Tulongantayo ti Sabsabali a Mangibtur Kadagiti Rigat

1. Kasano ti masansan a panangsungbat ni Jehova kadagiti kararag dagiti adipenna?

AMMOM kadi a mabalinnaka nga usaren ni Jehova tapno masungbatan ti napasnek a kararag ti maysa nga adipenna? Adda maitulongmo, maysaka man a panglakayen, ministerial nga adipen, payunir, wenno agibumbunannag. Adda met maitulongmo, maysaka man nga ubing wenno nataengan wenno maysaka man a lalaki wenno babai. No ti maysa a mangay-ayat ken Jehova a Dios ket agpatulong kenkuana, masansan nga us-usarenna dagiti panglakayen ken ti dadduma pay a matalek nga adipenna tapno ‘mangted iti kasta unay a liwliwa’ iti dayta a tao. (Col. 4:11) Maragsakantayo unay nga agserbi ken Jehova ken kadagiti kakabsat iti kasta a pamay-an! Mabalintay nga aramiden dayta no adda agwarwaras a sakit, didigra, wenno pannakaidadanes.

TUMULONG NO ADDA AGWARWARAS A SAKIT

2. Apay a mabalin a narigat ti tumulong no adda agwarwaras a sakit?

² No adda agwarwaras a sakit, mabalin a narigat ti agtitinnulong. Kas pagarigan, baka kayattayo a bisitaen dagiti gagayyemtayo, ngem delikado dayta. Mabalin a kayattayo nga awisen iti pannangan dagidiay bassit ti makukuartana, ngem saan met la a posible dayta. Nalabit kayattayo a tulongan ti dadduma, ngem mabalin a narigat dayta no masakit wenno agsagsagaba iti pinansial dagiti mismo a kapamiliatayo. Ngem kayattayo latta ti tumulong kadagiti kakabsat, ket maragsakan ni Jehova no aramidentayo ti kayatayo. (Prov. 3:27; 19:17) Ania dagiti mabalintayo nga aramiden?

3. Ania ti masursurotayo iti ulidan dagiti panglakayen iti kongregasion da Desi? (Jeremias 23:4)

³ Ti mabalin nga aramiden dagiti panglakayen. No maysaka a panglakayen, am-ammuem a naimbag dagiti karnero. (Basaen ti Jeremias 23:4.) Imbaga ti sister a ni Desi a nadakamat iti napalabas nga artikulo: “Iti ministerio ken iti dadduma pay nga aktibidad, dagiti panglakayen iti grupomi iti panangasaba ket kanayon a makikadua kaniak ken iti dadduma pay a kakabsat.”b Gapu kadagita a panagregget dagita a pastor, nalaklakada a natulongan ni Desi idi agwarwarasen ti COVID-19 pandemic a nakatayan ti dadduma a kapamiliana.

4. Apay a natulongan dagiti panglakayen ni Desi, ken ania ti masursurotayo?

⁴ Inlawlawag ni Desi: “Gagayyemkon dagiti panglakayen, isu a nalaklakak nga imbaga kadakuada dagiti marikriknak ken pakaseknak.” Ania ti masursuro dagiti panglakayen? Ipastoranyo dagiti adda iti aywanyo sakbay nga adda krisis. Gayyemenyo ida. No diyo ida personal a masarungkaran ta adda agwarwaras a sakit, kontakenyo ida iti sabali a pamay-an. “Adda dagiti oras a tinawagan wenno tineksandak ti agduduma a panglakayen iti isu met la nga aldaw,” imbaga ni Desi. “Nabang-aranak kadagiti inranudda a teksto, uray no kabesadokon dagita.”

5. Kasano a maammuan dagiti panglakayen ti kasapulan dagiti kakabsat tapno matulonganda ida?

⁵ Ti maysa a pamay-an a maammuanyo no ania ti kasapulan dagiti kakabsat ket sitataktika a saludsodanyo ida. (Prov. 20:5) Adda kadi umdas a kanen, agas, ken dadduma a masapsapulda? Posible ngata a masesanteda iti trabahoda wenno mapapanawda iti pagnanaedanda? Kasapulanda kadi ti mangasistir kadakuada no agaplayda iti tulong ti gobierno? Nakaawat ni Desi iti material a tulong manipud kadagiti kapammatianna. Ngem ti emosional ken naespirituan a tulong dagiti panglakayen ti nangnangruna a nakatulong tapno maibturanna dagiti pakarigatanna. Imbagana: “Inkararagandak dagiti panglakayen. Diak malagipen dagiti eksakto nga imbagada. Ngem diak malipatan ti nariknak idi. Kas man la ibagbaga kaniak ni Jehova, ‘Saanka nga agmaymaysa.’”​—Isa. 41:10, 13.

