Patiem a Pinakawannakan ni Jehova

1-2. Ania ti mariknatayo no kombinsidotayo a pinakawanen ni Jehova dagiti basoltayo? (Kitaen met ti ladawan.)

ADDA idi tiempo a naladingitan unay ni Ari David gapu kadagiti naaramidna a basol iti napalabas. (Sal. 40:12; 51:​3, superskripsion) Ngem talaga a pinagbabawyanna dagita isu a pinakawan ni Jehova. (2 Sam. 12:13) Kas resultana, naragsakan ni David gapu ta kombinsido a pinakawanen ni Jehova.—Sal. 32:1.

² Kas ken David, maragsakantayo met no kombinsidotayo a pinakawanen ni Jehova dagiti basoltayo ken impakitaannatayo iti asi. Anian a makaliwliwa a maammuan a sisasagana ni Jehova a mangpakawan kadagiti basoltayo, uray dagiti nadagsen a naaramidantayo, no la ketdi ta naimpusuan nga agbabawitayo, ipudnotayo dagiti basoltayo, ken aramidentayo ti amin a kabaelantayo a saanen a mangulit kadagita! (Prov. 28:13; Ara. 26:20; 1 Juan 1:9) Makaparagsak met a maammuan a no mangpakawan ni Jehova, pakawanennatayo a kas man la saantayo a nakaaramid iti basol!—Ezek. 33:16.

3-4. Ania ti narikna ti maysa a sister uray idi nabautisaranen, ken ania ti pagsasaritaantayo iti daytoy nga artikulo?

³ Ngem no dadduma, baka pagduaduaantayo no talaga a pinakawannatayon ni Jehova. Kasta idi ti narikna ni Jennifer. Napadakkel iti kinapudno. Ngem idi tin-edyeren, nakaaramid kadagiti nadagsen a basol ken doble kara ti panagbiagna. Ngem kalpasan ti sumagmamano a tawen, nagbalbaliw, indedikarna ti biagna ken Jehova, ken nagpabautisar. Imbagana: “Idi, masansan a makaaramidak iti seksual nga immoralidad, agbarbartekak, ken managpungpungtotak. Ken ti kapatgan idi kaniak ket kuarta. Iti un-unegko, ammok ti ibagbaga ti Biblia a gapu iti subbot, mapakawan ni Jehova dagiti basoltayo. Ngem uray no nagbabawiakon ken impakaasik ken Jehova a pakawanennak, marigatanak latta a mangkombinsir iti bagik a talaga a napakawannakon.”

⁴ Marigatanka kadi no dadduma a mangkombinsir iti pusom a talaga a pinakawannakan ni Jehova? No wen, laglagipem ti narikna ni David maipapan iti asi ni Jehova. Kombinsido a napakawanen gapu ta nakaas-asi ni Jehova. Kayat met ni Jehova a kasta ti mariknam. Iti daytoy nga artikulo, pagsasaritaantayo no apay a masapul a patientayo a pinakawannatayon ni Jehova ken no ania ti makatulong tapno maaramidtayo dayta.

APAY A MASAPUL A PATIENTAYO A PINAKAWANNATAYON NI JEHOVA?

5. Ania ti kayat ni Satanas a patientayo? Mangted iti pagarigan.

⁵ No talaga a patientayo a pinakawannatayon ni Jehova, saantayo a patien ti kinaulbod ni Satanas. Laglagipem nga aramiden ni Satanas ti amin a kabaelanna tapno pasardengennatayo nga agserbi ken Jehova. Tapno maaramidna dayta, kayatna a patientayo a saan a mapakawan dagiti basoltayo. Kitaentayo ti napasamak iti maysa a lalaki a taga-Corinto a naikkat iti kongregasion gapu iti seksual nga immoralidad. (1 Cor. 5:​1, 5, 13) Idi agangay, nagbabawi. Ngem kayat ni Satanas a saan a pakawanen ken awaten ti kongregasion dayta a lalaki. Kasta met, kayat ni Satanas a marikna ti agbabbabawi a lalaki a saan a mapakawan dagiti basolna. Iti kasta, “lapunosen ti nakaro a ladingit” ket agsardengen nga agserbi ken Jehova. Agingga ita, saan a nagbaliw dagiti kayat ni Satanas a mapasamak. Ngem “saantayo nga ignorante kadagiti dakes a planona.”—2 Cor. 2:​5-11.

