3 | Agsursuro Kadagiti Ulidan iti Biblia

NADAKAMAT ITI BIBLIA . . . Dagiti matalek a lallaki ken babbai a nakapadas kadagiti “rikna a kas kadatayo.”—SANTIAGO 5:17.

Ti Kaipapananna

Naglaon ti Biblia kadagiti agpaypayso a salaysay maipapan kadagiti lallaki ken babbai a nakarikna iti agduduma nga emosion. Bayat a basbasaentayo dagiti napasamak kadakuada, mabalin a makasaraktayo kadagiti karakter iti Biblia a kas kadatayo ti nariknada.

No Kasano a Makatulong

Kayattayo amin nga adda makaawat kadatayo, lalo no adda problematayo iti mental a salun-at. No basaentayo ti Biblia, maammuantayo nga adda dagiti kas kadatayo ti napampanunot ken narikriknada. Kas resultana, makitatayo nga adda dagiti kapadatayo ti napadasan. Isu a no makariknatayo iti panagdanag ken mangibus iti pigsa nga emosion, saantay a mapanunot nga agmaymaysatayo.

Adu ti mabasatayo iti Biblia nga ebkas dagidiay nakarikna nga awan gawgaway ken desperadoda. Naibagam kadin, ‘Diak kayan’? Kasta met ti narikna ni Moises, Elias, ken David.—Numeros 11:14; 1 Ar-ari 19:4; Salmo 55:4.
Iti Biblia, adda maysa a babai nga agnagan Hanna a “nasaem unay” ti riknana gapu ta awan ti anakna ken in-insultuen ti karibalna nga asawa.—1 Samuel 1:6, 10.
Dakamaten ti Biblia ti maysa a lalaki nga agnagan Job a mabalin a kas iti nariknana ti marikriknatayo. Uray no nabileg ti pammatina, kimmapsut unay gapu iti emosionna isu a naibagana: “Kagurak ti biagko; diak kayaten ti agbiag.”—Job 7:16.

No adalentayo no kasano a napagballigian dagitoy a karakter iti Biblia dagiti negatibo a taray ti panagpampanunotda, mapabilegtayo a kayatayo met a sanguen dagiti pakarigatantayo.

No Kasano a Makatulong ti Biblia—Kevin

Ti Epekto Kaniak ti Bipolar Disorder

“Nadayagnos nga adda bipolar disorder-ko idi dandaniakon ag-50. Adda dagiti tiempo a mariknak a kasla kayak amin a problemak. Ngem no dadduma, mariknak nga awan serserbi ti biagko.”

No Kasano a Matultulongannak ti Biblia

“Maysa a karakter iti Biblia a nakatulong kaniak ket ni apostol Pedro. Nariknana nga awan serserbina gapu kadagiti kamalina. Ngem imbes nga ipalubosna a dayta ti mangkontrol iti panunotna, nakikadua ketdi ni Pedro kadagiti gagayyemna a mangipatpateg kenkuana. No sumro ti bipolar disorder-ko, dagiti laengen limitasionko ti mapampanunotko isu a mariknak nga awan serserbik. Kas ken Pedro, nasursurok ti makikadua kadagiti gagayyemko a tumultulong kaniak a di sumuko.

“Naliwliwaak pay iti maysa a karakter iti Biblia a ni Ari David a masansan a nadepres gapu iti situasionna ken nagbabawyanna dagiti kamalina. Makitkitak ti bagik kenkuana ta no dadduma, adda maaramid wenno maibagak a pagbabawyakto met laeng. Makaliwliwa kaniak ti imbaga ni David iti Salmo 51. Iti bersikulo 3, kunana: ‘Ammok dagiti salungasingko, ken kanayon nga adda iti sanguanak ti basolko.’ Kasta ti marikriknak no madepdepresak unay. Nagrigat ti agpanunot iti positibo maipapan kaniak. Ngem mapanunotko met ti kas iti imbaga ni David iti bersikulo 10: ‘O Dios, mangparsuaka kaniak iti nadalus a puso, ken ikkannak iti baro nga espiritu a natibker.’ Kasta met ti ipakpakaasik iti Dios tapno sumayaat ti panangkitak iti bagik. Makaliwliwa met kaniak ti bersikulo 17. Kunana: ‘Ti nasugatan ken nadunor a puso, O Dios, saanmonto a laksiden.’ Ipaspasigurado kaniak daytoy a bersikulo nga ay-ayatennak ti Dios.

“Babaen ti panangpampanunotko kadagiti ulidan iti Biblia ken kadagiti ar-aramiden ti Dios kaniak ita, mapabpabilegko ti namnamak iti masanguanan ken agbalin a napaypayso kaniak dagiti kari ti Biblia. Dayta ti tumultulong kaniak a di sumuko.”