6. Ania ti mabalin nga aramiden ti adu a kakabsat tapno matulonganda ti dadduma? (Kitaen ti ladawan.)

⁶ Ti mabalin nga aramiden ti dadduma. Nainkalintegan laeng nga ekspektarentayo a dagiti panglakayen ti mangidaulo. Ngem aw-awisennatayo amin ni Jehova nga agpipinnaregta ken agtitinnulong. (Gal. 6:10) Uray no bassit laeng ti maitulongtayo iti maysa a masakit, mabalin a dakkelen a pammaregta dayta kenkuana. Ti maysa nga ubing ket mabalin a mangipatulod iti kard wenno drowing tapno maparegtana ti maysa a brother. Ti maysa nga agtutubo ket mabalin a tumulong iti maysa a sister wenno makipalengke para kenkuana. No adda masakit, mabalinmo kadi nga ilutuan sa itulodmo iti balayna iti natalged a pamay-an? Siempre, no adda agwarwaras a sakit, kasapulan ti intero a kongregasion ti pammaregta. Kalpasan dagiti gimong, baka mabalin a ditay agapura a pumanaw tapno makomustatayo dagiti kakabsat iti man personal wenno iti videoconferencing. Kasapulan met dagiti panglakayen ti pammaregta. Adda dagiti kakabsat a nangipatulod iti surat wenno kard kadagiti panglakayen tapno agyamanda kadakuada. Masansan ngamin a nagadu ti ar-aramiden ken as-asikasuenda no adda agwarwaras a sakit. Talaga a nagsayaat no aramidentayo ti pasettayo ket ‘itultuloytayo ti agpipinnaregta ken agpipinnabileg’!​—1 Tes. 5:11.

TUMULONG KADAGITI BIKTIMA TI DIDIGRA

7. Ania dagiti mabalin a mapasamak kalpasan ti didigra?

⁷ No adda didigra, mabalin a kellaat nga agbaliw ti biag ti maysa a tao. Dagiti biktima mabalin a mapukawda dagiti sanikuada, balay, wenno uray dagiti ipatpategda iti biag. Mapasamak met kadagiti kakabsat dagiti kasta a nagkas-ang a trahedia. Ania dagiti mabalintayo nga aramiden tapno matulongantayo ida?

8. Ania dagiti mabalin nga aramiden dagiti panglakayen ken ulo ti pamilia sakbay nga adda dumteng a didigra?

⁸ Ti mabalin nga aramiden dagiti panglakayen. Papanglakayen, tulonganyo dagiti kakabsat nga agsagana sakbay nga adda dumteng a didigra. Siguraduenyo nga ammo ti amin a kakabsat iti kongregasion dagiti masapul nga aramidenda tapno kanayon a natalgedda ken makontakda dagiti panglakayen. Imbaga ni Margaret a nadakamat iti napalabas nga artikulo: “Iti lokal a kasapulan a paset ti gimongmi, impakdaar dagiti panglakayenmi a tiempo pay laeng a posible nga adda mapasamak nga uram iti kakaykaywan. Imbagada a no ibilin dagiti autoridad nga agbakuitkamin wenno no delikadon ti kasasaad, masapul a pumanawkamin a dagus.” Naintiempuan unay daydi nga impormasion ta kalpasan laeng ti lima a lawas, napasamak ti grabe nga uram iti kakaykaywan. Bayat ti panagdaydayaw ti pamilia, mabalin nga irebiu dagiti ulo ti pamilia dagiti masapul nga aramiden ti tunggal miembro ti pamiliada. No nakasaganakayo ken dagiti annakyo, dakdakkel ti posibilidadna nga agtalinaedkayo a kalmado no adda didigra.

9. Ania dagiti masapul nga aramiden dagiti panglakayen tapno organisado dagiti panagreggetda a tumulong sakbay ken kalpasan ti didigra?

⁹ No maysaka a manangaywan iti grupo, siguraduem a naalamon ti umiso a numero ti selpon wenno telepono ken adres ti amin a kagrupom sakbay pay nga adda dumteng a didigra. Mangaramidka iti listaan ken kanayonmo nga i-update. Iti kasta, no dumteng ti didigra, makontakmo ti amin a kagrupom ken maammuam dagiti kasapulan ti tunggal maysa kadakuada. Dagus nga ipakaammom dayta nga impormasion iti koordineytor ti bagi dagiti panglakayen ket isunton ti mangkontak iti manangaywan iti sirkito. Sigurado a nasayaat ti resulta ti kasta a panagtitinnulong. Kalpasan ti uram, saan a natnaturog iti 36 nga oras ti manangaywan iti sirkito da Margaret ta okupado a nangorganisar iti trabaho dagiti panglakayen bayat nga inkagumaanda a kinontak ken inasikaso ti 450 a kakabsat a nagbakuit. (2 Cor. 11:27) Gapu iti dayta, amin nga agkasapulan iti pagyanan ket naipaayan iti pagdagusan.