6. Ania ti makatulong tapno saantayon a makonkonsiensia unay kadagiti naaramidtayo a basol iti napalabas?

⁶ No talaga a patientayo a pinakawannatayon ni Jehova, saantayon a makonkonsiensia unay kadagiti basol a naaramidtayo iti napalabas. No agbasoltayo, natural laeng a makonsiensiatayo. (Sal. 51:17) Nasayaat dayta. Apay? Ngamin, tulongannatayo ti konsiensiatayo a mangbigbig a nakaaramidtayo iti basol. Iti kasta, makapagbalbaliwtayo ken maaramidtayo ti umiso. (2 Cor. 7:​10, 11) Nupay kasta, no permi latta a makonkonsiensiatayo uray no nabayagen a nagbabawyantayo ti basoltayo, baka agsardengtayon nga agserbi ken Jehova. Ngem ania ti masapul nga aramidentayo tapno saan a mapasamak dayta? Patientayo a talaga a pinakawannatayon ni Jehova. Iti kasta, maitultuloytayo ti agserbi kenkuana, masiguradotayo a maparparagsaktayo isuna, ken agbalintayo manen a naragsak. Dayta ti kayat ni Jehova para kadatayo. (Col. 1:​10, 11; 2 Tim. 1:3) Kasanotayo ngarud a makombinsir ti bagitayo a talaga a pinakawannatayon ni Jehova?

ANIA DAGITI MAKATULONG TAPNO PATIENTAYO A TALAGA A PINAKAWANNATAYON NI JEHOVA?

7-8. Kasano nga inyam-ammo ni Jehova ti bagina ken Moises, ken ania ti ipasigurado dayta kadatayo? (Exodo 34:​6, 7)

⁷ Panunotem no kasano nga inyam-ammo ni Jehova ti bagina. Kas pagarigan, kitaem no ania ti imbaga ni Jehova ken ni Moises iti Bantay Sinai.a (Basaen ti Exodo 34:​6, 7.) Kadagiti nakaad-adu a nagsasayaat a kualidad ni Jehova, inyam-ammona ti bagina ken Moises kas “Dios a naasi ken mannakipagrikna.” No kasta ni Jehova, ipaidamna ngarud kadi ti pammakawanna iti adipenna a talaga nga agbabbabawi? Saan a pulos! Saan no kuan a naasi ken mannakipagrikna a Dios. Saan a kasta ni Jehova.

⁸ Masiguradotayo a no imbaga ni Jehova nga isu ket naasi a Dios, agpayso dayta. Ngamin, isu ti Dios ti kinapudno. (Sal. 31:5) Makapagtalektayo ngarud iti ibagbagana. Isu a no permi latta a makonkonsiensiaka kadagiti basolmo iti napalabas, isaludsodmo iti bagim: ‘Talaga kadi a mamatiak a naasi ken mannakipagrikna a Dios ni Jehova, ken talaga a pakawanenna ti asinoman nga agbabbabawi?’ No mamatika iti dayta, masiguradom ngarud a ‘napakawannakan.’

9. Ania ti isuro kadatayo ti Salmo 32:5 maipapan iti panangpakawan ni Jehova kadagiti basoltayo?

⁹ Panunotem no ania ti impaisurat ni Jehova iti Biblia maipapan iti pammakawanna. Kas pagarigan, kitaem ti imbaga ti mannurat ti Biblia a ni David. (Basaen ti Salmo 32:5.) Imbaga ni David:“Pinakawanmo dagiti basolko.” Ti Hebreo a sao a naipatarus kas ‘pinakawan’ mabalin a kaipapananna ti “binagkat,” “inyadayo,” wenno “innala.” Isu nga idi pinakawan ni Jehova ni David, nariknana nga arigna binagkat ni Jehova ti nadagsen nga awit a bagbagkatenna. (Sal. 32:​2-4) Gapu iti dayta, nalag-anan ken naragsakan ni David. Mabalintay met a marikna ti kasta. No naimpusuan a pagbabawyantayo dagiti basoltayo, saanen a masapul nga arigna bagkatentayo ti nadagsen nga awit gapu iti basol a naaramidantayo. Laglagipentayo nga innala wenno inyadayon dagita ni Jehova kadatayo.

10-11. Ania ti isuro ti sasao a “sisasaganaka a mangpakawan” maipapan ken Jehova? (Salmo 86:5)

¹⁰ Basaen ti Salmo 86:5. Ibagbaga ditoy ni David a ni Jehova ket ‘sisasagana a mangpakawan.’ Maipapan iti dayta a sasao, kuna ti maysa a reperensia ti Biblia a natural laeng para ken Jehova ti mangpakawan ta paset dayta ti personalidadna. Apay? Ilawlawag ti sumaruno a paset ti bersikulo: “Aglaplapusanan ti napudno nga ayatmo kadagiti umaw-awag kenka.” Kas naammuantayo iti napalabas nga artikulo, inkari ni Jehova nga ipakitana ti napudno nga ayatna kadagiti mangay-ayat kenkuana ken saannanto ida a pulos baybay-an. Gapu iti napudno nga ayatna, ‘sibubulos a pakawanenna’ ti amin nga agbabbabawi. (Isa. 55:​7, ftn.) Isu a no marigatanka a mamati a pinakawannakan ti Dios, isaludsodmo iti bagim: ‘Mamatiak kadi a talaga a manangpakawan ni Jehova, ken sisasagana a mangpakawan iti amin nga agbabbabawi nga agpakpakaasi kenkuana? Apay ngarud koma a diak patien a pinakawannakon ni Jehova kalpasan a kiniddawko a kaasian ken pakawanennak?’

