Ania ti Baro a Jerusalem?

Sungbat ti Biblia

Ti “Baro a Jerusalem,” a namindua a nadakamat iti Biblia, ket maysa a simboliko a siudad a mangirepresentar iti grupo dagiti pasurot ni Jesus a makipagturay kenkuana iti Pagarian ti Dios idiay langit. (Apocalipsis 3:12; 21:2) Ipakita ti Biblia a daytoy a grupo ket maawagan met iti nobia ni Kristo.

No Kasano a Maammuan no Ania ti Baro a Jerusalem

1. Ti Baro a Jerusalem ket idiay langit. Tunggal dakamaten ti Biblia ti Baro a Jerusalem, ibagana a bumaba dayta manipud langit ken bambantayan dagiti anghel dagiti ruangan ti siudad. (Apocalipsis 3:12; 21:2, 10, 12) Maysa pay, ti kinadakkel ti siudad ti mangpaneknek a saan a mabalin a ditoy daga ti ayanna. Agpapada ti kaatiddog, kaakaba, ken kangatona, a “sangapulo ket dua a ribu nga estadio” ti rukod ti aglawlawna.a (Apocalipsis 21:16) Kayatna a sawen nga agarup 560 a kilometro (350 mi) ti kangato dagiti sikiganna.

2. Ti Baro a Jerusalem ket buklen ti grupo dagiti pasurot ni Jesus, ti nobia ni Kristo. Ti Baro a Jerusalem ket maawagan iti “nobia, ti asawa ti Kordero.” (Apocalipsis 21:9, 10) Iti daytoy a simboliko a panangiladawan, ni Jesu-Kristo ti matuktukoy a Kordero. (Juan 1:29; Apocalipsis 5:12) “Ti asawa ti Kordero,” ti nobia ni Kristo, irepresentarna dagiti Kristiano a makikaduanto ken Jesus idiay langit. Ti relasion ni Jesus kadagitoy a Kristiano ket impada ti Biblia iti relasion ti agassawa. (2 Corinto 11:2; Efeso 5:23-25) Kanayonanna, naikitikit kadagiti pundasion a bato ti Baro a Jerusalem ti “sangapulo ket dua a nagan ti sangapulo ket dua nga apostol ti Kordero.” (Apocalipsis 21:14) Makatulong daytoy a detalye tapno mapatalgedan no ania ti Baro a Jerusalem gapu ta dagiti Kristiano a naawis nga agbiag idiay langit ket ‘naibangon iti rabaw ti pamuon dagiti apostol ken dagiti mammadto.’​—Efeso 2:20.

3. Ti Baro a Jerusalem ket paset ti maysa a gobierno. Ti nagkauna a Jerusalem ti kabesera ti Israel. Ditoy a nagturay “iti trono ni Jehova” ni Ari David, ni Solomon nga anakna, ken dagiti kaputotanda. (1 Cronicas 29:23) Gapuna, ti Jerusalem, a naawagan “nasantuan a siudad,” irepresentarna ti panagturay ti Dios iti pamilia ni David. (Nehemias 11:1) Ti Baro a Jerusalem, a naawagan met iti “nasantuan a siudad” ket buklen dagidiay makikadua ken Jesus idiay langit nga ‘agturay kas ar-ari iti daga.’​—Apocalipsis 5:9, 10; 21:2.

4. Ti Baro a Jerusalem ket mangyeg kadagiti bendision kadagiti tattao ditoy daga. Nailadawan ti Baro a Jerusalem a “bumabbaba nga aggapu idiay langit manipud iti Dios” a mangipakita nga us-usaren dayta ti Dios a mangbalbaliw iti bambanag ditoy daga. (Apocalipsis 21:2) Ipakita dagitoy a sasao a konektado ti Baro a Jerusalem iti Pagarian ti Dios, nga us-usaren ti Dios tapno maitungpal ti pagayatanna “kas sadi langit, kasta met iti daga.” (Mateo 6:10) Ti panggep ti Dios para kadagiti tattao ditoy daga ramanenna dagitoy a bendision:

   • Pannakaikkat ti basol. Agayus ti “maysa a karayan ti danum ti biag” manipud iti Baro a Jerusalem ken mangpadanum iti “kaykayo ti biag” nga “agpaay a pangagas kadagiti nasion.’ (Apocalipsis 22:1, 2) Daytoy a pisikal ken naespirituan a panangpaimbag ti mangikkat iti basol. Iti kasta, maaddaan dagiti tattao iti perpekto a biag a kas iti orihinal a pinanggep ti Dios.​—Roma 8:21.

   • Nasayaat a relasion ti Dios ken ti sangatauan. Gapu iti basol, naisina dagiti tattao iti Dios. (Isaias 59:2) Ti pannakaikkat ti basol ti mangkompleto iti pannakatungpal daytoy a padto: “Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada.”​—Apocalipsis 21:3.

   • Panagpatingga ti panagsagaba ken ipapatay. Babaen ti Pagarianna, ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”​—Apocalipsis 21:4.