Ania ti Pagilasinan ti “Maudi nga Al-aldaw,” Wenno “Tiempo ti Panungpalan”?
Sungbat ti Biblia
Iladawan ti Biblia dagiti pasamak, situasion, ken ug-ugali dagiti tattao a mangipakita nga addatayon iti tiempo ti ‘panungpalan [ti agdama] a sistema ti bambanag,’ wenno “panungpalan ti lubong.” (Mateo 24:3; Ti Baro a Naimbag a Damag Biblia) Awagan ti Biblia daytoy a tiempo iti “maudi nga al-aldaw,” wenno “tiempo ti panungpalan.”—2 Timoteo 3:1; Daniel 8:19.
Ania ti dadduma a padto ti Biblia maipapan iti “maudi nga al-aldaw”?
Impakpakauna ti Biblia ti adu a bambanag nga aggigiddan a mapasamak kas “pagilasinan” ti maudi nga al-aldaw. (Lucas 21:7) Kitaem ti dadduma a pagarigan:
Gubat a mapaspasamak iti intero a lubong. Impakpakauna ni Jesus: “Bumusorto ti nasion iti sabali a nasion ken ti pagarian iti sabali a pagarian.” (Mateo 24:7) Kasta met, adda nadakamat iti Apocalipsis 6:4 a kumakabalio a mangirepresentar iti gubat, “a mangikkat iti talna iti daga.”
Bisin. Impakpakauna ni Jesus: ‘Addanto bisin.’ (Mateo 24:7) Impakpakauna ti libro nga Apocalipsis nga adda sabali pay a simboliko a kumakabalio, a ti panagsakayna agresulta iti bisin iti adu a lugar.—Apocalipsis 6:5, 6.
Napipigsa a Ginggined. Imbaga ni Jesus nga addanto “ginggined iti nadumaduma a lugar.” (Mateo 24:7; Lucas 21:11) Umad-adu ita ti agrigrigat ken matmatay gapu kadagiti napipigsa a ginggined iti intero a lubong.
Saksakit. Imbaga ni Jesus nga addanto epidemia, wenno “makapapatay a saksakit.”—Lucas 21:11.
Krimen. Nupay ginasuten a tawen nga adda dagiti mapaspasamak a krimen, impakpakauna ni Jesus nga iti maudi nga al-aldaw, ‘nakarkaronto [pay] ti kinadakes.’—Mateo 24:12.
Pannakadadael ti daga. Impadto ti Apocalipsis 11:18 a dagiti tattao ‘dadaelendanto ti daga.’ Daddadaelenda ti daga saan laeng a babaen kadagiti naranggas ken naagum nga ar-aramidda, no di ket igaggagarada a daddadaelen ti aglawlaw.
Dumakdakes nga ug-ugali dagiti tattao. Iti 2 Timoteo 3:1-4, impakpakauna ti Biblia nga adunto ti “saan a managyaman, saan a matalek, . . . saanda a kayat ti makitulag, manangpadakes, awanan panagteppel, nauyong, kagurada ti kinaimbag, traidor, natangken ti uloda, napannakkel.” Kumaronto a kumaro dagita nga ug-ugali nga isunto ti nalawag a mangipakita nga addatayon iti “delikado ken narigat a tiempo.”
Pannakadadael ti nasayaat a relasion ti pamilia. Impakpakauna ti Biblia iti 2 Timoteo 3:2, 3 nga adunto a tattao ti ‘maawan ti ayatda’ iti pamiliada ken adunto nga annak ti agbalin a ‘nasukir kadagiti nagannakda.’
Pannakapukaw ti ayat dagiti tattao iti Dios. Impadto ni Jesus: “Lumamiisto ti ayat ti ad-adu.” (Mateo 24:12) Ti kayat a sawen ni Jesus ket lumamiisto ti ayat ti kaaduan a tattao iti Dios. Kasta met, ibagbaga ti 2 Timoteo 3:4 nga iti maudi nga al-aldaw, dagita a tattao “ayatenda ti ragragsak imbes a ti Dios.”
Panagpammarang ti dadduma a relihiosoda. Iti 2 Timoteo 3:5, impadto ti Biblia a pagparangento dagiti tattao nga agdaydayawda iti Dios ngem ti agpayso, saanda met a sursuroten dagiti bilinna.
Lumawlawag a pannakaawat kadagiti padto ti Biblia. Naipakpakauna iti libro a Daniel nga iti “tiempo ti panungpalan,” umadunto ti pannakaammo dagiti tattao iti kinapudno ti Biblia, agraman iti nalawag a pannakaawat kadagitoy a padto.—Daniel 12:4, footnote.
Trabaho a panangasaba iti intero a lubong. Impadto ni Jesus: “Ti naimbag a damag maipapan iti Pagarian maikaskasabanto iti intero a daga.”—Mateo 24:14.
Kinaawan interes ken pananguyaw. Impakpakauna ni Jesus nga awanto ti bibiang dagiti tattao kadagiti ebidensia a dandanin ti panungpalan uray nakalawlawagen dagita. (Mateo 24:37-39) Nakarkaro pay ngem iti dayta, impakpakauna ti 2 Pedro 3:3, 4 nga uyawen wenno katkatawaanto ti dadduma dagiti ebidensia, nga ibagbagada a saan nga agpaypayso dagita.
Matungtungpalen ti amin a padto. Imbaga ni Jesus a mailasintayo nga addatayon iti maudi nga al-aldaw no makitatayo nga aggigiddanen a matungpal dagiti padto, saan laeng a sumagmamano no di ket kaaduan kadagita.—Mateo 24:33.
Agbibiagtayo kadin iti “maudi nga al-aldaw”?
Wen. Ipakita dagiti kasasaad iti lubong ken ti kronolohia ti Biblia a nangrugin ti maudi nga al-aldaw idi 1914, ti tawen a bimtak ti Gubat Sangalubongan I. Tapno maammuam no kasano nga ipakita dagiti kasasaad iti lubong nga agbibiagtayon iti maudi nga al-aldaw, buyaem daytoy a video:
Idi 1914, nangrugi nga agturay ti Pagarian ti Dios idiay langit. Ti maysa kadagiti umuna nga inaramid ti Pagarian ket intapuakna ni Satanas a Diablo ken dagiti demoniona ditoy daga. Iti kasta, ti laeng daga ti maimpluensiaanna. (Apocalipsis 12:7-12) Makita ti impluensia ni Satanas kadagiti dakes nga ug-ugali ken ar-aramid dagiti tattao isu a maibagatayo a ti maudi nga al-aldaw ket “delikado ken narigat a tiempo.”—2 Timoteo 3:1.
Adu a tattao ti mabutbuteng gapu kadagitoy a delikado a tiempo. Problemadoda ta dumakdakes a dumakdakes ti lubong. Mabutbuteng ti dadduma ta pampanunotenda nga awanen ti nasayaat a masakbayan para kadagiti tattao.
Iti sabali a bangir, adda dagiti tattao nga apektado met kadagiti mapaspasamak iti lubong ngem mangnamnamada latta iti nasayaat a masakbayan. Kombinsidoda a dandanin ikkaten ti Pagarian ti Dios dagiti problema ti lubong. (Daniel 2:44; Apocalipsis 21:3, 4) Agan-anusda nga agur-uray iti panangtungpal ti Dios kadagiti karina, ken maliwliwada iti sasao ni Jesus a: “Ti makapagibtur agingga iti panungpalan, maisalakanto.”—Mateo 24:13; Mikias 7:7.