakita ni Timoteo no kasano a tinulongan ida ni Jehova, naipasiguradona kadagiti kabbaro a kapammatianna a sumayaatto met laeng ti kasasaadda.​—Ara. 14:8, 19-22; Heb. 12:2.

5. Kasano a nagsayaatan ti kabsat a ni Bryant ti tulong ti maysa a panglakayen?

⁵ Iti ania pay a pamay-an a pinabileg ni Pablo dagiti kapammatianna? Idi nagsubli da Pablo ken Bernabe idiay Listra, Iconio, ken Antioquia, “nangdutokda . . . kadagiti panglakayen iti tunggal kongregasion.” (Ara. 14:21-23) Sigurado a dagidiay a panglakayen ket gubuayan iti liwliwa iti kongregasion, kas kadagiti panglakayen ita. Kitaentayo ti imbaga ti maysa a kabsat a ni Bryant: “Idi 15 ti tawenko,” imbagana, “pinanawannakami ni Tatang sa nailaksid met ni Nanang. Naupayak ken nariknak a nabaybay-anak.” Ania ti nakatulong ken Bryant nga agibtur? Imbagana: “Kada gimong ken iti dadduma pay a gundaway, kasarsaritanak ti maysa a panglakayen nga agnagan iti Tony. Imbagana ti maipapan kadagidiay naipasango iti suot ngem naragsakda latta. Impabasana kaniak ti Salmo 27:10 ken inyes-estoriana ti maipapan ken Ezekias, a nagserbi a simamatalek uray no saan a nasayaat nga ulidan ni tatangna.” Kasano a nakatulong dayta ken Bryant? “Gapu iti ayat ken pammaregta dayta a panglakayen,” kuna ni Bryant, “nagpayunirak ket talaga a nagbalin a makapnek ti biagko.” Papanglakayen, alertokayo koma a tumulong kadagidiay kas ken Bryant a mabalin nga agkasapulan iti “naimbag a sao” ken pammaregta.​—Prov. 12:25.

6. Kasano nga inusar ni Pablo dagiti kapadasan ti dadduma tapno maparegtana dagiti kakabsat?

⁶ Impalagip ni Pablo kadagiti kapammatianna nga iti tulong ni Jehova, naibturan “dagiti saksi a kas iti napuskol nga ulep” ti adu a rigat. (Heb. 12:1) Ammo ni Pablo a ti kapadasan dagidiay nakapagibtur iti amin a klase ti rigat ti mangpatured kadagiti kapammatianna ken makatulong kadakuada nga agpokus iti “siudad ti sibibiag a Dios.” (Heb. 12:22) Kasta met la ita. Asino koma ti saan a maparegta no mabasana no kasano a tinulongan ni Jehova da Gideon, Barak, David, Samuel, ken dadduma pay? (Heb. 11:32-35) Dagiti ngay met mapagulidanan ti pammatida a kakabsat iti kaaldawantayo? Masansan a makaaw-awat ti sangalubongan a hedkuarter kadagiti surat manipud kadagiti kakabsat a napabileg ti pammatida idi nabasada ti pakasaritaan ti biag ti maysa a matalek nga adipen ni Jehova iti kaaldawantayo.

