Ob-obserbaran ti agtutubo a lalaki dagiti tattao a sumsumrek iti Kingdom Hall

SALUDSOD DAGITI AGTUTUBO

Apay a Makigimongka iti Kingdom Hall?

Mamindua iti kada lawas nga aggigimong dagiti Saksi ni Jehova iti lugar a pagdaydayawanda a maawagan iti Kingdom Hall. Ania ti maar-aramid sadiay, ken ania ti maitulongna kenka no makigimongka?

Ania ti maar-aramid iti Kingdom Hall?

Ti Kingdom Hall ket lugar a pakasursuruan kadagiti makatulong nga impormasion iti Biblia. Makatulong dagiti gimong a maar-aramid sadiay tapno:

maammuam ti kinapudno maipapan iti Dios.
maawatam ti kaipapanan dagiti agdama a pasamak.
agbalinka a nasaysayaat a tao.
makabirokka kadagiti kasayaatan a gagayyem.

Ammom kadi? Kingdom Hall ti awag iti lugar a paggigimongan dagiti Saksi ni Jehova gapu ta ti Pagarian ti Dios ti kanayon a mapagsasaritaan sadiay.—Mateo 6:9, 10; 24:14; Lucas 4:43.

Apay a masapul a makigimongka?

Makatulong kenka dagiti impormasion. Dagiti prinsipio ti Biblia a mailawlawag kadagiti gimong dagiti Saksi ni Jehova ket makatulong kenka a ‘manggun-od iti sirib.’ (Proverbio 4:5) Kaipapanan dayta a matulongannaka ti Biblia a mangaramid iti umiso a desision. Masungbatanna met dagiti napateg a saludsod iti biag, kas iti:

Sumagmamano laeng dagitoy kadagiti tema ti palawag kadagiti gimong iti ngudo ti lawas:

Apay nga Agpaiwanwantayo iti Biblia?
Sadino ti Pakasarakanyo iti Tulong iti Tiempo ti Riribuk?
No Ania ti Ar-aramiden ti Pagarian ti Dios Agpaay Kadatayo Ita.

“Nakigimong ti maysa a kaklasek. Nakitugaw kadakami a sangapamiliaan ket pinabulodanmi kadagiti libro nga usarenna. Kalpasanna, imbagana a nagustuanna dagiti sungbat kadagiti paset ti gimong a mabalin ti agkomento. Imbagana met nga iti simbaanda, awan ti publikasion nga us-usarenda nga agadal a kas kadatayo.”—Brenda.

Ammom kadi? Awan ti bayadam no makigimongka iti Kingdom Hall, ken awan ti maaramid a panagkolekta.

Maparegtaka iti pannakikaduam sadiay. Ibaga ti Biblia a ti maysa a rason nga aggigimongtayo ket tapno “agpipinnaregtatayo.” (Hebreo 10:24, 25) Uray addaka iti lubong nga adu ti tao a bagida la ti pampanunotenda, mabang-aranka no makikaduaka kadagiti tattao a mangyun-una iti Dios ken iti padada a tao.

“No nabannogak iti agmalem, nalidayak ken kasla awanen ti pigsak, ngem kanayon a sumayaat ti riknak gapu kadagiti kakabsat iti Kingdom Hall. No malpasen ti gimong, agawidak a naragsak ken nakasaganaak manen a mangsango iti sumaruno nga aldaw.”—Elisa.

Ammom kadi? Adda nasurok a 120,000 a kongregasion dagiti Saksi ni Jehova iti intero a lubong nga aggigimong iti nasurok nga 60,000 a lokasion. Kada tawen, agarup 1,500 ti average a maibangbangon a Kingdom Hall tapno adda paggimongan ti umad-adu nga umat-atender.a

Ti kuna dagiti padam nga agtutubo

“Idi hayskulak, sumursurot kaniak ti maysa a kaklasek a makigimong, ket nasdaaw ta agkakadua nga agad-adal iti Biblia dagiti tattao a nagduduma ti edadna. Itay nabiit, nakigimong ti boss-ko ket nasdaaw iti kanayon a panangusartayo iti Biblia. Gapu iti dayta a panangapresiarna, ad-adda nga impategko dagiti gimong!”—Jessica.

“Matultulongannak dagiti gimong tapno saanko a sangkapanunot dagiti inaldaw nga aktibidadko ken pakadanagak. Masursurotayo sadiay no kasano nga agbalin a makapnek ti biagtayo, agbalin a nasaysayaat a tao, ken adu pay. Kada aggapuak iti Kingdom Hall, mariknak a naparegta ken nabang-aranak.”—Timothy.

“Kalpasan ti gimong, imbaga ti lalaki nga inawisko: ‘Immayak tapno paneknekak a saan nga umiso dagiti patpatienyo. Ngem napaneknekak a dagiti gayam patpatiek ti kamali!’ Naragsakan met ta mannakigayyem dagiti Saksi ni Jehova. Kunana: ‘Uray ita la a naam-ammokayo, trinatodak a kasla agaammotayon iti adu a tawen!’”—Jacob.

“Adda dagiti tiempo a pampanunotek ti pumanaw a dagus no malpas ti gimong. Ngem bayat ti gimong, maawan dayta a riknak. Kalpasan ti gimong, makisaritaak ket diakon malagip no apay a napanunotko ti pumanaw a dagus. No saan a gapu kadagiti gimong, awan koma ita dagiti nasingpet a gagayyemko.”—Madison.

a Tapno makabirokka iti lugar a paggimongan, luktam ti “Gimong ti Kongregasion Dagiti Saksi ni Jehova” sa i-click-mo ti “Birokem ti Lokasion nga Asideg iti Lugarmo.”