Kinaranggas Gapu iti Politika—Ania ti Ibaga ti Biblia?

Gagangay itan a biktima iti kinaranggas dagiti opisial ti gobierno.

Apay a nakaad-adu ti kinaranggas gapu iti politika? Agpatingganto pay ngata dayta? Ania ti ibaga ti Biblia?

Naipakpakauna ti pannakabingaybingay gapu iti politika

Nabayagen nga imbaga ti Biblia nga iti tiempotayo a maaw-awagan iti “maudi nga al-aldaw,” adu a tattao ti addaanto kadagiti ugali a mangpakpakaro iti kinaranggas ken di panagkikinnaawatan.

“Iti maudi nga al-aldaw, dumtengto dagiti delikado ken narigat a tiempo. Ta . . . dagiti tattao [ket] . . . saan a managyaman, saan a matalek, . . . saanda a kayat ti makitulag, . . . nauyong, . . . traidor, natangken ti uloda, napannakkel.”—2 Timoteo 3:1-4.

Nabayag metten a naibaga iti Biblia nga iti maudi nga al-aldaw, normalto laengen dagiti riribuk kas iti panagrebelde iti gobierno ken gulo iti politika. (Lucas 21:9, footnote) Ngem agpatingganto ti kinaranggas gapu iti politika ken pannakabingaybingay.

Agpatingganto ti kinaranggas gapu iti politika

Ibaga ti Biblia a ti amin a gobierno ti tao ket suktanto ti Dios iti gobiernona idiay langit.

“Mangipasdekto ti Dios ti langit iti maysa a pagarian. . . . Rumeken ken pagpatinggaennanto amin dagitoy [a dadduma pay] a pagarian, ket daytanto laeng ti agtalinaed iti agnanayon.”—Daniel 2:44.

Iti panangituray ti Pagarian ti Dios, agkaykaysanton dagiti tattao ken natalnanton ti intero a lubong.

Ti Agturay a ni Jesu-Kristo ket maawagan iti “Prinsipe ti Kappia,” ken siguraduenna a “saanto nga agpatingga ti kappia.”—Isaias 9:6, 7.
Uray ita, sursuruenen dagiti iturturayan dayta a Pagarian no kasano ti agbalin a mannakikappia. Gapu iti dayta, ibaga ti Biblia: “Pitpitendanto ti espadada a pagbalinen a subsob ti arado ken dagiti pikada a pagbalinen a kumpay. Saanto a mangilayat ti nasion iti espada maibusor iti sabali a nasion, ken saandanto metten a sursuruen ti makigubat.”—Isaias 2:3, 4.

Tapno maammuam ti ad-adu pay, basaem ti artikulo nga “Anianto ti Aramiden ti Pagarian ti Dios?” ken buyaem ti video nga Ania ti Pagarian ti Dios?