10. Para kadagiti panglakayen, apay a napateg ti panangipastor? (Juan 21:15)

¹⁰ Karaman iti trabaho dagiti Kristiano a panglakayen ti mangipaay iti naespirituan ken emosional a tulong. (1 Ped. 5:2) No adda didigra, masapul a siguraduen nga umuna dagiti panglakayen a natalged ti tunggal kabsat ken addaan iti kanen, bado, ken pagyanan. Ngem kalpasan ti adu a bulan, dagiti nakalasat iti didigra ket posible nga agkasapulan latta iti naespirituan ken emosional a suporta. (Basaen ti Juan 21:15.) “Tiempo ti kasapulan iti panangiliwliwag,” imbaga ni Harold a maysa a miembro ti Branch Committee. Adun a kakabsat a naapektaran iti didigra ti nakasaritana. “Mabalin a maakseptarda a didan maisubli dagiti napukaw kadakuada, ngem adda latta iti lagipda dagiti natay nga ipatpategda, napateg a tawidda, wenno ti napeggad a situasion a napasaranda. No malagipda dagita, mabalin a malapunosda manen iti liday. Natural laeng a reaksion dayta ti maysa a tao, saan a pakakitaan a kurang ti pammatina.”

11. Ania dagiti mabalin nga agtultuloy a kasapulan dagiti pamilia?

¹¹ Iyap-aplikar dagiti panglakayen daytoy a pammagbaga: “Makipagsangitkayo kadagidiay agsangsangit.” (Roma 12:15) Mabalin a masapul a maipanamnama kadagiti nakalasat nga ay-ayaten latta ida ni Jehova ken dagiti kapammatianda. Kayat dagiti panglakayen a tulongan dagiti pamilia tapno maitultuloyda ti naespirituan a rutinada, a pakairamanan ti panagkararag, panagadal, pannakigimong, ken panangasaba. Mabalin met nga iparegta dagiti panglakayen kadagiti nagannak a tulonganda dagiti annakda nga agpokus kadagiti banag a saan a madadael ti aniaman a didigra. Nagannak, ipalagipyo kadagiti annakyo a ni Jehova ti kanayon a Gayyemda ken kanayon a tulonganna ida. Diyo met liplipatan nga ilawlawag kadakuada a kanayonda a paset ti sangalubongan a pamilia dagiti kakabsat a nakasagana a tumulong kadakuada.​—1 Ped. 2:17.

12. Ania ti mabalin nga aramiden ti dadduma tapno matulonganda dagiti nadidigra? (Kitaen ti ladawan.)

¹² Ti mabalin nga aramiden ti dadduma. No adda mapasamak a didigra iti asidegyo, damagem kadagiti panglakayen no kasanoka a makatulong. Baka mabalinmo a temporario a padagusen dagiti nagbakuit wenno boluntario iti konstruksion. Baka kabaelam met ti mangideliber iti makan ken suplay kadagiti kakabsat nga agkasapulan. No ad-adayo ti nakapasamakan ti didigra, mabalinmo latta ti tumulong. Kasano? Ikararagam dagiti naapektaran. (2 Cor. 1:8-11) Masuportaram met ti trabaho a panangsaranay no agdonarka para iti sangalubongan a trabaho. (2 Cor. 8:2-5) No kayam ti mapan iti lugar a nadidigra, damagem kadagiti panglakayen no kasanoka a makapagboluntario. No naawiska, posible a dumalanka iti training tapno makatulongka iti lugar ken tiempo a kasapulan unay ti serbisiom.

TULONGAM DAGITI KAKABSAT A MANGIBTUR ITI PANNAKAIDADANES

13. Ania dagiti rigat a mapaspasaran dagiti kakabsat kadagiti pagilian a maiparit ti trabahotayo?

¹³ Kadagiti pagilian a maiparit ti trabahotayo, narigrigat ti biag gapu iti pannakaidadanes. Dagiti kakabsat sadiay ket agproblema latta iti pinansial, agsakit, ken matayanda kadagiti ipatpateg iti biag. Ngem gapu iti pannakaiparit, baka saan ida a mabisita dagiti panglakayen wenno saanda a siwayawaya a makasarita dagiti agkasapulan iti pammaregta. Kasta idi ti situasion ni Andrei, a nadakamat iti napalabas nga artikulo. Adda kagrupona a sister nga agprobproblema iti pinansial, sa naaksidente iti lugan. Masapul a mamin-adu a maopera ken saan a makatrabaho. Iti laksid dagiti restriksion ken ti pandemia, inkagumaan dagiti kakabsat a tulongan, ket makitkita idi ni Jehova dayta.