INSURO NI PABLO NO KASANO A PAGTALINAEDEN DAGITI KAKABSAT TI TALNA

7. Ania ti masursurom iti balakad ni Pablo iti Roma 14:19-21?

⁷ Pabpabilgentayo dagiti kakabsat no kanayon a tumulongtayo a mamagtalinaed iti talna ti kongregasion. Ditay ipalubos a ti panagduduma ti opiniontayo ti mangdadael iti panagkaykaysatayo. Ditay met ipilit dagiti kalintegantayo no la ket ta awan ti masalungasing a prinsipio ti Biblia. Usigentayo ti maysa a pagarigan. Ti kongregasion idi iti Roma ket buklen dagiti Judio ken Gentil a Kristiano. Idi nawaswasen ti Mosaiko a Linteg, saanen a sursuroten dagiti agdaydayaw ken Jehova dagiti linteg a mangiparit iti dadduma a taraon. (Mar. 7:19) Manipud idin, narikna ti dadduma a Judio a Kristiano a mabalindan a kanen ti amin a kita ti taraon. Ngem para iti dadduma a Judio a Kristiano, saan nga umiso ti ar-aramidenda. Gapu iti dayta nga isyu, saanen nga agkaykaysa ti kongregasion. Impaganetget ni Pablo ti kinapateg ti panagtalinaed ti talna. Isu nga imbagana: “Ti kasayaatan ket ti saan a pannangan iti karne wenno iyiinum iti arak wenno panangaramid iti aniaman a pakaitibkolan ti kabsatmo.” (Basaen ti Roma 14:19-21.) Impaawat ngarud ni Pablo kadagiti kapammatianna a dagiti di panagkikinnaawatan ket dakes ti epektoda iti tunggal maysa ken iti intero a kongregasion. Situtulok met ni Pablo a nangbalbaliw iti kababalinna tapno awan ti maitibkolna. (1 Cor. 9:19-22) Mapabilegtayo met ti dadduma ken mapagtalinaedtayo ti talna no ditay ipilit ti kaykayattayo.

8. Ania ti inaramid ni Pablo idi adda timmaud a napateg nga isyu a posible a mangdadael iti talna ti kongregasion?

⁸ Nagsayaat ti inyulidan ni Pablo iti panangtaginayon iti talna kadagidiay saan nga agkakatunosan maipapan kadagiti napateg nga isyu. Kas pagarigan, impapilit ti dadduma iti kongregasion Kristiano idi umuna a siglo nga agpakugit dagiti Gentil a nagbalin a Kristiano. Mabalin a tapno saan ida a kuestionaran dagiti Judio. (Gal. 6:12) Saan nga immanamong ni Pablo iti dayta a kapanunotan. Ngem imbes nga ipapilitna ti opinionna, sipapakumbaba a nagpabalakad kadagiti apostol ken panglakayen idiay Jerusalem. (Ara. 15:1, 2) Gapu ta kasta ti inaramid ni Pablo, nagtalinaed ti ragsak ken talna ti kongregasion.​—Ara. 15:30, 31.

9. Kasanotayo a matulad ti ulidan ni Pablo?

⁹ No adda tumaud a nakaro a di panagkikinnaawatan, masapul a pagtalinaedentayo ti talna. Kasano? Agpabalakadtayo kadagidiay inapointaran ni Jehova a mangaywan iti kongregasion. Masansan a dagiti instruksion a naibatay iti Biblia ket masarakan kadagiti publikasiontayo wenno kadagiti pagannurotan a naggapu iti organisasion. No surotentayo dagita nga instruksion, imbes nga ipapilittayo dagiti personal nga opiniontayo, tumultulongtayo tapno agtalinaed ti talna ti kongregasion.

10. Ania pay ti inaramid ni Pablo tapno agtalinaed ti talna ti kongregasion?

¹⁰ Napagtalinaed ni Pablo ti talna ti kongregasion babaen ti panangdakamatna kadagiti nasayaat a kualidad dagiti kakabsat, saan a dagiti naalas nga ugalida. Kas pagarigan, iti maudi a paset ti surat ni Pablo kadagiti taga-Roma, adu ti innagananna a kakabsat. Kinomendaranna met ti kaaduan kadakuada wenno nangibaga iti personal a detalye maipapan kadakuada. Matuladtayo ni Pablo no kanayon nga ibagatayo dagiti nasayaat a kualidad dagiti kakabsat. No aramidentayo dayta, makatulongtayo tapno nasingsinged ti panaggagayyem ken naun-uneg ti panagiinnayat dagiti kakabsat iti kongregasion.

