Ania ti Itsura ti Diablo?

Sungbat ti Biblia

Ti Diablo ket maysa a di makita nga espiritu a persona. Kayatna a sawen, awan ti pisikal a bagina.—Efeso 6:11, 12.

Masansan a mailadawan ti Diablo a nakaiggem iti tinidor. Kasla kalding ti itsurana nga addaan iti sara ken ipus.

Masansan a mailadawan ti Diablo a kasla kalding nga addaan iti sara, ipus, ken tinidor. Adda dagiti mamati a dagiti kasta a ladawan ti Diablo ket inaramid dagiti pintor a nagbiag nasurok a 1,000 a tawenen ti napalabas. Dagitoy a pintor ket mabalin a naimpluensiaan iti sarsarita ken nagkauna a mitolohia.

Kasano nga inladawan ti Biblia ti Diablo?

Nadumaduma ti panangiladawan ti Biblia iti Diablo. Makatulong dagitoy tapno maawatantayo ti personalidadna, saan a ti langana. Dagitoy ti dadduma a pagarigan:

Anghel ti lawag. Agpampammarang a nasayaat ti panggepna tapno maallukoyna dagiti tattao a mamati kadagiti pannursurona imbes nga iti Dios.—2 Corinto 11:14.
Leon a ngumerngernger. At-atakarenna dagiti agdaydayaw iti Dios.—1 Pedro 5:8.
Dakkel a dragon. Nakabutbuteng, nabileg, ken makadangran.—Apocalipsis 12:9.

Dagiti teksto ti Biblia maipapan iti Diablo

2 Corinto 11:14: “Agpampammarang met ni Satanas kas anghel ti lawag.”

Kaipapananna: Agpampammarang ni Satanas a nasayaat tapno maallilawna dagiti tattao a mamati kadagiti pannursurona imbes nga iti Dios.
Efeso 6:11: “Isuotyo ti kompleto a kabal manipud iti Dios tapno makapagtakderkayo a sititibker maibusor kadagiti nasikap nga aramid ti Diablo.”

Kaipapananna: Al-allilawen ti Diablo dagiti tattao tapno agsukirda iti Dios.
Santiago 4:7: “Agpasakupkayo iti Dios; ngem busorenyo ti Diablo, ket panawannakayto.”

Kaipapananna: Maabak ti maysa a tao ni Satanas babaen ti panagtulnogna iti Dios imbes nga iti Diablo.
1 Pedro 5:8: “Ti kabusoryo, ti Diablo, ket agsursursor a kasla leon a ngumerngernger, nga agsapsapul iti alun-onenna.”

Kaipapananna: Kagura ti Diablo dagidiay agtultulnog iti Dios ken kayatna a dadaelen ti pannakigayyemda Kenkuana.