Salsaludsod Dagiti Agbasbasa
Ti kadi sasao a “saluadamto ida,” iti Salmo 12:7 ket tumukoy kadagiti “mairurrurumen” (bersikulo 5) wenno kadagiti “sasao ni Jehova” (bersikulo 6)?
Ipakita ti konteksto a tattao ti tuktukoyen daytoy a bersikulo.
Iti Salmo 12:1-4, mabasatayo nga “awanen ti masarakan a matalek kadagiti tattao.” Kalpasanna, imbagana iti Salmo 12:5-7:
“‘Gapu ta marigrigatan dagiti mairurrurumen,
Gapu ta umas-asug dagiti napanglaw,
Agtignayakto,’ kuna ni Jehova.
‘Isalakankonto ida kadagiti manglalais kadakuada.’
Nasudi dagiti sasao ni Jehova;
Kayariganda ti pirak a napasudi iti damili nga urno, a namimpito a napagbalin a puro.
Saluadamto ida, O Jehova;
Manipud iti daytoy a henerasion, agnanayon a salaknibamto ti tunggal maysa kadakuada.”
Ti bersikulo 5 ket maipapan iti aramidento ti Dios kadagiti mairurrurumen. Isalakannanto ida.
Ibaga met ti bersikulo 6 a “nasudi dagiti sasao ni Jehova; kayariganda ti pirak a napasudi.” Umanamong iti dayta ti amin a napudno a Kristiano.—Sal. 18:30; 119:140.
Kitaentayo itan ti sumaruno a bersikulo, ti Salmo 12:7: “Saluadamto ida, O Jehova; manipud iti daytoy a henerasion, agnanayon a salaknibamto ti tunggal maysa kadakuada.” Siasino ti tuktukoyen ti sasao nga “ida” ken “kadakuada”?
Dakamaten ti bersikulo 6 ti “sasao ni Jehova,” isu a baka mapanunot ti dadduma a ti “ida” ken “kadakuada” ket tumukoy iti sasao ti Dios. Ken ammotayo a sinaluadan ti Dios ti Biblia ta adu ti pamay-an nga inaramid dagiti bumusbusor a mangiparit ken mangdadael iti dayta.—Isa. 40:8; 1 Ped. 1:25.
Ngem agpayso met a salsaluadan ni Jehova dagiti tattao a nadakamat iti bersikulo 5. Salsaluadan ken itultuloyna a tulongan ken isalakan “dagiti mairurrurumen” ken “marigrigatan.”—Job 36:15; Sal. 6:4; 31:1, 2; 54:7; 145:20.
Siasino ngarud ti tuktukoyen ti “ida” ken “kadakuada” iti bersikulo 7?
No usigentayo a naimbag daytoy a salmo, nalawag a ti tuktukoyenna ket dagiti tattao.
Iti Salmo 12:1, imbaga ni David a dagiti “matalek” ket biktima ti panagulbod dagiti managdakdakes. Kalpasanna, mabasatayo nga agtignayto ni Jehova maibusor kadagiti saan a nasayaat ti panangusarda iti dilada. Ipasigurado kadatayo daytoy a salmo a makapagtalektayo a salaknibanto ti Dios ti ilina gapu ta nasudi dagiti sasaona.
Ibagbaga ngarud ti bersikulo 7 a saluadan ken salakniban ni Jehova “ida,” kayatna a sawen, dagiti mairurrurumen a biktima dagiti managdakdakes.
Inusar ti Hebreo a Masoretiko a manuskrito ti “ida.” Namindua met nga inusar ti Griego a Septuagint ti pronombre (pronoun) a “-kami” iti bersikulo 7, a tumukoy kadagiti matalek a mairurrurumen ken marigrigatan. Kamaudiananna, kuna ti bersi-kulo 7 a ti “tunggal maysa” kadagiti matalek ket masalakniban “manipud iti daytoy a henerasion,” kayatna a sawen, manipud kadagiti tattao a mangiwarwaras iti nakaro a kinadakes. (Sal. 12:7, 8) Iti Aramaiko a Targum, kastoy ti mabasa iti bersikulo 7: “Sika, O APO, salaknibam dagiti nalinteg, kanayon a saluadam ida iti daytoy dakes a henerasion. Adda iti amin a suli dagiti managdakdakes, kasda la iti alimatek a mangsusop iti dara ti amin nga annak ti tattao.” Dagitoy a patarus ket kanayonan nga ebidensia a ti Salmo 12:7 ket saan a tumukoy kadagiti sasao ti Dios.
Gapu iti dayta, mangipaay daytoy a bersikulo iti namnama para kadagiti “matalek” a saluadanto ida ti Dios.