Kaano nga Agpatingga ti Panaglalaban?—Ania ti Ibaga ti Biblia?

“Itan ti tiempo a pagkalmaen ken lapdan a kumaro ti situasion. Itan ti tiempo nga agteppel,” kuna ti United Nations Secretary-General a ni António Guterres maipapan iti direkta a panangatake ti Iran iti Israel idi Sabado, Abril 13, 2024.

Ti panaglalaban iti Middle East ket maysa a pagarigan kadagiti mapaspasamak iti intero a lubong.

“Mapaspasaran ti lubong ita ti kangatuan a bilang dagiti naranggas a panaglalaban sipud idi Maikadua a Gubat Sangalubongan, ket 2 a bilion a tattao—maysa iti kada uppat a tao—ti apektado.”—United Nations Security Council, Enero 26, 2023.

Mapaspasamak dagiti naranggas a panaglalaban kadagiti lugar a kas iti Israel, Gaza, Syria, Azerbaijan, Ukraine, Sudan, Ethiopia, Niger, Myanmar, ken Haiti.a

Kaano nga agpatingga ti panaglalaban? Kabaelan kadi dagiti lider iti lubong nga iyeg ti talna? Ania ti ibaga ti Biblia?

Dagiti gubat iti lubong

Ipakita dagiti panaglalaban iti lubong ita nga asidegen nga agpatingga ti amin a gubat. Dagitoy a gubat ket kaitungpalan ti padto ti Biblia maipapan iti tiempo a pagbibiagantayo. Awagan dayta ti Biblia a “ti panungpalan daytoy a sistema ti bambanag.”—Mateo 24:3.

• “Makadamagkayto kadagiti gubat iti nadumaduma a lugar. . . . Bumusorto ti nasion iti sabali a nasion ken ti pagarian iti sabali a pagarian.”—Mateo 24:6, 7.

Basaem ti artikulo nga “Ania ti Pagilasinan ti ‘Maudi nga Al-aldaw,’ Wenno ‘Tiempo ti Panungpalan’?” tapno maammuam no kasano a dagiti gubat ita ket kaitungpalan ti padto ti Biblia.

Ti gubat a mangpasardeng iti amin a gubat

Ipakpakauna ti Biblia nga agpatingga ti amin a panaglalaban. Kasano a mapasamak dayta? Saan a babaen ti panagregget ti tao, no di ket babaen ti Armagedon a “gubat ti naindaklan nga aldaw ti Dios a Mannakabalin-amin.” (Apocalipsis 16:14, 16) Kalpasan daytoy a gubat, tungpalenton ti Dios ti karina kadagiti tattao nga iyegna ti agnanayon a talna.—Salmo 37:10, 11, 29.

Tapno maammuam ti ad-adu pay maipapan iti gubat ti Dios a mangpasardeng iti amin a gubat, basaem ti artikulo nga “Ania ti Gubat ti Armagedon?”