E+/IvanJekic via Getty Images
NADISENIO KADI?
Ti Panagtayab ti Bukel ti Dandelion
Iti nakaparsuaan, ti dandelion ti maysa kadagiti kalaingan nga agtayab. No maanginan ti ulo ti dandelion, maitayab dagiti babassit a bukel a kasla kadagiti babassit a parachute. Uray no nababa ti panagtayabda, dadduma ti makadanon iti maysa a kilometro wenno ad-adayo pay. Kasanoda a maaramid dayta? Nabiit pay a nadiskobre dagiti sientista a ti panagtayabda ket mas balanse ken uppat a daras a nasaysayaat ngem iti panagtayab ti parachute.
Panunotem: Ti tunggal bukel ket nakakonektar iti sanga a maawagan pappus. Ti pappus ket buklen dagiti naingpis a barbon, nga agserbi a kasla parachute tapno tumpaw dagiti bukel iti angin.
Ibaga ti dadduma a researcher a gapu iti agrikrikus nga angin iti vortex, bumuntog ti panagtinnag ti bukel ti dandelion
Ngem saan la a dayta ti maaramidan ti pappus. Bayat a lumabas ti angin kadagiti barbon, mabukel ti vortex iti ngato ti pappus. Gapu iti agrikrikus nga angin iti vortex adda mabukel a low pressure. Dayta ti mangipangato iti pappus, tapno saan a matnag a dagus.
Gapu kadagiti nakaur-urnos a barbon ti pappus nalaka a sumrek ti angin a kasla iti maar-aramid iti parachute, ngem adayo a nasaysayaat ken mas balanse. Saan la a dayta, ti pappus ket 90 percent nga awan nagyanna wenno eppes! Isu a bassit laeng a paset ti pappus ti barbon.
Kayat a tuladen dagiti sientista ti panagtayab ti bukel ti dandelion. Posible nga usarenda ti disenio ti bukel ti dandelion a mangaramid kadagiti babassit a drone tapno bassit laeng nga enerhia ti mausar. Adu ti pakausaran dagitoy a drone, a kas iti panangmonitor iti polusion ti angin.
Buyaem no kasano nga agtayab ti bukel ti dandelion
Panagkunam? Resulta kadi ti ebolusion ti nakasaysayaat a panagtayab ti bukel ti dandelion? Wenno adda nangdisenio iti dayta?