Agsursurokayo Kadagiti Padto ti Biblia

1. Ania ti makatulong tapno masursurotayo a tagiragsaken ti agadal kadagiti padto ti Biblia?

“KAYKAYATKO nga adalen dagiti padto ti Biblia,” kuna ti agtutubo a brother a ni Ben. Kastaka met kadi? Wenno para kenka, narigat a maawatan dagiti padto? Baka panagriknam pay ketdi a saan a makapainteres nga adalen dagiti padto. Ngem no ad-adu ti maammuam no apay nga impaisurat ni Jehova dagita iti Saona, mabalin a kayatmonto metten nga adalen dagita.

2. Ania dagiti pagsasaritaantayo iti daytoy nga artikulo?

² Iti daytoy nga artikulo, pagsasaritaantayo no apay a masapul nga adalentayo dagiti padto ti Biblia ken no kasano nga adalentayo dagita. Kalpasanna, usigentayo ti dua a padto iti libro a Daniel ken kitaentayo no kasano a makatulong kadatayo ita no maawatantayo dagita a padto.

APAY NGA ADALENTAYO DAGITI PADTO TI BIBLIA?

3. Ania ti masapul nga aramidentayo tapno maawatantayo dagiti padto ti Biblia?

³ Tapno maawatantayo dagiti padto ti Biblia, masapul nga agpatulongtayo. Usigentayo daytoy nga ilustrasion: Damom ti agpasiar iti maysa a lugar a kaduam ti maysa a gayyemmo. Kabesadona dayta a lugar, ammona ti eksakto nga ayanyo, ken ti pagturongan ti tunggal dalan. Sigurado a maragsakanka ta kinuyognaka ti gayyemmo! Iti umasping a pamay-an, ammo ni Jehova no anian a paset ti maudi nga al-aldaw ti pagbibiagantayo ken no ania ti pagtungpalan ti dalan nga ayantayo. Tapno ngarud maawatantayo dagiti padto ti Biblia, masapul a sipapakumbaba nga agpatulongtayo ken Jehova.—Dan. 2:28; 2 Ped. 1:19, 20.

4. Apay nga impaisurat ni Jehova dagiti padto iti Saona? (Jeremias 29:11) (Kitaen met ti ladawan.)

⁴ Kas iti asinoman a nasayaat a nagannak, kayat ni Jehova a naragsak ti masakbayan dagiti annakna. (Basaen ti Jeremias 29:11.) Ngem saan a kas iti asinoman a tao a nagannak, maibaga ni Jehova ti eksakto ken umiso a mapasamak iti masanguanan. Dagiti padto ket impaisuratna iti Saona tapno maammuantayo dagiti napapateg a pasamak sakbay a dumteng dagita. (Isa. 46:10) Dagiti padto ti Biblia ket regalo ti nadungngo a nailangitan nga Amatayo. Ngem kasanom a masigurado a talaga a pumaysonto dagiti impakpakauna ti Biblia?

5. Ania ti masursuro ti maysa nga agtutubo iti kapadasan ni Max?

⁵ Iti eskuelaan, masansan a makipulpulapol dagiti agtutubotayo kadagidiay bassit wenno awan ti panagraemda iti Biblia. Gapu kadagiti komento ken ar-aramiden dagita a tattao, mabalin nga agduadua ti maysa nga agtutubo a Saksi. Kitaentayo ti kapadasan ti brother a ni Max. Imbagana, “Idi tin-edyerak, nangrugi a pagduaduaak no pudno met laeng a relihion ti isursuro kaniak dagiti nagannakko ken no ti Biblia ket impaisurat ti Dios.” Ania ti inaramid dagiti nagannakna? Imbagana, “Kalmadoda latta, uray no ammok a madandanaganda.” Inusar dagiti nagannak ni Max ti Biblia a mangsungbat kadagiti saludsodna. Adda met ti inaramid ni Max. “Inadalko dagiti padto ti Biblia,” kunana, “ken imbagak iti dadduma nga agtutubo dagiti nasursurok.” Ania ti resultana? Kuna ni Max, “Kalpasan dayta, kombinsidoakon a ti Biblia ket impaisurat ti Dios!”

6. Ania ti masapul nga aramidem no adda dagiti pagduaduaam, ken apay?

⁶ Kas ken Max, no mangrugi a pagduaduaam no agpayso met la ti ibagbaga ti Biblia, saanka koma a mabain. Ngem masapul nga adda ti aramidem. Ti panagduadua ket kas iti lati. No mabaybay-an, mabalin nga in-inut a dadaelenna ti maysa a napateg a banag. Tapno maikkatmo ti aniaman nga arig “lati” iti pammatim, masapul nga isaludsodmo iti bagim, ‘Patiek kadi ti ibagbaga ti Biblia maipapan iti masanguanan?’ No saanka a sigurado, masapul ngarud nga adalem dagiti padto ti Biblia a natungpalen. Kasanom a maaramid dayta?

