AGTULTULOYKAYO NGA AGBANTAY!
Relihion ken Gubat Idiay Ukraine—Ania ti Ibagbaga ti Biblia?
Kitaem dagitoy nga impormasion maipapan kadagiti prominente a lider ti relihion ken iti gubat idiay Ukraine:
“Ti lider ti Russian Orthodox Church a ni Patriarch Kirill, awan ti ibagbagana kontra iti panangatake ti Russia. . . . Ti Simbaanna ket agiwarwaras kadagiti propaganda wenno saan nga agpayso nga estoria maipapan iti Ukraine ken us-usaren dagita ni Putin tapno maikalinteganna ti gubat.”—EUobserver, Marso 7, 2022.
“Imbaga ni Patriarch Kirill . . . a nainkalintegan unay ti panangsakup ti pagilianna iti Ukraine ta paset kano dayta ti panangikagumaan a manglaban iti basol.”—AP News, Marso 8, 2022.
“Idi Lunes, ti lider ti Ukrainian Orthodox Church a ni Metropolitan Epiphanius I of Kyiv, binendisionanna dagiti kailianna tapno ‘labananda dagiti taga-Russia a simmakup’ . . . Imbagana met a saan a basol ti panangpapatay kadagiti soldado ti Russia.”—Jerusalem Post, Marso 16, 2022.
Kastoy ti imbaga ti Ukrainian Council of Churches and Religious Organizations (UCCRO): “Suportaranmi ti militar ti Ukraine ken ti amin a lumablaban tapno maidepensa ti pagilianmi, bendisionanmi ida iti panangidepensada iti Ukraine manipud kadagiti kalaban, ken ikarkararaganmi ida.”—UCCROa Statement, Pebrero 24, 2022.
Panagkunam? Dagiti kadi relihion a mangibagbaga a pasurot ida ni Jesu-Kristo masapul nga iparegtada kadagiti miembroda a makigubatda? Ania ti ibagbaga ti Biblia?
Ti pakasaritaan ti relihion iti gubat
Ipakita ti historia a ti gubat ket masansan a konkonsintiren, ikalkalintegan, wenno iparparegta pay ketdi ti relihion bayat nga agpampammarang nga ikagkagumaanna a maadda ti talna. Iti adun a dekada, ipakpakaammo dagiti Saksi ni Jehova ti kasta a panaginsisingpet ti relihion. Kitaem dagitoy a pagarigan a nadakamat kadagiti publikasionmi.
Ipakita ti artikulo a “Dagiti Krusada—‘Nakalkaldaang nga Ilusion’” a ti Iglesia Katolika Romana ti promotor kadagiti masaker a naaramid iti nagan ti Dios ken ni Kristo.
Deskribiren ti artikulo a “Ti Iglesia Katolika Idiay Africa” no kasano a saan a linapdan ti relihion dagiti panaggiginnubat dagiti tribu ken uray ti inggagara pay ketdi a panangpapatay iti nagadu nga umili.
Dagiti artikulo a “Mapabasol Kadi ti Relihion?,” “Ti Akem ti Relihion iti Gubgubat ti Tao,” ken “Adda Dasigan ti Relihion” ilawlawagda no kasano a ti papadi dagiti Katoliko, Orthodox, ken Protestante supsuportaranda ti agsumbangir a dasig ti adu a gubat.
Masapul kadi a suportaran dagiti Kristiano a relihion ti gubat?
Ti insuro ni Jesus: “Masapul nga ayatem ti kaarrubam a kas iti bagim.” (Mateo 22:39) “Itultuloyyo nga ayaten dagiti kabusoryo.”—Mateo 5:44-47.
Panunotem: Maibaga kadi ti maysa a relihion nga isu ket agtultulnog kadagiti bilin ni Jesus maipapan iti ayat no iparparegtana met kadagiti miembrona a pumatayda no adda gubat? Para iti sungbat, basaem dagiti artikulo a “Dagiti Pudno a Kristiano ken ti Gubat” ken “Mabalinmo Kadi nga Ayaten Dagiti Kabusormo?”
Ti imbaga ni Jesus: “Ti Pagariak ket saan a paset daytoy a lubong. No ti Pagariak ket paset daytoy a lubong, nakilaban koma dagiti pasurotko tapno saanak a mayawat.” (Juan 18:36) “Ti mangusar iti espada matayto iti espada.”—Mateo 26:47-52.
Panunotem: No dagiti Kristiano ket saan a limmaban tapno maprotektaranda ni Jesus, rumbeng kadi a makilabanda para iti aniaman a sabali a rason? Basaem ti artikulo a “Maiparbeng Kadi a Makigubat Dagiti Kristiano?” tapno maammuam no kasano a simamatalek a sinurot dagiti nagkauna a Kristiano ti ulidan ken dagiti pannursuro ni Jesus.
Anianto ti mapasamak kadagiti relihion a mangiparparegta iti gubat?
Isursuro ti Biblia a saan nga awaten ti Dios dagiti relihion a mangibagbaga a pasurotda ida ni Jesus ngem saanda met a sursuroten dagiti pannursurona.—Mateo 7:21-23; Tito 1:16.
Ipakita ti libro nga Apocalipsis a para iti Dios, dagiti kasta a relihion ti manungsungbat iti dara ti “amin a napapatay ditoy daga.” (Apocalipsis 18:21, 24) Tapno maammuam no apay, basaem ti artikulo nga “Ania ti Babilonia a Dakkel?”
Imbaga ni Jesus a madadaelto ti amin a relihion a saan nga awaten ti Dios gapu kadagiti dakes nga aramidda, no kasano a ti dakes a kayo nga agbunga iti dakes ket “mapukan ken mapuoran.” (Mateo 7:15-20) Basaem ti artikulo nga “Asidegen nga Agpatingga ti Palso a Relihion!” tapno maammuam no kasano a mapasamak dayta.
Photo credits, kannigid nga agpakannawan: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Ti UCCRO, wenno Ukrainian Council of Churches and Religious Organizations, ket buklen ti 15 a relihion a mangirepresentar kadagiti Orthodox, Greek ken Roman Catholic, Protestant, ken Evangelical a denominasion agraman kadagiti Judio ken Muslim.