1925​—100 a Tawenen ti Napalabas

SAAN A NAPASAMAK TI NINAMNAMADA

Idi 1925, ninamnama ti adu nga Estudiante ti Biblia nga agbalinen a Paraiso ti intero a daga. Apay? Inlawlawag ni Brother Albert Schroeder a nagbalin idi agangay a miembro ti Bagi a Manarawidwid: “Impagarup idi ti adu nga umulin idiay langit dagiti natda a pasurot ni Kristo a dinutokan ti espiritu tapno agaridan iti Pagarian. Patien met idi ti adu a mapagungaren dagiti matalek a lallaki a kas kada Abraham, David, ken dadduma pay, tapno agserbida ditoy daga kas prinsipe ti pagarian ti Dios.” Ngem saan a napasamak dayta isu nga adda dagiti kakabsat a naupay.—Prov. 13:12.

Nupay kasta, nagtalinaed a naregta iti trabaho a panangasaba ti kaaduan nga Estudiante ti Biblia. Naawatanda a ti panangasaba maipapan ken Jehova ti kapatgan a trabahoda. Ammuentayo no kasanoda nga inusar ti radio tapno makasabaan ti adu a tattao.

IMMADU TI ESTASION TI RADIO

Idi 1924, adu ti dumdumngeg iti WBBR nga estasiontayo iti radio. Isu nga idi 1925, nangibangon dagiti Estudiante ti Biblia iti maysa pay nga estasion, ngem idiay metten asideg ti Chicago, Illinois. Pinanagananda dayta iti WORD. Kastoy ti inyestoria ni Ralph Leffler, a maysa a radio engineer a timmulong iti panangibangon iti dayta nga estasion: “Adu ti dumdumngeg iti WORD, nangruna no tiempo ti lam-ek.” Kas pagarigan, adda pamilia nga agnanaed iti Pilot Station, Alaska a nasurok a 5,000 a kilometro (3,000 mi) ti kaadayona iti estasion a WORD. Dimngeg dayta a pamilia kadagiti kaunaan a programa a naibrodkas iti estasiontayo. Kalpasanna, nagsurat dayta a pamilia kadagiti kakabsat nga agtrabtrabaho iti estasion tapno agyaman iti makaparegta a naespirituan a programa a nangngeganda.

Imbaga ti Disiembre 1, 1925 a ruar ti The Watch Tower no apay a nagadu ti dumdumngeg iti programa ti WORD. Inlawlawagna: “Ti WORD ti maysa kadagiti kapigsaan ti signalna nga estasion ti radio iti United States. Nalawag a mangngeg dayta iti intero a United States, agraman iti Cuba ken iti kaamiananan a paset ti Alaska. Adu kadagiti saan pay a pulos a nakangngeg iti kinapudno ti naginteres gapu ta nangngegda dayta kadagiti programa ti WORD.”

Iti dayta met la a tiempo, kayat dagiti Estudiante ti Biblia nga usaren ti radio tapno maipakaammo ti naimbag a damag iti Canada. Idi 1924, naibangon ti estasion ti radio a CHUC iti Saskatoon, Saskatchewan. Maysa dayta kadagiti kaunaan nga estasion ti radio iti Canada a mangibrodkas kadagiti tema maipapan iti relihion. Idi 1925, masapul a mayakar dayta iti nalawlawa a lugar. Gapu iti dayta, ginatang ti Watch Tower Society ti Regent Building a maysa a daan a teatro iti Saskatoon sada in-renovate. Idiay nga inyakarda dagiti studio ti estasion a CHUC.

