Footnote

a Iti panangitandudoda iti Pagarian ti Dios, saan a makinamin dagiti Saksi ni Jehova iti politika wenno mangisungsong iti iyaalsa maibusor kadagiti sekular a gobierno, uray kadagiti pagilian a maparparitan ken maidaddadanes dagiti Saksi. (Tito 3:1) Imbes ketdi, ikagkagumaanda ti mangipaay iti makagunggona, naespirituan, di-napolitikaan a tulong a kas iti inaramid ni Jesus ken dagiti adalanna idi umuna a siglo. Ikagkagumaan dagiti Saksi a tulongan dagiti nalinteg ti panagpuspusona a tattao kadagiti nadumaduma a komunidadda a mangalagad kadagiti agkakaimbag a pannursuro ti Biblia, kas iti ayat iti pamilia, kinapudno, kinadalus iti moral, ken naimbag a kababalin iti trabaho. Kangrunaanna, pagreggetanda nga isuro ida no kasano a suroten dagiti prinsipio ti Biblia ken agpannuray iti Pagarian ti Dios kas ti pudpudno a namnama ti sangatauan.