14. Kasano a mayulidan dagiti panglakayen ti panagtalek ken Jehova?

¹⁴ Ti mabalin nga aramiden dagiti panglakayen. Nagkararag ni Andrei ken inaramidna ti amin a kabaelanna. Kasano a sinungbatan ni Jehova ti kararagna? Tinignayna dagiti kakongregasion ni Andrei a nawaywaya a tumulong. Kada agpa-checkup ti sister, adda kakabsat a mangilugan kenkuana. Adda met dagiti nangted iti kuarta. Tinignay ida ni Jehova a tumulong kenkuana, ken binendisionanna ti panagkaykaysa ken kinaturedda. (Heb. 13:16) Papanglakayen, no adda restriksion iti trabahotayo, agpatulongkayo. (Jer. 36:5, 6) Kangrunaan iti amin, agtalekkayo ken Jehova. Matulongannakayo a mangipaay kadagiti kasapulan dagiti kakabsat.

15. Kasanotayo a mapagtalinaed ti Nakristianuan a panagkaykaysatayo no maidaddadanestayo?

¹⁵ Ti mabalin nga aramiden ti dadduma. Bayat ti pannakaiparit, mabalin a masapul nga agtataripnongtayo iti babbabassit a grupo. Nakapatpateg ngarud a pagtalinaedentayo ti natalna a relasiontayo iti maysa ken maysa. Ni Satanas ti labananyo, imbes nga aglalabankayo. Palabsenyo ti kamali dagiti kakabsat, wenno ikagumaanyo a solbaren a dagus dagiti diyo pagkikinnaawatan. (Prov. 19:11; Efe. 4:26) Agdisnudokayo a tumulong iti maysa ken maysa. (Tito 3:14) Ti panangtulong dagiti kakabsat iti agkasapulan a sister ket nasayaat ti epektona kadagiti kagrupona iti panangasaba. Nagbalinda a nasingsinged a kas iti maysa a pamilia.​—Sal. 133:1.

16. Maitunos iti Colosas 4:3, 18, kasanotayo a matulongan dagiti maidaddadanes a kakabsat?

¹⁶ Pinullo a ribu a kakabsat ti agserserbi ken Jehova uray no adda dagiti restriksion ti gobierno. Dadduma kadakuada ti naibalud gapu iti pammatida. Mabalintayo nga ikararagan ida, dagiti kapamiliada, ken dagiti mangipapaay kadagita a kakabsat iti naespirituan ken pisikal a tulong, agraman dagiti mangidepdepensa kadagiti kasoda, uray no agpegpeggad ti mismo a wayawayada.c (Basaen ti Colosas 4:3, 18.) Dimo pulos liplipatan a dakkel ti maitulong dagiti kararagmo!​—2 Tes. 3:1, 2; 1 Tim. 2:1, 2.

17. Kasanoka a makapagsagana itan para iti pannakaidadanes?

¹⁷ Kas pamilia, makapagsaganakayo itan para iti pannakaidadanes. (Ara. 14:22) Saanyo a panunoten ti amin a dakes a banag a posible a mapasamak. Patibkerenyo ketdi ti pannakigayyemyo ken Jehova ken tulonganyo dagiti annakyo a mangaramid met iti kasta. No adda dagiti tiempo a madandanagankayo, ibagayo iti Dios ti amin a linaon ti pusoyo. (Sal. 62:7, 8) Kas pamilia, pagsasaritaanyo ti amin a rason a makapagtalekkayo kenkuana.d Kas iti aramidenyo no adda didigra, ti personal a panagsaganayo ken panagtalekyo ken Jehova ti mangisuro kadagiti annakyo nga agbalinda a natured ken kalmado.

18. Ania a masakbayan ti agur-uray kadatayo?

¹⁸ Natalged ti riknatayo gapu iti talna ti Dios. (Fil. 4:6, 7) Dayta a talna ti us-usaren ni Jehova a mangpakalma iti pusotayo iti laksid dagiti sakit, didigra, ken pannakaidadanes a mabalin a mangapektar kadatayo ita. Us-usarenna met dagiti nagaget a panglakayen a mangipastor kadatayo ken pribilehiotayo amin ti agtitinnulong. Ti talna a matagtagiragsaktayo ita ti makatulong tapno masaganaantayo dagiti daddadakkel a suot ken uray ti “dakkel a rigat.” (Mat. 24:21) Iti dayta a tiempo, masapul a pagtalinaedentayo ti talna ken tulongantayo ti sabsabali a mangaramid iti kasta. Ngem kalpasan dayta a rigat, awanton a pulos dagiti krisis a pakaigapuan ti danag. Matagiragsaktayto met laengen ti kayat ni Jehova a kanayon a maadda kadatayo​—ti pudpudno a talna a dinto pulos agpatingga.​—Isa. 26:3, 4.