11. Kasanotayo a maisubli ti talna no adda tumaud a di panagkikinnaawatan?

¹¹ No dadduma, mabalin a di agkinnaawatan wenno agsupiat pay ketdi uray dagiti Kristiano a nataengan iti naespirituan. Napasamak dayta ken Pablo ken iti nadekket a gayyemna a ni Bernabe. Saanda a nagkatunosan no ikuyogda ni Marcos wenno saan iti sumaruno a panagmisioneroda. “Nakaro ti saanda a panagkinnaawatan” isu a nagsinada. (Ara. 15:37-39) Ngem insubli da Pablo, Bernabe, ken Marcos ti natalna a relasionda. Ipakita dayta a napateg kadakuada ti talna ken panagkaykaysa ti kongregasion. Idi agangay, nasayaat pay ketdi dagiti imbaga ni Pablo maipapan kada Bernabe ken Marcos. (1 Cor. 9:6; Col. 4:10) Masapul met a solbarentayo dagiti ditay panagkikinnaawatan kadagiti kakongregasiontayo ken itultuloytayo a kitaen dagiti nasayaat a kualidadda. No kasta ti aramidentayo, mapagtalinaedtayo ti talna ken panagkaykaysa.​—Efe. 4:3.

PINABILEG NI PABLO TI PAMMATI DAGITI KAPAMMATIANNA

12. Ania ti dadduma a pannubok a mapaspasaran dagiti kakabsat?

¹² Mapabilegtayo dagiti kapammatiantayo no patibkerentayo ti pammatida ken Jehova. Ti dadduma ket uy-uyawen dagiti saan a Saksi a kapamiliada, katrabahuan, wenno kaeskuelaanda. Adda met dagidiay nakaro ti sakitda wenno marigatanda a mangiliwliwag iti nasaktan a riknada. Adu metten a tawen a Saksi ti dadduma ken nabayagen nga ur-urayenda ti panagpatingga daytoy a sistema ti bambanag. Mabalin a dagita ti mangsubok iti pammati dagiti Kristiano ita. Kasta met laeng ti napadasan dagiti kakabsat iti kongregasion idi umuna a siglo. Ania ti inaramid ni Pablo tapno mapabilegna dagiti kapammatianna?

13. Ania ti inaramid ni Pablo tapno matulonganna dagidiay mauy-uyaw gapu iti patpatienda?

¹³ Inusar ni Pablo ti Kasuratan tapno pabilgenna ti pammati dagiti kapammatianna. Kas pagarigan, baka saan idi nga ammo dagiti Judio a Kristiano ti isungbatda kadagiti dida kapammatian a kapamiliada a mangibagbaga a nasaysayaat kano ti Judaismo ngem iti panagbalin a Kristiano. Sigurado a napabileg dagidi a Kristiano iti surat ni Pablo kadagiti Hebreo. (Heb. 1:5, 6; 2:2, 3; 9:24, 25) Mabalinda nga usaren dagiti narigat a makontra a panagrasrasonna a mangpaulimek kadagiti bumusbusor kadakuada. Ita, matulongantayo met dagiti kapammatiantayo a mauy-uyaw no usarentayo dagiti publikasiontayo a naibatay iti Biblia a mangilawlawag no apay nga umiso dagiti patpatientayo. No met makantiawan dagiti kapammatiantayo nga ubbing wenno agtutubo gapu ta mamatida nga adda Namarsua, matulongantayo ida nga agbirok iti impormasion kadagiti broshur a Naparsua Kadi ti Biag? ken The Origin of Life—Five Questions Worth Asking. Mausarda dagita tapno ipakitada no apay a mamatida nga adda Namarsua iti biag.

14. Uray okupado ni Pablo a mangasaba ken mangisuro, ania latta dagiti inaramidna?

¹⁴ Pinaregta ni Pablo dagiti kapammatianna nga ipakitada ti ayatda babaen ti “nasayaat nga ar-aramid.” (Heb. 10:24) Tinulonganna dagiti kapammatianna saan laeng nga iti sao no di pay ket iti aramid. Kas pagarigan, idi naapektaran iti nakaro a bisin dagiti Kristiano idiay Judea, timmulong ni Pablo a mangiwaras iti ayuda kadakuada. (Ara. 11:27-30) Kinapudnona, uray okupado ni Pablo a mangasaba ken mangisuro, kanayon a nangpanunot kadagiti pamay-an tapno matulonganna dagidiay agkasapulan iti material. (Gal. 2:10) Gapu iti dayta, napabilegna ti kompiansa dagiti kapammatianna nga aywanan ida ni Jehova. Ita, no usarentayo ti tiempo, pigsa, ken abilidadtayo a mangsaranay kadagiti nadidigra, mapabilegtayo met ti pammati dagiti kakabsat. Kasta met laeng no regular nga agdonartayo para iti sangalubongan a trabaho. Kadagita ken iti dadduma pay a pamay-an, matulongantayo dagiti kakabsat nga agtalek a pulos a saan ida a baybay-an ni Jehova.