¹¹ Makaliwliwa a maammuan a naan-anay a maawatan ni Jehova ti pannakaaramidtayo. Ammona a managbasoltayo. (Sal. 139:​1, 2) Nalawag dayta iti sabali pay a salmo ni David. Makatulong met la dayta a salmo tapno patientayo a talaga a pakawanennatayo ni Jehova.

DIMO LIPLIPATAN TI LAGLAGIPEN NI JEHOVA

12-13. Sigun iti Salmo 103:​14, ania ti laglagipen ni Jehova maipapan kadatayo, ken ania ti aramidenna gapu iti dayta?

¹² Basaen ti Salmo 103:14. Imbaga ni David a “silalagip [ni Jehova] a tapoktayo.” Kadagita a sasao, ilawlawagna ti maysa pay a rason a sisasagana ni Jehova a mangpakawan kadagiti agbabbabawi nga agdaydayaw kenkuana. Ania dayta? Sipapanunot a managbasoltayo. Tapno ad-adda a maawatantayo, kitaentayo ti kaipapanan dayta nga imbaga ni David.

¹³ Imbaga ni David a ‘talaga nga ammo ni Jehova ti pannakaaramidtayo.’ Inaramidna ni Adan manipud iti “tapok” isu nga ammona nga adda latta dagiti limitasion uray dagiti perpekto a tattao. Kas pagarigan, kasapulanda ti mangan, maturog, ken aganges. (Gen. 2:7) Ngem idi nagbasol da Adan ken Eva, naibilang a tapok dagiti tattao iti sabali pay nga aspeto. Maibilangtayo a kas tapok gapu ta nayanaktayo nga imperpekto ken ti tendensiatayo ket agaramid iti dakes. Saan laeng nga ammo ni Jehova a managbasoltayo. Kas iti imbaga ni David, “silalagip” a tapoktayo. Ti Hebreo a sao a nausar para iti daytoy mabalin nga ipakitana nga adda nasayaat nga aramiden ti Dios gapu iti dayta. Isu a kasla kastoy ti kaipapanan dagiti imbaga ni David: Maawatan ni Jehova a gapu ta natawidtayo ti basol, agkamalitayo no dadduma. Ngem no pagbabawyantayo dagiti basoltayo, ipakitaannatayo iti asi ken pakawanennatayo.—Sal. 78:​38, 39.

14. (a) Ania pay ti imbaga ni David maipapan iti panangpakawan ni Jehova? (Salmo 103:12) (b) Ania ti masursurotayo maipapan iti panangpakawan ni Jehova ken David? (Kitaen ti kahon a “No Kasano a Pakpakawanen ken Liplipaten ni Jehova Dagiti Basoltayo.”)

¹⁴ Ania pay ti masursurotayo iti Salmo 103 maipapan iti panangpakawan ni Jehova? (Basaen ti Salmo 103:12.) Imbaga ni David a no mangpakawan ni Jehova, ti kaadayo ti pangipananna kadagiti basoltayo ket kas ti kaadayo ti “pagsingisingan ti init [daya] iti paglennekanna [laud].” Ania ti ipakpakita dayta? Ti daya ti kaadaywan a distansia a mapanunottayo iti laud. Saanto a pulos agsabat dagita. Ania ti ipakita dayta maipapan iti panangpakawan ni Jehova kadagiti basoltayo? Ibagbaga ti maysa a reperensia a “no kasta kaadayo ti pangikabilan ti Dios iti basoltayo, masiguradotayo nga awan ti agbati uray sangkabassit man laeng nga angot, tugot, wenno aniaman a pakalaglagipan iti dayta.” Kas pagarigan, saan kadi a ti maysa nga angot mabalin nga ipalagipna ti maysa a napasamak iti napalabas? Wen. Ngem no mangpakawan ni Jehova, kas man la awan a pulos ti angot nga agbati a mangipalagip kadatayo iti basol a naaramidtayo. Saannatayo metten a singiren wenno dusaen gapu iti dayta.—Ezek. 18:​21, 22; Ara. 3:19.