NO KASANO NGA ADALEN DAGITI PADTO TI BIBLIA

7. Ania ti inyulidan ni Daniel maipapan iti panangadal kadagiti padto? (Daniel 12:10) (Kitaen met ti ladawan.)

⁷ Nagsayaat ti inyulidan ni Daniel maipapan iti panangadal kadagiti padto. Umiso ti motibona a nangadal kadagiti padto—kayatna a maammuan ti kinapudno. Napakumbaba met ni Daniel. Binigbigna nga ikkan ni Jehova iti pannakaawat dagidiay makaam-ammo kenkuana ken mangsursurot kadagiti nadalus a pagalagadanna. (Dan. 2:27, 28; basaen ti Daniel 12:10.) Pinaneknekan ni Daniel ti kinapakumbabana idi nagpatulong ken Jehova. (Dan. 2:18) Kasta met, nagadal a naimbag ni Daniel. Sinukimatna dagiti paset ti Kasuratan nga adda idin. (Jer. 25:11, 12; Dan. 9:2) Kasanom a matulad ni Daniel?

8. Apay a saan a mamati ti dadduma a matungpal dagiti padto ti Biblia, ngem ania ti masapul nga aramidentayo?

⁸ Usigem dagiti motibom. Ad-adalem kadi dagiti padto ti Biblia gapu ta talaga a kayatmo a maammuan ti kinapudno? No wen, tulongannaka ni Jehova. (Juan 4:23, 24; 14:16, 17) Ania ngata ti mabalin a motibo ti dadduma no adalenda dagiti padto ti Biblia? Baka aramidenda dayta bareng makabirokda kadagiti ebidensia a saan nga impaisurat ti Dios ti Biblia. Iti kasta, mariknada a maikalinteganda ti panangaramidda kadagiti bukodda a pagalagadan maipapan iti umiso ken di umiso ken dagita ti surotenda. Ngem masapul nga umiso ti motibotayo, ken adda napateg a kualidad a kasapulan tapno maawatantayo dagiti padto ti Biblia.

9. Ania a kualidad ti kasapulan tapno maawatantayo dagiti padto ti Biblia? Ilawlawag.

⁹ Agbalinka a napakumbaba. Ikarkari ni Jehova a tulonganna dagiti napakumbaba. (Sant. 4:6) Masapul ngarud nga ikararagtayo a tulongannatayo tapno maawatantayo dagiti padto ti Biblia. Rumbeng met a bigbigentayo a kasapulantayo ti tulong ti matalek ken masirib nga adipen, ti kakaisuna nga us-usarenna a mangipaay iti naespirituan a taraontayo iti umiso a tiempo. (Luc. 12:42) Ni Jehova ket Dios ti urnos. Umiso laeng ngarud a dayta ti kakaisuna nga us-usarenna a tumulong kadatayo a mangtarus kadagiti kinapudno iti Saona.—1 Cor. 14:33; Efe. 4:4-6.

10. Ania ti masursurom iti kapadasan ni Esther?

¹⁰ Agadalka a naimbag. Mangpilika iti padto a paginteresam sa ag-research-ka maipapan iti dayta. Kasta ti inaramid ti sister a ni Esther. Kayatna a maammuan dagiti padto a nangipakpakauna iti iyaay ti Mesias. “Idi 15 ti tawenko,” kunana, “rinugiak nga adalen dagiti ebidensia a dagita a padto ket talaga a naisurat sakbay a nayanak ni Jesus ditoy daga.” Nakombinsir idi nabasana dagiti impormasion maipapan iti Dead Sea Scrolls. “Dadduma kadagita ket naisurat sakbay ti tiempo ti Kristo,” imbagana, “isu a dagiti linaonda a padto ket naggapu la ketdi iti Dios.” Inamin ni Esther, “Masapul idi a mamin-adu a basaek dagiti ad-adalek tapno maawatak dagita.” Ngem naragsak ta impasnekna ti nagadal. Kalpasan nga inadalna a naimbag ti sumagmamano a padto ti Biblia, imbagana, “Talaga a mamatiak a husto ti Biblia!”

11. Apay a nasayaat a paneknekantayo iti bagitayo a husto ti Biblia?

¹¹ No makitkitatayo no kasano a matungtungpalen ti dadduma a padto iti Sao ti Dios, siento porsiento nga agtalektayo ken Jehova ken iti panangiwanwanna kadatayo. Makatulong met dagiti padto ti Biblia tapno kanayon a positibo ti namnamatayo para iti masanguanan, aniaman a suot ti mapaspasarantayo. Usigentayo biit ti dua a padto nga insurat ni Daniel a matungtungpalen. No maawatantayo dagita, makaaramidtayo kadagiti nainsiriban a desision.

