Ti Panagbatok ti Gannet

Dagiti gannet ket dadakkel a tumatayab a makabatok iti taaw iti kapartak a 190 a kilometro kada oras (118 mph). No bumatok ti maysa a gannet, mabalin a nasurok a 20 a daras a napigpigsa dayta ngem iti puersa ti grabidad. Kasano a makabatok dagiti gannet iti kasta a kapigsa sada ulit-uliten dayta?

Panunotem: Sakbay a bumatok ti gannet, iyukradna a palikud dagiti payakna tapno agbalin ti bagina a kasla pana. Mangiruar met iti kulapot a mangprotektar kadagiti matana sana pabussogen ti tengnged ken barukongna tapno agbalin a kasla airbag a mangprotektar iti bagina iti kapigsa ti panagbatokna.

Bayat nga agsusuek ti gannet tapno bumatok, agbalin a sukog-apa ti sippit, ulo, ken tengngedna. Gapu iti dayta, maksayan ti epekto ti panagbatokna iti bagina ta saan laeng a maymaysa a masel ti mangdaer iti puersa no di ket amin a masel iti tengngedna. Dagus met nga i-adjust-na dagiti matana tapno makitana ti uneg ti danum.

Kasano kauneg ti mabatok ti gannet? Mabatokna ti agarup 11 a metro (36 ft), ngem mabatokna pay ti naun-uneg no ipayakpakna dagiti medio nakaukrad a payakna ken ikuy-atna dagiti kasla saka ti pato a sakana. Kinaagpaysuanna, adda dagiti naobserbaran a gannet a makabatok iti naun-uneg pay ngem iti 25 a metro (82 ft). Kalpasan ti ibabatok ti maysa a gannet, laklakaenna ti tumpaw ket nakasagana manen nga agtayab.

Buyaem no kasano a bumatok ti gannet

Nangaramid dagiti researcher kadagiti robot a gannet a tumulong iti search-and-rescue operation. Nadisenio dagita nga agtayab, bumatok, ken agtayab manen. Ngem bayat ti panagtestingda, maysa a robot ti namin-adu a naperdi gapu iti kapigsa ti panagbatokna. Gapu iti dayta, imbaga dagiti researcher a ti inaramidda a robot ket “saan a kas kalaing dagiti gannet a bumatok.”

Panagkunam? Resulta kadi ti ebolusion ti abilidad ti gannet a bumatok? Wenno adda nangdisenio iti dayta?