Dagiti Rason nga Adda Namnama iti 2023—Ania ti Ibaga ti Biblia?

Bayat a mangrugi ti tawen 2023, namnamaentayo amin a nasayaat ti mapasamak kadatayo ken iti pamiliatayo. Apay nga adda namnamatayo iti masanguanan?

Mangted ti Biblia iti namnama

Ibagbaga ti Biblia ti naimbag a damag a dagiti problema a sangsanguentayo ita ket temporario ken dandanin masolusionan. Kinapudnona, ti Biblia ket “naisurat a pakasursuruantayo, tapno maaddaantayo koma iti namnama. . . babaen ti liwliwa manipud iti Kasuratan.”—Roma 15:4.

• Tapno maammuam ti ad-adu pay maipapan kadagiti kari ti Biblia, basaem ti artikulo nga “Adda Nasaysayaat a Masakbayan.”

Ti namnama a makatulong kenka itan

Ti namnama nga ikarkari ti Biblia ket kas iti “angkla ti biagtayo.” (Hebreo 6:19, footnote) Dayta a namnama pagtalinaedennatayo a kalmado. Matulongannatayo dayta tapno makayatayo dagiti agdama a problematayo, agbalintayo a positibo, ken maaddaantayo iti manayon a ragsak. Kas pagarigan:

• Kitaem no kasano a nakatulong ti namnama nga ikarkari ti Biblia iti maysa a lalaki a nanglaban iti adiksionna. Buyaem ti video a Naumaakon iti Panagbiagko.

• Kitaem no kasano a makatulong kadatayo ti namnama nga ikarkari ti Biblia no adda matay nga ay-ayatentayo iti biag. Buyaem ti video a Liwliwa Para Kadagiti Natayan.

Paraniagem ti namnamam

Adu ti mangnamnama kadagiti nasayaat a bambanag, ngem dida masigurado no dagita a namnamaenda ket agbalin a realidad. Naiduma dagiti kari ti Biblia. Apay? Gapu ta inkari a mismo dagita ni Jehova a Diosa, “a saan a mabalin nga agulbod.” (Tito 1:2) Ni laeng Jehova ti addaan pannakabalin a mangtungpal iti amin a karina; maaramidna ti “amin a pagragsakanna nga aramiden.”—Salmo 135:5, 6.

Kayatmi a mapadasam dagiti pagimbagan nga ited ti mapagtalkan a namnama nga ikarkari ti Biblia. Mapatibkermo ti panagtalekmo iti dayta babaen ti ‘panangsukimatmo iti Kasuratan.’ (Aramid 17:11) Tapno makitam a mismo no kasano, padasem ti iyaw-awismi a libre a panagadal iti Biblia. Rugiam ti tawen 2023 nga addaan namnama!