15. Ania ti mabalintayo nga aramiden no permi latta a makonkonsiensiatayo gapu kadagiti basol a naaramidtayo iti napalabas?

¹⁵ Kasano a makatulong kadatayo dagiti imbaga ni David iti Salmo 103 tapno patientayo a pinakawannatayon ni Jehova? No permi latta a makonkonsiensiatayo kadagiti basol a naaramidtayo iti napalabas, mabalin nga isaludsodtayo iti bagitayo: ‘Liplipatek kadi ti laglagipen ni Jehova—a managbasolak ken pakawanenna dagiti managbasol a kas kaniak? Laglagipek met kadi dagiti pinili ni Jehova a lipaten—wenno laglagipek kadi dagiti basol a pinakawannan ken saannan nga isingir kaniak?’ Saan nga agpokpokus ni Jehova kadagiti naaramidtayo a basol. Isu nga apay koma a sangkapanunottayo pay dagita? (Sal. 130:3) No patientayo a pinakawannatayon ni Jehova, mapakawantayo met ti bagitayo ken maitultuloytayo ti naragsak a panagserbi kenkuana.

16. Apay a nakadeldelikado no sobra ti pannakakonsiensiatayo kadagiti basol a naaramidtayo iti napalabas? Mangted iti pagarigan. (Kitaen met ti ladawan.)

¹⁶ Panunotem daytoy. No agmanmaneho ti maysa, mabalin a kitaenna ti rearview mirror tapno makitana ti adda iti likudanna ket maliklikanna dagiti posible a peggad. Ngem sagpaminsan laeng nga aramidenna dayta ta nakadeldelikado no ti laengen likud ti kitkitaenna. Tapno ngarud natalged isuna, masapul nga agpokus iti dalan iti sanguananna. Kasta met, makatulong no sagpaminsan a lagipentayo dagiti naaramidantayo a kamali iti napalabas. Apay? Makasursurotayo ngamin kadagita ken tumibker ti determinasiontayo a saanen a mangulit kadagita. Ngem no agpokustayo kadagiti kamalitayo a pinakawanen ni Jehova, mabalin a mapukaw ti rag-otayo ket saantayon a maited ti kasayaatantayo iti panagserbitayo iti Dios. Ania ngarud ti aramidentayo? Agpokustayo iti dalan nga adda iti sanguanantayo. Dayta ti dalan nga agturong iti inkari ti Dios a baro a lubong, a sadiay “saanton a malagip” ti amin a nasaem a napalabastayo.—Isa. 65:17; Prov. 4:25.

ITULTULOYMO A KOMBINSIREN TI PUSOM

17. Apay a masapul nga itultuloytayo a kombinsiren ti pusotayo nga ay-ayatennatayo ni Jehova ken sisasagana a mangpakawan kadatayo?

¹⁷ Masapul nga itultuloytayo a kombinsiren ti pusotayo nga ay-ayatennatayo ni Jehova ken sisasagana a mangpakawan kadatayo. (1 Juan 3:​19, ftn.) Apay? Kayat ngamin ni Satanas a patientayo a saannatayo nga ay-ayaten ken pakawanen ni Jehova gapu ta managbasoltayo. Ngem pamay-an amin dagita ni Satanas tapno pasardengennatayo nga agserbi ken Jehova. Ket namnamaentayo nga ad-adda pay nga aramidenna dayta bayat nga umas-asideg ti panungpalan. Apay? Ammona ngamin nga ababan ti tiempona. (Apoc. 12:12) Ngem ditay ipalubos a mangabak ni Satanas!

18. Ania dagiti mabalinmo nga aramiden tapno makombinsirmo ti pusom nga ay-ayatennaka ni Jehova ken sisasagana a mangpakawan kenka?

¹⁸ Iti napalabas nga artikulo, naammuam dagiti masapul nga aramidem tapno masiguradom nga ay-ayatennaka ni Jehova. Iti daytoy met nga artikulo, naammuam dagiti mabalinmo nga aramiden tapno makombinsirmo ti pusom a pinakawannakan ni Jehova. Kas pagarigan, panunotem no kasano nga inyam-ammo ni Jehova ti bagina. Panunotem no ania ti impaisurat ni Jehova iti Biblia maipapan iti panangpakawanna. Dimo liplipatan nga ammo unay ni Jehova ti pannakaaramidmo isu a pakawanen ken ipakitaannaka iti asi. Laglagipem met a no mangpakawan ni Jehova, interamente a lipatennan ti basolmo. No aramidem dagita, maragsakankanto ta masiguradom nga impakitaannaka ni Jehova iti asi, ket maibagamto met ti kas iti imbaga ni David, “Pagyamanan, Apo Jehova, ta pinakawanmo ‘dagiti basolko’!”—Sal. 32:5.