Panangidepensa iti Wayawaya nga Agdaydayaw Para Kadagiti Katutubo

Ginasut a milion ti aggigian iti Latin America. Minilion kadakuada ti katutubo nga addaan iti bukod a lengguahe ken kostumbre. Adu kadagitoy a katutubo ti kakabsattayo, ken napateg kadakuada ti kulturada. Tapno maammuan dagiti tattao ti kinapudno manipud iti Biblia, agipatpatarus ken agiwarwaras dagiti Saksi ni Jehova iti publikasion iti nasurok a 130 a katutubo a lengguahe iti Latin America.a Ngem mabusbusor ti dadduma kadakuada ta agserserbida ken Jehova ken saanda a kayat ti makiraman kadagiti kostumbre a saan a naibatay iti Biblia a maar-aramid iti lugarda. Kasano a maus-usar dagiti donasionyo tapno matulongan dagitoy a kakabsattayo?

Natulonganda nga Agsubli iti Lugarda

Iti Mexico, dagiti kakabsattayo iti komunidad dagiti Huichol iti kabambantayan ti Jalisco sidadayaw a nagkedkedda a makiraman kadagiti aktibidad ti relihion ta saan nga ipalubos ti konsiensiada.b Nakapungtot ti dadduma a kalugaranda. Idi Disiembre 4, 2017, adda dagiti siraranggas nga immatake iti maysa a grupo dagiti Saksi ni Jehova ken kadagiti kakaduada. Pinuersada ida a pumanaw iti komunidad, dinadaelda dagiti property-da, ken imbagada a patayenda ida no agsublida.

Tinulongan ida dagiti Saksi iti kaarrubada nga ili ken impaayda dagiti kasapulanda. Ngem ania ti masapul a maaramid tapno makasublida iti lugarda? Imbaga ti maysa a kabsat nga agnagan Agustín: “Awan ti pagbayadmi iti abogado, ken saanmi nga ammo no asino ti pagpatulonganmi.”

Gapu ta maipapaidam ti wayawaya nga agdaydayaw kadagiti kakabsat, dagus a nagaksion ti sangay iti Central America. Umuna, napanda kadagiti opisial tapno maimbestigaran dagitoy a krimen. Sumaruno, inaprobaran ti Coordinators’ Committee ti Bagi a Manarawidwid dagiti Saksi ni Jehova a tumulong ti Legal Department iti sangalubongan a hedkuarter tapno mangyulida iti kaso para kadagiti kakabsattayo a Huichol agingga a nakadanon ti kaso iti Supreme Court of Justice of the Nation—ti kangatuan a korte iti Mexico.

Dagiti abogado manipud iti nagduduma a nasion inlawlawagda a no kasano a masapul a respetuen ti dadduma ti kultura dagiti katutubo, masapul met ngarud a respetuen ken protektaran ti komunidad dagiti katutubo ti wayawaya ti amin a miembroda. Adda kalintegan ti amin a tattao sadinoman ti paggigiananda.

Idi Hulio 8, 2020, nagkaykaysa ti Supreme Court of Justice a mangaramid iti desision a pabor kadagiti Saksi ni Jehova. Imbilinda nga amin a napapanaw iti komunidad ket masapul a mapalubosan nga agsubli. Agyamyaman ni Agustín, a nadakamat itay, ken uray ti dadduma. Imbagana: “Nakaragragsakkami ken agyamyamankami unay iti inaramid dagiti kakabsat para kadakami. Awan ti maaramidanmi iti situasionmi no saandakami a tinulongan.”

“Nakaad-adu Para iti Sumagmamano”

Kasta met laeng ti mapaspasamak kadagiti kakabsattayo idiay San Juan de Ilumán, maysa a lugar iti Ecuador a paggigianan ti adu a katutubo a tattao manipud iti Otavalo Valley. Idi 2014, nakaalada kadagiti permit isu a nagibangonda iti Kingdom Hall. Ngem puersado a pinasardeng ida ti nasurok a 100 a tattao nga indauluan ti maysa a padi. Imbilin ti komunidad nga agsardeng dagiti Saksi ni Jehova nga aggigimong.

Nagtinnulong dagiti legal department iti sangay iti Ecuador ken iti sangalubongan a hedkuarter tapno idepensada ti pannakaikkat iti wayawaya dagiti kakabsat nga agdaydayaw. Inyulida dayta iti korte. Isu a nagsardeng a bumusor ti komunidad ken impalubosdan nga ituloy dagiti kakabsat ti panaggigimong ken panagibangonda iti Kingdom Hall. Ngem tapno maprotektaranto ti kalinteganda, dagiti kakabsat manipud iti legal department kiniddawda kadagiti nangatngato a korte a mangaramidda iti desision maipapan iti daytoy nga isyu: Masapul kadi a bigbigen dagiti komunidad dagiti katutubo ti kalintegan dagiti tattao a maak-akseptar iti intero a lubong?

Idi Hulio 16, 2020, ti Constitutional Court of Ecuador a kangatuan a korte iti dayta a pagilian, dinengngegna ti kaso. Dagiti abogado a kakabsat a taga-Ecuador ti nangirepresentar iti kongregasion. Ken uppat a kakabsattayo nga eksperiensiado nga abogado manipud iti nagduduma a pagilian ti simmango iti korte. Gapu iti COVID-19, nadengngeg ti kaso babaen ti videoconference. Daytoy ti damo a gundaway a pinalubosan ti korte dagiti abogado a mangireprepresentar kadagiti Saksi ni Jehova iti intero a lubong nga idatagda ti depensada babaen ti videoconference.c Nangdakamat dagiti abogadotayo kadagiti linteg a maipatpatungpal iti intero a lubong tapno paneknekanda a saan a maikkat kadagiti katutubo dagiti kalinteganda kas tao gapu laeng ta pasetda ti maysa a katutubo a komunidad.

Padpadaanan dagiti kakabsattayo idiay Otavalo Valley ti desision ti Constitutional Court. Ken agyamyamanda unay ta matultulonganda. Imbaga ni César nga agserserbi kas panglakayen iti Ilumán Quichua a Kongregasion: “Babaen ti organisasionna, sidadaan ni Jehova a mangaramid iti nakaad-adu para iti sumagmamano laeng a tao.”

Saksi ni Jehova ti amin nga abogado a nangasikaso kadagitoy a kaso. Naragsakda a nangaramid iti dayta uray awan bayadna. Ngem dakkel ti nagastos ken adu a tiempo ti nausar iti panangyuli iti kaso, panagsagana para kadagita, ken panangidepensa iti korte. Nasurok a 380 nga oras ti nausar dagiti abogado ken dadduma a kakabsat iti panangisagana kadagiti ibagada iti korte ken 240 nga oras ti nausar iti panangipatarus kadagiti dokumento a mausar iti hearing iti Mexico. Ginasut nga oras ti nausar ti dandani 40 nga abogado manipud iti intero a lubong a nangasikaso iti kaso idiay Ecuador. Nangalaantayo kadagiti ginastostayo a nangidepensa kadagiti kakabsattayo? Nausar dagiti donasion nga impaayyo babaen kadagiti nadumaduma a pamay-an ti panagdonar nga adda iti donate.jw.org. Pagyamanan iti kinaparaburyo.