Gapu iti dayta nga estasion, naammuan ti adu a tattao kadagiti nasulinek a paset ti Saskatchewan ti naimbag a damag iti kaunaan a gundaway. Kas pagarigan, iti maysa a naiputputong nga ili, nagsurat ti maysa nga agnagan iti Mrs. Graham tapno agkiddaw iti publikasiontayo a naibatay iti Biblia. Apay? Nangngegna ngamin dagiti programa a naibrodkas iti CHUC. Imbaga ni Brother George Naish a kayat la unay ni Mrs. Graham a maammuan ti kinapudno. Gapu iti dayta, pinatulodanda iti kompleto a set ti Studies in the Scriptures. Di nagbayag, iranranuden ni Mrs. Graham ti mensahe ti Pagarian kadagiti agnanaed iti ad-adayo pay a lugar.

NAGPATEG A KINAPUDNO

Iti Marso 1, 1925 a ruar ti The Watch Tower, adda artikulo a napauluan iti “Birth of the Nation.” Nakapatpateg dayta nga artikulo. Apay? Ammo idin dagiti Estudiante ti Biblia nga adda organisasion ni Satanas a buklen dagiti demonio, ulbod a relihion, gobierno, ken sistema ti komersio. Ngem iti dayta nga artikulo, imbaga “ti matalek ken masirib nga adipen” nga adda met organisasion ni Jehova a naiduma iti organisasion ni Satanas. (Mat. 24:45) Inlawlawag pay ti matalek ken masirib nga adipen nga idi 1914, naipasdeken ti Pagarian ti Dios. Ket iti dayta met la a tawen, naitapuak ni Satanas ken dagiti demoniona ditoy daga kas resulta ti ‘gubat a napasamak idiay langit.’—Apoc. 12:​7-9.

Saan idi a maakseptar ti dadduma dayta a baro a pannakaawat. Isu nga imparegta dayta nga artikulo: “Para kadagiti agbasbasa iti Watch Tower a dida umanamong iti daytoy a pannakaawat, paregtaenmi ida nga agan-anus ken agtalek iti Apo, ken itultuloyda latta ti agserbi a simamatalek kenkuana.”

Nupay kasta, inyestoria ti taga-Britain a ni Tom Eyre, a maysa a colporteur (maawagan itan iti payunir), ti reaksion ti kaaduan nga Estudiante ti Biblia idi nairuar dayta nga artikulo: “Naragsakan dagiti kakabsat idi nabasada dayta a pannakailawlawag ti Apocalipsis 12. Idi naammuanmi a ti Pagarian ket naipasdeken idiay langit, magagarankami unay a mangipakaammo iti dayta. Lallalo a gimmagetkami a nangasaba. Dayta pay ti nakatulong tapno maawatanmi nga adu pay ti nakaskasdaaw nga aramiden ni Jehova iti masanguanan para iti ilina.”

PANANGSAKSI MAIPAPAN KEN JEHOVA

Ita, masansan nga us-usarenen dagiti Saksi ni Jehova ti Isaias 43:10: “‘Dakayo dagiti saksik,’ kuna ni Jehova, ‘Wen, ti adipenko a pinilik.’” Nupay kasta, sakbay ti 1925, manmano a mausar dayta a teksto kadagiti publikasiontayo. Ngem nagbalbaliw dayta. Bayat ti 1925, inlawlawag ti The Watch Tower ti Isaias 43:10 ken 12 iti 11 a ruar dayta a magasin!

Iti ngudo ti Agosto 1925, nagkombension dagiti Estudiante ti Biblia idiay Indianapolis, Indiana. Adda mensahe ni Joseph F. Rutherford para kadagiti delegado, ket mabasa dayta iti programa ti kombension: “Addatayo amin iti daytoy a kombension tapno . . . pabilgen ti Apo ti pakinakemtayo nga aggaggaget a makipaset iti trabaho a panangasaba kas Saksina.” Iti dayta a walo nga aldaw a kombension, naiparegta kadagiti immatender nga ikasabada ti maipapan ken Jehova iti tunggal gundaway.

