Basol Kadi ti Panagsigarilio?

Sungbat ti Biblia

Awan ti mabasa iti Biblia maipapan iti panagsigarilioa wenno dadduma a pamay-an ti panagusar iti tabako. Ngem naglaon dayta kadagiti prinsipio a mangipakita a kagura ti Dios dagiti narugit ken makaperdi iti salun-at nga aramid. Ibilangna ngarud a basol ti panagsigarilio.

• Panangrespeto iti biag. ‘Ti Dios ti mangmangted iti biag ken anges iti amin a tattao.’ (Aramid 17:24, 25) Gapu ta regalo ti Dios ti biag, ditay koma agaramid iti aniaman a mangpaababa iti biagtayo, kas iti panagsigarilio. Maysa ti panagsigarilio a kangrunaan a makagapu kadagiti ipapatay iti intero a lubong, a mabalin koma a malapdan.

• Panangayat iti pada a tao. “Masapul nga ayatem ti padam a tao a kas iti bagim.” (Mateo 22:39) Saanmo nga ipakpakita ti ayat no agsigarilioka iti ayan dagiti tattao. Dagidiay kanayon a makalang-ab iti asuk ti sigarilio ket dakdakkel ti posibilidadna nga agsakit iti kas iti sakit dagiti agsigsigarilio.

• Kinapateg ti panagbalin a nasantuan. “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios.” (Roma 12:1) “Dalusantayo koma ti bagbagitayo iti tunggal pakatulawan iti lasag ken iti espiritu, nga an-anayentayo ti kinasanto iti panagbuteng iti Dios.” (2 Corinto 7:1) Ti panagbalin a nasantuan kaipapananna ti panagbalin a nadalus ken nasin-aw. Isu a saan a gagangay ken saan a maitutop a maawagan iti nasantuan dagiti agsigsigarilio ta igaggagarada ti mangipauneg iti narugit a banag a mangdadael iti bagida.

Adda kadi ibaga ti Biblia maipapan iti panagusar iti marijuana wenno dadduma pay a droga kas pagpalpaliwaan?

Saan nga espesipiko a dinakamat ti Biblia ti marijuana wenno dagiti kapadana nga agas. Ngem naglaon daytoy kadagiti prinsipio a mangiparit iti panagusar kadagiti kasta a makaadikto a substansia kas pagpalpaliwaan. Malaksid kadagiti nadakamaten a prinsipio, agaplikar met dagitoy:

• Kinapateg ti panangkontrol iti panunot. “Masapul nga ayatem ni Jehova a Diosmo . . . buyogen ti intero a panunotmo.” (Mateo 22:37, 38) Agtalinaedkayo a ‘sipupuot a naan-anay.’ (1 Pedro 1:13) Saan a kontrolado ti maysa ti panunotna no agdrogdroga, ken adu pay ketdin ti maad-adikto iti droga. Nakapokus ti panunotda iti panangala ken panagusar iti droga imbes a kadagiti makagunggona a bambanag.​—Filipos 4:8.

• Panagtulnog kadagiti linteg ti gobierno. ‘Agtulnogkayo kadagiti gobierno ken autoridad.’ (Tito 3:1) Iparit ti linteg ti adu a pagilian ti panagusar iti droga. No kayattayo a maparagsak ti Dios, masapul nga agtulnogtayo kadagiti autoridad.​—Roma 13:1.