Naballigi nga iseserrek ni Jesus iti Jerusalem a nakasakay iti asno

Paneknekan Kadi Dagiti Padto Maipapan iti Mesias a ni Jesus ti Mesias?

Sungbat ti Biblia

Wen. Idi adda ni Jesus ditoy daga, tinungpalna ti adu a padto maipapan iti “Mesias a Panguluen,” daydiay agbalin a “Manangisalakan iti lubong.” (Daniel 9:25; 1 Juan 4:14) Ken uray kalpasan ti ipapatay ni Jesus, intultuloyna latta a tinungpal dagiti padto maipapan iti Mesias.—Salmo 110:1; Aramid 2:34-36.

Ania ti kaipapanan ti “Mesias”?

Ti Hebreo a sao a Ma·shiʹach (Mesias) ken ti Griego a katupagna a sao a Khri·stos (Kristo) ket agpada a “Daydiay Napulotan” ti kaipapananda. Gapuna, ti kaipapanan ti “Jesu-Kristo” ket “ni Jesus a Napulotan,” wenno “ni Jesus a Mesias.”

Idi tiempo ti Biblia, masansan a mapulotan ti maysa a tao babaen ti panangibukbok iti lana iti ulona no maapointaran iti espesial a saad. (Levitico 8:12; 1 Samuel 16:13) Ni Jesus ket inapointaran ti Dios kas Mesias—maysa a nangato a posision. (Aramid 2:36) Nupay kasta, imbes a napulotan ni Jesus iti lana, isu ket pinulotan ti Dios iti nasantuan nga espiritu.—Mateo 3:16.

Mabalin ngata a saan la a maymaysa a tao ti mangtungpal kadagiti padto maipapan iti Mesias?

Saan. Kas iti lamma ti ramay (fingerprint) a pakailasinan ti maysa a tao, ti kaitungpalan dagiti padto ti Biblia ket tumukoy laeng iti maymaysa a Mesias, wenno Kristo. Nupay kasta, ipakdaar ti Biblia a “tumakderto dagiti ulbod a Kristo ken dagiti ulbod a mammadto ket mangteddanto iti dadakkel a pagilasinan ken datdatlag tapno mangyaw-awanda, no mabalin, uray pay kadagiti napili.”—Mateo 24:24.

Iti masanguanan pay laeng ngata nga agparang ti Mesias?

Saan. Impakpakauna ti Biblia a ti Mesias ket kaputotan ti ari ti Israel a ni David. (Salmo 89:3, 4) Nupay kasta, napukaw dagiti rekord ti kapuonan dagiti Judio iti pamilia ni David ta mabalin a nadadael idi rinaut dagiti Romano ti Jerusalem idi 70 C.E.a Sipud idi, saanen a mapaneknekan ti asinoman nga isu ket karaman iti naarian a pamilia ni David. Iti kasunganina, uray no adda idi dagiti rekord dagiti kapuonan idi tiempo ni Jesus, saan a makontra dagiti kabusorna ti panangibagana nga isu ket kaputotan ni David.—Mateo 22:41-46.

Mano a padto maipapan iti Mesias ti adda iti Biblia?

Saan a posible a maammuan ti eksakto a bilang dagiti padto maipapan iti Mesias. Kas pagarigan, mabalin nga agduduma ti pannakabilang dagiti padto uray kadagiti salaysay a nalawag a tumukoy iti Mesias. Dakamaten ti salaysay iti Isaias 53:2-7 ti sumagmamano a padto a mangitampok iti Mesias. Mabalin nga adda dagiti mangbilang iti intero a salaysay kas maysa laeng a padto. Mabalin met nga ibilang ti dadduma nga agduduma a padto ti tunggal paset dayta.