Iti Sabado, Agosto 29, impalawag ni Brother Rutherford ti tema nga “A Call to Action.” Impaganetgetna ti kinapateg ti trabaho a panangasaba: “Kuna ni Jehova iti ilina . . . : ‘Dakayo dagiti saksik . . . a siak ti Dios.’ Kalpasanna, nalawag nga imbilinna: ‘Mangingatokayo iti senial para kadagiti tattao.’ Awanen ti sabali pay ditoy daga a makaingato iti senial no di laeng ti ili ni Jehova. Ngamin, isuda laeng ti idaldalan ti espirituna, ta isuda laeng dagiti saksina.”—Isa. 43:12; 62:10.

Kalpasan dayta a palawag, binasa ni Brother Rutherford ti resolusion a “Message of Hope.” Immanamong dagiti nakikombension iti linaon dayta a resolusion. Ania kadi ti linaonna? “A ti laeng Pagarian ti Dios ti makaipaay iti talna, kinarang-ay, salun-at, biag, wayawaya, ken agnanayon a kinaragsak.” Naipatarus dayta iti nadumaduma a lengguahe ken nayimprenta kas tract tapno mausar iti panangasaba. Agarup 40 a milion a kopia ti naipaima.

Sumagmamano pay a tawen ti napalabas sakbay nga inusar dagiti Estudiante ti Biblia ti nagan a dagiti Saksi ni Jehova. Ngem in-inut idin a naawatanda no kasano kapateg ti responsabilidadda a mangikasaba iti maipapan ken Jehova kas dagiti saksina.

PANANGSARUNGKAR KADAGITI INTERESADO

Bayat nga umad-adu dagiti Estudiante ti Biblia iti intero a lubong, ad-adda met a naiparegta a sublianda wenno sarungkaranda dagiti interesado iti naimbag a damag. Kalpasan ti kampania a panangiwaras iti tract a Message of Hope, imbilin ti Bulletina: “Sarungkaranyo dagiti naikkanyo iti Message of Hope.”

Nadakamat iti Enero 1925 a ruar ti Bulletin ti kapadasan ti maysa nga Estudiante ti Biblia a taga-Plano, Texas: “Maragragsakankami ta nakitami a masansan nga ad-adu ti interesado kadagiti sinarungkaranmi ngem kadagiti teritoria a damomi pay la a napanan. Kas pagarigan, adda bassit nga ili iti teritoriami a naminlima a sinarungkaranmi iti napalabas a 10 a tawen. . . . Iti nabiit pay, simmarungkar manen sadiay ni Sister Hendrix ken ni nanangko ket ad-adu a libro ti naipaimada ngem idi damo a napanda sadiay.”

Insurat ti maysa a colporteur a taga-Panama: “Adu a tattao ti saanda a kayat ti dumngeg no damok ida a papanan. Ngem no sarungkarak idan iti maminsan wenno mamindua, kayatdan ti dumngeg. Isu nga ita a tawen, nagpokusak iti panagsarungkar kadagiti nakasaritak idi. Ket nagmayat dagiti resulta ti dadduma kadagita.”

PANANGPADAAN ITI MASANGUANAN

Iti ngudo ti 1925, sinuratan ni Brother Rutherford ti amin a colporteur wenno payunir. Imbagana kadakuada dagiti nagapuananda iti trabaho a panangasaba ken no ania dagiti aramidenda iti masanguanan. Imbagana: “Iti napalabas a tawen, naaddaankayo iti pribilehio a mangliwliwa iti adu a malidliday. Sigurado a dayta ti nangparagsak iti pusoyo . . . Iti sumaruno a tawen, addanto manen dagiti gundawayyo nga agbalin a saksi ti Dios ken ti pagarianna ken ipakita no siasino a talaga dagiti agdaydayaw kenkuana. . . . Agkaykaysatayo a mangipigsa iti timektayo ken kantaantayo iti panangidaydayaw ti Dios ken Aritayo.”

Iti ngudo ti 1925, isagsaganan dagiti kakabsat ti plano a mangpalawa kadagiti pasilidad iti Brooklyn. Mangrugin iti 1926 ti kadakkelan pay laeng a proyekto a panagibangon ti organisasiontayo.