APAY A MASAPUL A MAAWATAM TI MAIPAPAN KADAGITI SAKA A LANDOK KEN PILA?

12. Ania ti irepresentar dagiti saka a “landok a nalaokan iti nalukneng a pila”? (Daniel 2:41-43)

¹² Basaen ti Daniel 2:41-43. Iti natagtagainep ni Ari Nabucodonosor nga inlawlawag ni Daniel ti kaipapananna, dagiti saka ti imahen a nakita ti ari ket naaramid iti “landok a nalaokan iti nalukneng a pila.” No ikomparatayo daytoy a padto iti dadduma a padto iti libro a Daniel ken Apocalipsis, daytoy ti konklusiontayo: dagiti saka irepresentarna ti Anglo-America nga aliansa, ti kabilgan a turay iti lubong ita. No maipapan iti dayta a kabilgan a turay iti lubong, imbaga ni Daniel nga “addanto met paset ti pagarian a napigsa ken addanto pasetna a narasi.” Apay nga adda pasetna a narasi? Ngamin, dagiti ordinario nga umili, nga irepresentar ti nalukneng a pila, ti mangpakpakapuy iti arig landok a pigsana.b

13. Ania dagiti napateg a kinapudno a masursurotayo no maawatantayo daytoy a padto?

¹³ Adu dagiti napateg a kinapudno a masursurotayo iti imahen a dineskribir ni Daniel, nangnangruna kadagiti saka dayta nga imahen. Umuna, impakita ti Anglo-America a Kabilgan a Turay iti Lubong nga adda pannakabalinna. Kas pagarigan, dakkel ti papelna iti panangabakna iti Gubat Sangalubongan I ken Gubat Sangalubongan II. Ngem kimmapuy daytoy a kabilgan a turay iti lubong ken agtultuloy a kumapuy gapu iti panagprotesta dagiti umilina. Maikadua, daytoy nga aliansa ti kaudian a kabilgan a turay nga agturturay sakbay a pagpatinggaen ti Pagarian ti Dios ti amin a pagarian ti tao. Uray no adda dagiti tiempo a mabalin a kariten ti dadduma a nasion ti Anglo-America a Kabilgan a Turay iti Lubong, saandanto a masukatan dayta. Ammotayo dayta ta “ti bato” a mangirepresentar iti Pagarian ti Dios ti mangrumekto kadagiti saka, ti paset ti imahen a mangisimbolo iti Anglo-America nga aliansa.—Dan. 2:34, 35, 44, 45.

14. No maawatantayo ti padto maipapan kadagiti saka a landok ken pila, kasano a makatulong dayta tapno makaaramidtayo kadagiti nainsiriban a desision?

¹⁴ Kombinsidoka kadi a pudno ti padto ni Daniel maipapan kadagiti saka a landok ken pila? No wen, apektaran dayta ti wagas ti panagbiagmo. Saankan nga agporsegi a maaddaan iti adu a kuarta wenno material a bambanag iti lubong nga asidegen a madadael ken mapukaw. (Luc. 12:16-21; 1 Juan 2:15-17) No maawatam dayta a padto, matulongannaka met a mangamiris a nagpateg ti trabaho a panangasaba ken panangisuro. (Mat. 6:33; 28:18-20) Kalpasan a naadaltayo dayta a padto, isaludsodmo iti bagim, ‘Ipakpakita kadi dagiti desisionko a kombinsidoak nga asidegen a pagpatinggaen ti Pagarian ti Dios ti amin a gobierno ti tao?’

APAY A MASAPUL A MAAWATAM TI MAIPAPAN ITI “ARI TI AMIANAN” KEN ITI “ARI TI ABAGATAN”?

15. Asino “ti ari ti amianan” ken “ti ari ti abagatan” ita? (Daniel 11:40)

¹⁵ Basaen ti Daniel 11:40. Dinakamat ti Daniel kapitulo 11 ti dua nga ari, wenno gobierno, nga agkinkinnompetensia ta agpada a kayatda ti agbalin a kabilgan iti lubong. No ikomparatayo daytoy a padto iti dadduma pay a padto ti Biblia, maawatantayo a ti Russia ken dagiti kaaliadona “ti ari ti amianan” ket ti met Anglo-America a Kabilgan a Turay iti Lubong “ti ari ti abagatan.”c