Dadduma a padto maipapan iti Mesias a tinungpal ni Jesus

Padto	Masarakan iti	Kaitungpalanna
Kaputotan ni Abraham	Genesis 22:17, 18	Mateo 1:1
Kaputotan ni Isaac nga anak ni Abraham	Genesis 17:19	Mateo 1:2
Nayanak iti Juda a tribu ti Israel	Genesis 49:10	Mateo 1:1, 3
Agtaud iti naarian a kapuonan ni Ari David	Isaias 9:7	Mateo 1:1
Iyanak ti maysa a birhen	Isaias 7:14	Mateo 1:18, 22, 23
Mayanak idiay Betlehem	Mikias 5:2	Mateo 2:1, 5, 6
Mapanaganan iti Emmanuelb	Isaias 7:14	Mateo 1:21-23
Nanumo a nangrugian	Isaias 53:2	Lucas 2:7
Napapatay dagiti ubbing kalpasan ti pannakayanakna	Jeremias 31:15	Mateo 2:16-18
Naayaban manipud Egipto	Oseas 11:1	Mateo 2:13-15
Naawagan iti Nazarenoc	Isaias 11:1	Mateo 2:23
Adda mensahero nga immun-una kenkuana	Malakias 3:1	Mateo 11:7-10
Napulotan kas Mesias idi 29 C.E.d	Daniel 9:25	Mateo 3:13-17
Binigbig ti Dios kas Anakna	Salmo 2:7	Aramid 13:33, 34
Naregta maipaay iti balay ti Dios	Salmo 69:9	Juan 2:13-17
Manangiwaragawag iti naimbag a damag	Isaias 61:1	Lucas 4:16-21
Adu ti nalawlawagan gapu iti panangasabana iti Galilea	Isaias 9:1, 2	Mateo 4:13-16
Nagaramid kadagiti milagro a kas ken Moises	Deuteronomio 18:15	Aramid 2:22
Kas ken Moises, impakaammona dagiti kapanunotan ti Dios	Deuteronomio 18:18, 19	Juan 12:49
Pinaimbagna ti adu a masakit	Isaias 53:4	Mateo 8:16, 17
Saanna nga inturong ti atension iti bagina	Isaias 42:2	Mateo 12:17, 19
Naasian kadagiti marigrigatan	Isaias 42:3	Mateo 12:9-20; Marcos 6:34
Impakaammona ti hustisia ti Dios	Isaias 42:1, 4	Mateo 12:17-20
Nakaskasdaaw a Manangbalakad	Isaias 9:6, 7	Juan 6:68
Impakaammona ti nagan ni Jehova	Salmo 22:22	Juan 17:6
Nagusar kadagiti ilustrasion	Salmo 78:2	Mateo 13:34, 35
Maysa a Lider	Daniel 9:25	Mateo 23:10
Adu ti saan a namati kenkuana	Isaias 53:1	Juan 12:37, 38
Bato a pakaitibkolan	Isaias 8:14, 15	Mateo 21:42-44
Linaksid dagiti tattao	Salmo 118:22, 23	Aramid 4:10, 11
Nagura nga awan gapgapuna	Salmo 69:4	Juan 15:24, 25
Naballigi nga iseserrek iti Jerusalem a nakasakay iti asno	Zacarias 9:9	Mateo 21:4-9
Indaydayaw dagiti ubbing	Salmo 8:2	Mateo 21:15, 16
Immay iti nagan ni Jehova	Salmo 118:26	Juan 12:12, 13
Trinaidor ti pagtaltalkanna a gayyem	Salmo 41:9	Juan 13:18
Nailako iti 30 a pedaso a pirake	Zacarias 11:12, 13	Mateo 26:14-16; 27:3-10
Tinallikudan dagiti gagayyemna	Zacarias 13:7	Mateo 26:31, 56
Adda dagiti ulbod a nagtestigo maibusor kenkuana	Salmo 35:11	Mateo 26:59-61
Nagulimek iti sango dagiti nangak-akusar kenkuana	Isaias 53:7	Mateo 27:12-14
Natupraan	Isaias 50:6	Mateo 26:67; 27:27, 30
Nakabil ti ulona	Mikias 5:1	Marcos 15:19
Nasapsaplit	Isaias 50:6	Juan 19:1
Saanna a linapdan dagiti nangkabil kenkuana	Isaias 50:6	Juan 18:22, 23
Nagkukumplot dagiti lider ti gobierno maibusor kenkuana	Salmo 2:2	Lucas 23:10-12
Nailansa ti ima ken sakana iti kayo	Salmo 22:16	Mateo 27:35; Juan 20:25
Napagbibinnunotan ti badona	Salmo 22:18	Juan 19:23, 24
Naibilang a managbasol	Isaias 53:12	Mateo 27:38
Napadpadakes, nain-insulto	Salmo 22:7, 8	Mateo 27:39-43
Nagsagaba para kadagiti managbasol	Isaias 53:5, 6	1 Pedro 2:23-25
Kasla binaybay-an ti Dios	Salmo 22:1	Marcos 15:34
Naikkan iti inumen a suka ken apro	Salmo 69:21	Mateo 27:34
Nawaw sakbay a natay	Salmo 22:15	Juan 19:28, 29
Intalekna ti espirituna iti Dios	Salmo 31:5	Lucas 23:46
Insukona ti biagna	Isaias 53:12	Marcos 15:37
Impaayna ti subbot a mangikkat iti basol	Isaias 53:12	Mateo 20:28
Awan ti natukkol a tulangna	Salmo 34:20	Juan 19:31-33, 36
Naduyok	Zacarias 12:10	Juan 19:33-35, 37
Naitabon a kadua dagiti baknang	Isaias 53:9	Mateo 27:57-60
Napagungar	Salmo 16:10	Aramid 2:29-31
Nasuktan ti traidor	Salmo 109:8	Aramid 1:15-20
Nagtugaw iti makannawan ti Dios	Salmo 110:1	Aramid 2:34-36

a Kuna ti McClintock and Strong’s Cyclopedia: “Awan duadua a naperdi dagiti rekord ti kapuonan dagiti tribu ken pamilia dagiti Judio idi nadadael ti Jerusalem, saan nga iti kasakbayanna.”

b Ti Hebreo a nagan nga Emmanuel, a kaipapananna “Adda Kadatayo ti Dios” nalawag nga ipakitana ti akem ni Jesus kas Mesias. Ti kaaddana ditoy daga ken dagiti aramidna ti mangpaneknek nga adda ti Dios kadagiti agdaydayaw Kenkuana.—Lucas 2:27-32; 7:12-16.

c Ti sao a “Nazareno” ket agparang a naggapu iti Hebreo a sao a neʹtser, a “tarubong” ti kayatna a sawen.

d Para kadagiti detalye maipapan iti kronolohia ti Biblia a mangipakita a 29 C.E. ti tawen a panagparang ti Mesias, kitaem ti artikulo a “No Kasano nga Impadto ni Daniel ti Panagparang ti Mesias.”

e Daytoy a padto ket naisurat iti libro a Zacarias, ngem imbaga ni Mateo a mannurat ti Biblia a dayta ket “naisao babaen ken Jeremias a mammadto.” (Mateo 27:9) Agparang nga adda dagiti gundaway a ti libro a Jeremias ti umuna a libro iti seksion ti Kasuratan a naawagan iti ‘dagiti Mammadto.’ (Lucas 24:44) Agparang nga inusar ni Mateo ti “Jeremias” a mangtukoy iti intero a koleksion dagiti libro, a nakairamanan ti libro a Zacarias.