PANNAKAILAWLAWAG DAGITI BERSIKULO ITI BIBLIA
Mateo 6:33—“Birukenyo nga Umuna ti Pagarian ti Dios”
“Itultuloyyo ngarud a sapulen nga umuna ti Pagarian ken ti kinalinteg ti Dios, ket amin dagitoy a banag mainayonto kadakayo.”—Mateo 6:33, Baro a Lubong a Patarus.
“Ngem birukenyo nga umuna ti pagarian ti Dios ken ti kinalintegna, ket isuamin dagitoy a banbanag mainayondanto cadacayo.”—Mateo 6:33, Ti Biblia, PBS.
Kaipapanan ti Mateo 6:33
Ti Pagarian ti Dios ket maysa a gobierno idiay langit a mangitungpalto iti pagayatan ti Dios ditoy daga. (Mateo 6:9, 10) Sapsapulen nga umuna ti maysa a tao ti Pagarian no dayta ti iyun-unana iti biagna.a Saan laeng a basta agsursuro maipapan iti Pagarian ti Dios no di ket ibagana pay iti dadduma dagiti nagsasayaat nga aramidento ti Pagarian. (Mateo 24:14) Ti maysa a tao a mangsapsapul iti Pagarian ket ikarkararagna met nga umay koma dayta.—Lucas 11:2.
Ti kinalinteg ti Dios ramanenna dagiti paglinteganna maipapan iti umiso ken di umiso. (Salmo 119:172) Isu a sapsapulen ti maysa a tao ti kinalinteg ti Dios no sursurotenna dagiti paglintegan ti Dios iti moral, ket kanayon a pagsayaatanna dayta.—Isaias 48:17.
Ti sasao nga amin dagitoy a banag mainayonto kadakayo ket maysa a kari nga ipaayto ti Dios dagiti kasapulan dagiti mangyun-una iti Pagarian iti biagda ken dagiti paglinteganna.—Mateo 6:31, 32.
Konteksto ti Mateo 6:33
Dagitoy nga imbaga ni Jesus ket karaman iti maawagan a Sermon iti Bantay, a naisurat iti Mateo kapitulo 5-7. Adu idi nga agdengdengngeg ken Jesus ti napanglaw. Mabalin a pampanunotenda a masapul a mas agpokusda nga agbirok iti pagbiagda, isu a bassit ti tiempoda a mangsapul iti Pagarian. Ngem imbaga ni Jesus a paliiwenda no kasano nga ipapaay ti Dios ti kasapulan dagiti mula ken animal. Ikarkari ti Dios a kasta met ti aramidenna kadagiti mangsapsapul nga umuna iti Pagarianna.—Mateo 6:25-30.
Di Umiso a Kapanunotan Maipapan iti Mateo 6:33
Di umiso: Bumaknang ti mangsapsapul iti Pagarian.
Umiso: Imbaga ni Jesus a dagidiay mangyun-una iti Pagarian ti Dios ket addanto dagiti kasapulanda, kas iti makan ken bado. (Mateo 6:25, 31, 32) Ngem saanna nga inkari a bumaknangda ken saanna nga imbaga a ti kinaadu ti material a banag ti pakakitaan iti bendision ti Dios. Ti agpayso, pinakdaaran ni Jesus dagiti agdengdengngeg kenkuana a saanda a padasen ti agpabaknang, tapno saanda a marigatan a mangsapul nga umuna iti Pagarian. (Mateo 6:19, 20, 24) Adu ti inaramid ni apostol Pablo para iti Pagarian ti Dios, ngem no dadduma, agkurkurang dagiti kasapulanna. Kas ken Jesus, pinakdaaranna met ti dadduma maipapan iti pagdaksan ti panagpabaknang.—Filipos 4:11, 12; 1 Timoteo 6:6-10.
Di umiso: Saan a kasapulan nga agtrabaho dagiti Kristiano para iti pagbiagda.
Umiso: Ibagbaga ti Biblia a masapul nga agtrabaho dagiti Kristiano tapno masuportaranda ti bagida ken ti pamiliada. (1 Tesalonica 4:11, 12; 2 Tesalonica 3:10; 1 Timoteo 5:8) Saan nga imbaga ni Jesus kadagiti pasurotna a ti laeng Pagarian ti sapulenda; imbes ketdi, imbagana a sapulenda nga umuna ti Pagarian.
Masigurado dagiti mangsapul nga umuna iti Pagarian ti Dios ken agtrabaho tapno masuportaranda ti bagida a tulongan ida ti Dios tapno maadda dagiti kasapulanda.—1 Timoteo 6:17-19.
a Ti “itultuloyyo . . . a sapulen” ket naipatarus manipud iti Griego a sao a tumukoy iti agtultuloy nga aramiden ti maysa a tao, ken mabalin a maipatarus dayta a “kanayon a sapulen.” Isu a saan laeng a temporario wenno iti ababa laeng a tiempo nga iyun-una ti maysa ti Pagarian no di ket iti intero a panagbiagna.