16. Ania dagiti rigat a mapaspasaran dagiti agnanaed kadagiti lugar nga iturturayan “ti ari ti amianan”?

¹⁶ Ib-ibturan ti ili ti Dios nga agnanaed kadagiti lugar nga iturturayan “ti ari ti amianan” ti direkta a panangidadanes daytoy nga ari. Nakabkabil ken naibalud ti dadduma a Saksi gapu iti pammatida. Imbes a mabuteng dagita a kakabsattayo, bumilbileg ketdi ti pammatida gapu kadagita nga ar-aramiden “ti ari ti amianan.” Apay? Gapu ta ammo dagita a kakabsat a ti pannakaidadanes ti ili ti Dios ket kaitungpalan dagiti padto ni Daniel.d (Dan. 11:41) Ammotayo met dayta. Makatulong dayta tapno agtalinaed a naraniag ti namnamatayo ken nabileg ti integridadtayo.

17. Ania dagiti mapaspasaran ti ili ti Dios kadagiti lugar nga iturturayan “ti ari ti abagatan”?

¹⁷ Iti napalabas, “ti ari ti abagatan” direkta met a rinautna ti ili ni Jehova. Kas pagarigan, bayat ti umuna a kagudua ti maika-20 a siglo, adu a kakabsat ti naibalud gapu iti Nakristianuan a neutralidadda. Gapu iti dayta met la a rason, dadduma nga annak dagiti Saksi ket naikkat pay ketdi iti eskuelaan. Ngem kadagiti nabiit pay a dekada, dagiti adipen ni Jehova nga agnanaed kadagiti lugar nga iturturayan dayta nga ari ket naipasango iti ad-adu a di madmadlaw a pannubok iti panagbalinda a napudno iti Pagarian ti Dios. Kas pagarigan, bayat dagiti kampania para iti eleksion, baka masulisog ti maysa a Kristiano a mangsuporta iti maysa a partido ti politika wenno kandidato. Saan met ketdi nga agbotos; ngem iti isip ken pusona, adda dasdasiganna. Nagpateg ngarud nga agtalinaedtayo a neutral iti politika, saan laeng nga iti aramidtayo no di pay ket iti isip ken pusotayo!—Juan 15:18, 19; 18:36.

18. Ania ti reaksiontayo iti panagkontra “ti ari ti amianan” ken ti karibalna? (Kitaen met ti ladawan.)

¹⁸ Dagidiay saan a mamati kadagiti padto ti Biblia ket baka madanagan unay no makitada a “ti ari ti abagatan” ket ‘makisinnangdo’ iti “ari ti amianan.” (Dan. 11:40, ftn.) Agpada dagita nga ari nga addaan iti umdas a nuklear nga armas a mangdadael iti amin a biag ditoy daga. Ngem ammotayo a saanto nga ipalubos ni Jehova a mapasamak dayta. (Isa. 45:18) Isu nga imbes a madanagantayo, ti panagginnura “ti ari ti amianan” ken “ti ari ti abagatan” ti mangpabileg iti pammatitayo. Ebidensia dayta nga asidegen nga agpatingga daytoy a sistema.

ITULTULOYYO NGA IPANGAG DAGITI PADTO

19. Ania dagiti masapul a bigbigentayo maipapan kadagiti padto ti Biblia?

¹⁹ Ditay ammo no kasanonto a matungpal ti dadduma a padto ti Biblia. Uray ni propeta Daniel dina naawatan ti kaipapanan ti amin nga insuratna idi. (Dan. 12:8, 9) Ngem saan a gapu ta ditay naan-anay a maawatan no kasanonto a matungpal ti maysa a padto ket saanton a pumayso dayta. Sigurado a makapagtalektayo nga ipakaammonto ni Jehova kadatayo dagiti masapul a maammuantayo iti eksakto nga umiso a tiempo, kas iti inaramidna idi un-unana.—Amos 3:7.

20. Ania dagiti makapagagar a padto ti Biblia a makitatayo a dandanin matungpal, ken ania ti masapul nga itultuloytayo nga aramiden?

²⁰ Maiproklamanton ti “talna ken talged.” (1 Tes. 5:3) Kalpasanna, dagiti napolitikaan a turay ti lubong bueltaendanto ti ulbod a relihion ket interamente a dadaelenda dayta. (Apoc. 17:16, 17) Sumaruno, rautenda ti ili ti Dios. (Ezek. 38:18, 19) Dagita a pasamak ti direkta a rugi ti maudi a gubat ti Armagedon. (Apoc. 16:14, 16) Masiguradotayo nga asidegen a mapasamak dagita. Bayat nga ur-urayentayo dagita, itultuloytayo koma nga ipakita ti apresasiontayo iti nadungngo a nailangitan nga Amatayo. Kasano? Ipangagtayo dagiti padto ti Biblia ken tulongantayo ti dadduma a mangaramid met iti dayta.