15-16. Kasano koma ti panangtratotayo kadagidiay kimmapuy ti pammatida?

¹⁵ Saan a nauma ni Pablo a nangpabileg kadagidiay kimmapuy ti pammatida. Naasian kadakuada isu a kinasaritana ida iti nasingpet ken positibo a pamay-an. (Heb. 6:9; 10:39) Kas pagarigan, iti intero a suratna kadagiti Hebreo, masansan nga insilpona ti “tayo” kadagiti imbagana tapno ipakitana a masapul met nga aramidenna dagiti ibalbalakadna. (Heb. 2:1, 3) Kas ken Pablo, ditay met koma mauma a mangpabileg kadagidiay kimmapuy ti pammatida. Ipakitatayo ketdi a talaga a maseknantayo kadakuada tapno mapabilegtayo ida. Iti kasta, maipariknatayo nga ay-ayatentayo ida. No nasingpet ken naalumamay ti tono ti bosestayo a makisarita, lallalo a mapabilegtayo ida.

¹⁶ Impasigurado ni Pablo kadagiti kapammatianna a makitkita ni Jehova dagiti nasayaat nga aramidda. (Heb. 10:32-34) Maaramidtayo met dayta no tultulongantayo ti maysa a kabsat a kimmapuy ti pammatina. Mabalin nga ipayestoriatayo no kasano a naammuanna ti kinapudno wenno paregtaentayo a lagipenna dagiti tiempo a nariknana ti tulong ni Jehova. Gundawaytayo dayta nga ipasigurado a saan a nalipatan ni Jehova dagiti inaramidna a mangipakita iti ayatna kenkuana ken saanto a baybay-an ni Jehova iti masanguanan. (Heb. 6:10; 13:5, 6) Dagita a saritaan ti mabalin a mangparegta manen kadagita nga ipatpategtayo a kakabsat tapno itultuloyda ti agserbi iti Diostayo.

“ITULTULOYYO TI AGPIPINNAREGTA”

17. Ania pay dagiti abilidad nga itultuloytayo nga asaen?

¹⁷ No kasano a lumaing ti maysa a trabahador iti konstruksion iti panaglabas dagiti aldaw, maasatayo met ti abilidadtayo a mangpabileg iti sabsabali. Matulongantayo ti dadduma nga agibtur iti suot no iyestoriatayo kadakuada ti ulidan dagidiay nakapagibtur. Mapagtalinaedtayo ti talna no kanayon a dakamatentayo dagiti nasayaat a kualidad dagiti kakabsat. Mataginayontayo ti talna no tumaud dagiti situasion a posible a mangdadael iti dayta ken maisublitayo ti talna no tumaud dagiti di panagkikinnaawatan. Maitultuloytayo met a pabilgen ti pammati dagiti kakabsat no iranudtayo kadakuada dagiti napateg a kinapudno iti Biblia, no ipaayantayo ida iti praktikal a tulong, ken no tulongantayo ti asinoman a kimmapuy ti espiritualidadna.

18. Ania ti determinasionmo?

¹⁸ Naragsak ken kontento dagidiay agtrabtrabaho kadagiti proyekto a panagibangon kadagiti pasilidad ti organisasion. Agbalintayo a naragsak ken kontento no makiramantayo iti panangpabileg iti pammati dagiti kakabsat. Saan a kas kadagiti literal a pasdek nga agrakaya wenno madadael, agnanayon dagiti resulta dayta a trabahotayo! Determinadotayo koma nga ‘agtultuloy nga agpipinnaregta ken agpipinnabileg.’​—1 Tes. 5:11.