Ania ti Golden Rule?
Sungbat ti Biblia
Ti termino a “Golden Rule” wenno “Nabalitokan a Bilin” ket saan a mabasa iti Biblia. Ngem adu ti mangus-usar iti dayta a termino a pangtukoy iti maysa a bilin nga insuro ni Jesus. Iti sikat a Sermonna iti Bantay, imbaga ni Jesus: “Aramidenyo . . . kadagiti tattao ti amin a kayatyo nga aramidenda kadakayo.” (Mateo 7:12; Lucas 6:31) Mabalin met nga ibaga ti Golden Rule a kastoy: “Aramidem iti dadduma ti kayatmo nga aramidenda kenka.”—Encyclopedia of Philosophy.
Ania ti kaipapanan ti Golden Rule?
Isursuro ti Golden Rule a tratuentayo ti dadduma a kas iti kayattayo a pannakatrato. Kas pagarigan, kayat ti adu a tattao a maipakitaanda iti respeto, kinaimbag, ken ayat. Isu a kasta met koma ti aramidentayo iti dadduma.—Lucas 6:31.
Apay a makatulong ti Golden Rule?
Makatulong ti Golden Rule iti dandani amin a situasion. Kas pagarigan:
Mangpasayaat iti relasion ti agassawa.—Efeso 5:28, 33.
Mangidalan kadagiti nagannak bayat a padpadakkelenda dagiti annakda.—Efeso 6:4.
Mangpasayaat iti relasion dagiti aggagayyem, agkakaarruba, ken agkakatrabahuan.—Proverbio 3:27, 28; Colosas 3:13.
Ti Golden Rule ket kapada ti prinsipio iti kaaduan a paset ti maaw-awagan a Daan a Tulag. Ti bilin ni Jesus ket isu ti “isursuro ti Linteg [ti umuna a lima a libro ti Biblia] ken dagiti Propeta [dagiti libro a nakaisuratan dagiti padto].” (Mateo 7:12) Kayatna a sawen, ipakita ti Golden Rule ti maysa nga importante a kinapudno manipud iti Daan a Tulag: ayatem ti kaarrubam.—Roma 13:8-10.
Ti kadi Golden Rule ket basta laeng panangted ken panangawat?
Saan. Ti ad-adda nga isuro ti Golden Rule ket panangted. Idi imbilin ni Jesus ti Golden Rule, isursurona no kasano a tratuen dagiti tattao uray dagiti kabusorda. (Lucas 6:27-31, 35) Isu nga isursuro ti Golden Rule nga aramiden ti nasayaat iti amin a tao.
Kasanom a maaramid ti Golden Rule?
1. Agobserbarka. Obserbaram a naimbag ti sabsabali. Kas pagarigan, baka adda makitam a marigrigatan a mangbagkat kadagiti ginatangna, nadamagmo a nayospital ti kaarrubam, wenno napansinmo a malidliday ti katrabahuam. No “sapulenyo dagiti pagimbagan ti dadduma,” makakitakayo iti tsansa a mangibaga ken mangaramid iti makatulong kadakuada.—Filipos 2:4.
2. Makipagriknaka. Imadyinem a sika ti adda iti situasion ti maysa a tao. Ania ti mariknam? (Roma 12:15) No maawatam ti marikrikna ti dadduma, kayatmo ida a tulongan.
3. Makibagayka. Tandaanam nga agduduma dagiti tattao. Ti kayat ti sabali a pannakatrato ket baka saan a kas iti kayatmo a pannakatrato. Isu nga uray adu ti mabalinmo nga aramiden, aramidem ti ad-adda a mangparagsak kadakuada.—1 Corinto 10:24.