Ibagam Kadakuada nga Ay-ayatem Ida

Ni Ong-Li ket maysa kadagiti Saksi ni Jehova idiay Bulgaria. Iyad-adalanna iti Biblia ti maysa nga agkabannuag a babai nga agnagan iti Zlatka ngem saan a makipagad-adal ni lakayna. Kinuna ni Ong-Li: “Idi inadalmi ti maipapan iti biag ti pamilia, impaganetgetko ti pateg ti panangibagatayo iti asawa ken annaktayo nga ay-ayatentayo ida. Malidliday ni Zlatka a kimmita kaniak; imbagana a pulos a dina pay imbagbaga ken lakayna wenno iti siam ti tawenna a balasitangna nga ay-ayatenna ida!”

Inlawlawag ni Zlatka, “Nakasaganaak a mangaramid iti aniaman para kadakuada ngem diak maibaga nga ay-ayatek ida,” sa innayonna, “Pulos a saan nga imbagbaga kaniak ni nanangko nga ay-ayatennak. Uray ni lolak, dina pulos imbagbaga nga ay-ayatenna ni nanangko.” Impakita ni Ong-Li ken ni Zlatka nga imbaga ni Jehova iti napigsa a timek nga ay-ayatenna ni Jesus. (Mateo 3:17) Imparegtana ken Zlatka nga ikararagna ken Jehova ti maipapan iti dayta ken ikagumaanna nga ibaga ken lakayna ken iti anakda nga ay-ayatenna ida.

Imbaga ni Ong-Li: “Dua nga aldaw kalpasanna, siraragsak nga imbaga kaniak ni Zlatka nga inkararagna daytan ken Jehova. Idi nakaawid ni lakayna, imbagana a naadalna iti Biblia no kasano kapateg a raemen ken ayaten ti asawa a babai ni lakayna. Kalpasanna, imbagana ken lakayna a talaga nga ay-ayatenna isuna! Idi simmangpet metten ti anakda, isu ket inarakup ni Zlatka ken imbagana nga ay-ayatenna! Imbaga kaniak ni Zlatka: ‘Nakalaglag-an itan ti riknak. Adu a tawen a diak mayebkas ti riknak, ngem babaen ti tulong ni Jehova, nayebkasko met laengen ti ayatko iti pamiliak.’

“Makalawas kalpasanna,” intuloy a kinuna ni Ong-Li, “naranaak ti asawa ni Zlatka, ket imbagana: ‘Adu ti nangibaga kaniak a saan a rumbeng a makipagadal kadakayo ni Zlatka iti Biblia, ngem talaga a nakatulong unay iti pamiliami ti panagadalna iti Biblia. Nasingsinged ken naragragsaken ti relasionmi.’”