Ania a Talaga ti Kaipapanan ti Panagbalin a Kristiano?​—Ania ti Ibaga ti Biblia?

Adu a tattao iti intero a lubong ti mangipampannakkel a Kristianoda. Ngem saan met a nasayaat ti panangtratoda iti dadduma. Adda dagidiay saan a napudno, saan a nasingpet, wenno bagida laeng ti pampanunotenda. Adda met dagidiay mangtraidor iti asawada. Gapu iti dayta, mapampanunot ti dadduma: ‘Kasta kadi a talaga ti Kristiano?’

Ti talaga a kaipapanan ti panagbalin a Kristiano

Nalaka laeng nga ibaga ti maysa a Kristiano isuna. Ngem umdas kadi daytan? Sigun iti Biblia, ti Kristiano ket maysa nga adalan ni Jesu-Kristo. (Aramid 11:26) Kuna ni Jesus: “No agtalinaedkayo iti saok, pudno a dakayo dagiti adalak.” (Juan 8:31) Siempre, awan ti tao a naan-anay a makasurot iti amin nga imbaga ni Jesus. Ngem ikagkagumaan a suroten ti maysa a Kristiano dagiti pannursuro ni Jesus ken ar-aramidenna dagita iti inaldaw. Dagitoy ti dadduma a pagarigan.

Ipakpakita dagiti Kristiano ti managsakripisio nga ayat

Ti imbaga ni Jesus: “Mangtedak iti baro a bilin, nga ayatenyo ti maysa ken maysa; no kasano ti panangayatko kadakayo, kasta met ti panagiinnayatyo. Maammuanto ti amin a dakayo dagiti adalak—no agiinnayatkayo.”—Juan 13:34, 35.

Ti inaramid ni Jesus: Impakita ni Jesus ti managsakripisio nga ayatna iti amin, aniaman ti estado ti biagda wenno ti naggapuanda. Pinaimbagna dagiti masakit, pinakanna dagiti mabisin, ken uray la intedna ti biagna para iti amin.—Mateo 14:14-21; 20:28.

Ti ar-aramiden dagiti Kristiano: Ipakpakita dagiti Kristiano ti managsakripisio nga ayat babaen ti panagbalin a naparabur, patas, ken manangpakawan. Tultulonganda dagiti tattao nga agkasapulan, ken nakasaganada nga agsakripisio para iti sabsabali.—1 Juan 3:16.

Napudno dagiti Kristiano

Ti imbaga ni Jesus: “Siak ti . . . kinapudno.”—Juan 14:6.

Ti inaramid ni Jesus: Napudno ni Jesus iti amin nga imbaga ken inaramidna. Saanna a pulos inallilaw wenno linoko ti asinoman. Pagaammo isuna a napudno, uray pay no guraen dagiti tattao.—Mateo 22:16; 26:63-67.

Ti ar-aramiden dagiti Kristiano: Saan nga agulbod dagiti Kristiano. Agbaybayadda iti buis, saanda nga agtaktakaw, ken nagagetda iti trabaho tapno sulit ti ibaybayad ti amoda. (Roma 13:5-7; Efeso 4:28) Saanda met nga agsuitik, agkopia iti eksam, wenno agusar kadagiti peke nga impormasion no agaplayda iti trabaho wenno iti dadduma a dokumento.—Hebreo 13:18.

Nasingpet dagiti Kristiano

Ti imbaga ni Jesus: “Umaykayo kaniak, dakayo amin a nabannog ken madagdagsenan, ket pagin-awaenkayto. Alaenyo ti sangolko ken agsursurokayo kaniak, ta naalumamay ken napakumbabaak, ket magin-awaankayto. Ta naasi ti sangolko, ken nalag-an ti awitko.”—Mateo 11:28-30.

Ti inaramid ni Jesus: Nasingpet ken nalaka a maas-asitgan ni Jesus. Inawatna dagiti ubbing, liniwliwana dagiti marigrigatan, ken impakitana ti respeto iti amin.—Marcos 10:13-15; Lucas 9:11.

Ti ar-aramiden dagiti Kristiano: Nasingpet ti pannakisarita dagiti Kristiano. Saan a bastos wenno nasakit ti panagsasaoda. (Efeso 4:29, 31, 32) Pampanunotenda ti pagimbagan ti dadduma ken agbirbirokda kadagiti gundaway a tumulong.—Galacia 6:10.

Kanayon a matalek dagiti Kristiano iti asawada

Ti imbaga ni Jesus: “Ti pinagtipon ti Dios, saan koma a pagsinaen ti tao.”—Marcos 10:9.

Ti inaramid ni Jesus: Uray awan asawa ni Jesus, pinaregtana dagiti naasawaan nga agmatalekda iti asawada. (Mateo 19:9) Nangpakdaar maipapan kadagiti aramid a mabalin a mangdadael iti relasion dagiti agassawa.—Mateo 5:28.

Ti ar-aramiden dagiti Kristiano: Liklikan dagiti Kristiano ti agaramid iti banag a saan a mangpadayaw iti asawada. (Hebreo 13:4) Ay-ayaten ken resrespetuenda ti maysa ken maysa.—Efeso 5:28, 33.