Nakabarbara a Summer ti 2023—Ania ti Ibaga ti Biblia?

Mapaspasaran dagiti tattao iti intero a lubong ti kapupudotan pay laeng a paniempo ken dagiti kalamidad nga epekto dayta. Kitaenyo dagitoy a report:

• “Daytoy pay laeng ti kababaraan a Hunio sipud idi rinugian ti tao nga irekord ti temperatura iti intero a lubong, 174 a tawenen ti napalabas.”—National Oceanic and Atmospheric Administration, U.S. Department of Commerce, Hulio 13, 2023.

• “Mapaspasaran ti Italy, Spain, France, Germany ken Poland ti nakaro a pudot a manamnama a ngumato pay iti 48°C [118°F] kadagiti isla ti Sicily ken Sardinia. Mabalin a daytanto ti kababaraan a temperatura a mairekord iti Europa.”—European Space Agency, Hulio 13, 2023.

• “Bayat a bumarbara ti lubong, ekspektarentayo a nasansansan ken napigpigsa met dagiti tudo, nga agresulta iti nakarkaro a panaglayus.”—Stefan Uhlenbrook, direktor ti hydrology, water and cryosphere iti World Meteorological Organization, Hulio 17, 2023.

Madanaganka kadi iti umad-adu a report maipapan iti kumarkaro wenno abnormal a paniempo? Kitaem ti ibaga ti Biblia maipapan iti daytoy napateg a topiko.

Kaitungpalan kadi ti padto ti Biblia ti abnormal a paniempo?

Wen. Ti sangalubongan a panagbara ken dadduma pay nga abnormal a paniempo ket karaman kadagiti impadto ti Biblia a mapasamak iti tiempotayo. Kas pagarigan, impadto ni Jesus a makakitatayo kadagiti “nakabutbuteng a buya,” wenno ‘nacakigkigtot a pagilasinan.’ (Lucas 21:11; Ti Biblia) Gapu iti panagbara ti temperatura, madanagan ti adu a baka saanton a mabalin a pagyanan ti daga gapu iti panangdadael ti tao.

Mapagyananto pay kadi ti daga?

Wen. Pinarsua ti Dios ti daga a permanente a pagtaengantayo. Saanna nga ipalubos a dadaelen dayta dagiti tattao. (Salmo 115:16; Eclesiastes 1:4) Kinapudnona, inkarina a ‘dadaelenna dagidiay mangdaddadael iti daga.’—Apocalipsis 11:18.

Ipakita ti Biblia a kabaelan ken talaga a protektaran ti Dios ti daga kadagiti makadadael a kalamidad.

• “[Ti Dios] pinagkalmana ti nakapigpigsa nga angin; ket nagtalna dagiti dalluyon ti baybay.” (Salmo 107:29) Adda pannakabalin ti Dios a mangkontrol kadagiti puersa ti nakaparsuaan. Kayana a solusionan dagiti problema iti aglawlaw kas resulta ti abnormal a paniempo a mangparparigat kadagiti tattao.

• “Ay-aywanam ti daga, pagbalinem a nakabungbunga ken nakatabtaba.” (Salmo 65:9) Bendisionanto ti Dios ti daga ket agbalinto a paraiso dayta.

Tapno ad-adu pay ti maammuam maipapan iti kari ti Biblia a pannakaisubli ti nasayaat nga aglawlaw, kitaem ti artikulo nga “Asino ti Makapasardeng iti Pannakaperdi ti Daga?”