Ania ti Ibaga ti Biblia Maipapan iti Panagasawa?

Sungbat ti Biblia

Kalpasan a pinarsua ti Dios ti umuna a lalaki ken babai, pinagtiponna ida kas agassawa. Inyurnosna ti panagasawa kas espesial a relasion iti nagbaetan ti lalaki ken babai nga agserbi a pundasion ti pamilia.—Genesis 1:27, 28; 2:18.

Kayat ti Dios a naragsak dagiti agassawa. (Proverbio 5:18) Iti Biblia, nangipaay kadagiti paglintegan iti panagasawa, kasta met kadagiti prinsipio a makatulong tapno agballigi ti panagasawa.

Iti daytoy nga artikulo

• Ania ti paglintegan ti Dios para iti panagasawa?

• Ania ti ibaga ti Biblia maipapan iti panagsina ken diborsio?

• Masapul kadi a legal a mairehistro ti panagasawa tapno aprobaran ti Dios?

• Ania ti ibaga ti Biblia a papel ken responsabilidad ti asawa a lalaki ken asawa a babai?

• Ibagbaga kadi ti Dios a masapul a maaddaan ti annak dagiti agassawa?

• Kasano a makatulong ti Biblia iti panagasawa?

• Dagiti bersikulo ti Biblia maipapan iti panagasawa

Ania ti paglintegan ti Dios para iti panagasawa?

Manipud pay idi, inaramid ti Dios ti panagasawa kas panagtipon ti maysa a lalaki ken maysa a babai. (Genesis 2:24) Saan nga aprobaran ti Dios ti poligamia (adu ti asawana), homoseksual nga ar-aramid, wenno panagdenna dagiti saan a nagkasar. (1 Corinto 6:9; 1 Tesalonica 4:3) Insuro ni Jesus kadagiti pasurotna a surotenda ti orihinal a paglintegan ti Dios iti panagasawa.—Marcos 10:6-8.

Para iti Dios, ti panagasawa ket permanente a relasion. No agkasar ti lalaki ken babai, ikarida nga agmatalekda iti maysa ken maysa ken agkaduada bayat a sibibiagda. Ekspektaren ti Dios a tungpalenda dayta a karida.—Marcos 10:9.

Ania ti ibaga ti Biblia maipapan iti panagsina ken diborsio?

Adda dagiti gundaway nga aginnadayo ti agassawa, kas no maysa kadakuada ket masapul nga agbiahe tapno asikasuenna ti emergency ti pamiliana. Ngem saan nga iparparegta ti Biblia ti panagsina gapu laeng kadagiti problema iti panagasawa. Imbes ketdi, ibagbagana nga ikagumaan koma dagiti agassawa a solbaren ti problemada.—1 Corinto 7:10.

Ti pannakikamalala ti kakaisuna nga ibaga ti Biblia a rason ti panagdiborsio. (Mateo 19:9) No ngarud nagdesision ti agassawa nga agsina wenno agdiborsio a saan a pannakikamalala ti rason, saanda a nawaya maibatay iti Kasuratan a makiinnarem wenno agasawa manen.—Mateo 5:32; 1 Corinto 7:11.

Masapul kadi a legal a mairehistro ti panagasawa tapno aprobaran ti Dios?

Ekspektaren ti Dios a suroten dagiti Kristiano dagiti paglintegan ti gobierno maipapan iti panagkasar. (Tito 3:1) No posible a legal nga irehistro ti agassawa ti kasarda, ti panangaramidda iti dayta ipakpakitana a resrespetuenda dagiti sekular nga autoridad ken ti paglintegan ti Dios a ti panagasawa ket permanente a tulagan.a

Ania ti ibaga ti Biblia a papel ken responsabilidad ti asawa a lalaki ken asawa a babai?

• Dagiti responsabilidadda a dua. Masapul nga ayaten ken respetuen ti agassawa ti maysa ken maysa. (Efeso 5:33) Masapul nga ipaayda ti seksual a kasapulan ti asawada iti nadungngo a pamay-an ken liklikanda ti amin a kita ti di kinamatalek. (1 Corinto 7:3; Hebreo 13:4) No addaan dagiti agassawa iti annak, responsabilidadda a dua a padakkelen dagiti annakda.—Proverbio 6:20.

  

  Saan a detalyado nga ibaga ti Biblia no kasano nga agtinnulong dagiti agassawa ken no sino ti agtrabaho iti sekular wenno agtrabaho iti balay. Isuda ti agdesision no ania ti kasayaatan para iti pamiliada.

• Papel ti asawa a lalaki. Ibaga ti Biblia a “ti asawa a lalaki ti ulo ti asawana a babai.” (Efeso 5:23) Isuna ti ulo ti pamilia ta isu ti masapul a mangiturong iti pamiliana ken mangaramid kadagiti desision a pagsayaatan ni baketna ken dagiti annakda.

  

  Masapul a siguraduenna a maipapaay ti pisikal, emosional, ken naespirituan a kasapulanda. (1 Timoteo 5:8) Ipakitana nga ap-apresiarenna dagiti kualidad ken paglaingan ni baketna no makitinnulong kenkuana ken ikabilanganna a naimbag ti opinion ken rikrikna ni baketna no agar-aramid kadagiti desision. (Proverbio 31:11, 28) Ibaga ti Biblia nga itungpal ti asawa a lalaki dagiti responsabilidadna iti naayat a pamay-an.—Colosas 3:19.

• Papel ti asawa a babai. Ibaga ti Biblia a “masapul nga adda nauneg a respeto ti babai iti asawana a lalaki.” (Efeso 5:33) Maragsakan ti Dios no respetuen ti babai ti papel nga inted ti Dios ken lakayna.

  

  Ti papelna ket tulonganna ni lakayna nga agaramid kadagiti nasayaat a desision ken suportaranna ti kinaulona. (Genesis 2:18) Padayawan ti Biblia ti asawa a babai a mangtungtungpal iti importante a papelna iti panagasawa.—Proverbio 31:10.

Ibagbaga kadi ti Dios a masapul a maaddaan ti annak dagiti agassawa?

Saan. Idi un-unana, imbilin ti Dios nga aganak ti dadduma nga agdaydayaw kenkuana. (Genesis 1:28; 9:1) Ngem saan nga agaplikar kadagiti Kristiano dayta a bilin. Saan a pulos nga imbilin ni Jesus kadagiti pasurotna a maaddaanda iti annak. Saan met nga imbaga dagiti nagkauna nga adalanna a masapul nga aganak dagiti agassawa. Dagiti agassawa ti agdesision no kayatda ti maaddaan iti annak.

Kasano a makatulong ti Biblia iti panagasawa?

Adda dagiti prinsipio iti Biblia a makatulong kadagiti agassawa a mangirugi iti nasayaat a panagasawa. Makatulong met dagiti prinsipio ti Biblia tapno maliklikan wenno masolbar dagiti problema.

Dagiti prinsipio ti Biblia a makatulong kadagiti agassawa . . .

• a mangipakita iti pudpudno nga ayat.—1 Corinto 13:4-7; Colosas 3:14.

• a mangsolbar kadagiti di pagkinnaawatan.—1 Corinto 10:24.

• a dumngeg a naimbag.—Santiago 1:19.

• a mangipakita iti respeto.—Roma 12:10.

• a mamakawan.—1 Pedro 4:8.

• nga agbalin a matalek.—Marcos 10:9.

• nga agan-anus.—Efeso 4:2, 3.

• a makitinnulong.—Eclesiastes 4:9.

• a mangpatibker iti panagasawa.—Kanta ni Solomon 8:7.